ក្រុមជម្រើសជាតិស្កុតឡេន នឹងធ្វើជាម្ចាស់ផ្ទះទទួលក្រុមតោកំណាចអង់គ្លេស នៅឯកីឡដ្ឋាន Hampden Park ក្នុងទីក្រុង Glasgow នាឆ្នាំក្រោយ ដែលជាផ្នែក១ នៃការប្រារព្ធពិធី ដើម្បីរំឭកខួប ១៥០ឆ្នាំនៃវិស័យបាល់ទាត់ស្កុតឡេន។ ហ្គេមនេះ ត្រូវបានប្រកាសឱ្យដឹង កាលពីថ្ងៃពុធ។
![](https://cambodiaflashnews.com/wp-content/uploads/2021/06/top-banner.gif)
ក្រុមទាំង២ នឹងជួបតទល់គ្នា នៅថ្ងៃទី១២ ខែកញ្ញា ឆ្នាំ២០២៣ ដែលជាព្រឹត្តិការណ៍មួយ ដែលនឹងរំឭកដល់ការជួបគ្នាលើកដំបូងរបស់ពួកគេ នៅឯកីឡដ្ឋាន Hamilton Crescent ក្នុងទីក្រុងតែ១ ក្នុងខែវិច្ឆិកា ឆ្នាំ១៨៧២ ដែលត្រូវបានទទួលស្គាល់ដោយស្ថាប័នគ្រប់គ្រងបាល់ទាត់ពិភពលោក FIFA ថា ជាការប្រកួតលក្ខណៈអន្តរជាតិលើកដំបូង។
អ្នកចាត់ការរបស់ក្រុមស្កុតឡេន លោក Steve Clarke ដែលក្រុមរបស់គាត់ មិនអាចដណ្ដើមបានសិទ្ធិទៅប្រកួតប្រជែង ក្នុងព្រឹត្តិការណ៍ World Cup នៅប្រទេសកាតា ដែលត្រូវចាប់ផ្តើមក្នុងខែនេះ កំពុងរីករាយនឹងការប្រកួតឡើងវិញ នៅលើទឹកដី ក្នុងផ្ទះខ្លួនឯង។
លោកបាននិយាយថា៖ «ការប្រកួតនេះ ត្រូវបានបញ្ចូលក្នុងប្រវត្តិសាស្ត្របាល់ទាត់ពិភពលោក ដែលជាការប្រកួតបាល់ទាត់អន្តរជាតិលើកដំបូងមិនធ្លាប់មាន ហើយខ្ញុំនឹងមានមោទនភាព ក្នុងការដឹកនាំក្រុមរបស់យើងចេញទៅប្រកួត នៅកីឡដ្ឋាន Hampden ដែលជាផ្នែកមួយនៃការប្រារព្ធខួបលើកទី ១៥០ឆ្នាំនៃការប្រកួតបាល់ទាត់របស់ជាតិយើង»។
ការប្រកួត នៅទឹកដី Hampden នឹងក្លាយជាការជួបគ្នាលើកទី១១៦ រវាងក្រុមទាំង២ ដែលការប៉ះចុងក្រោយ គឺអំឡុងការប្រកួត ក្នុងវគ្គផ្តាច់ព្រ័ត្រ ក្នុងកម្មវិធី Euro 2020 នាពហុកីឡដ្ឋាន Wembley កាលពីឆ្នាំមុន។ ហ្គេមនោះបានបញ្ចប់ទៅដោយស្មើគ្នា ០-០ ដែលជាលទ្ធផលដូចគ្នានឹងការជួបគ្នាលើកដំបូងដែរ។
គ្រូបង្វឹករបស់ក្រុមជម្រើសជាតិអង់គ្លេស លោក Gareth Southgate ដែលកំពុងរៀបចំក្រុមចុងក្រោយ សម្រាប់ព្រឹត្តិការណ៍ World Cup បាននិយាយថា រាល់ការបានលេងទល់នឹងក្រុមស្កុតឡេន គឺតែងតែពិសេសជានិច្ច៕