រដ្ឋបាលរុស្ស៊ីកាន់កាប់នៅតំបន់ឃើសនអ៊ុយក្រែនភាគខាងត្បូង បានប្រកាសជម្លៀសប្រជាជននៅលើដី១៥គីឡូម៉ែត្របន្ថែម ដោយខ្លាចថាកម្លាំងអ៊ុយក្រែននឹងវាយផ្តាច់ទំនប់ទឹកហូរជន់លិច។
![](https://cambodiaflashnews.com/wp-content/uploads/2021/06/top-banner.gif)
លោក Vladimir Saldo ជាអភិបាលគ្រប់គ្រងនៅទីនោះតែងតាំងដោយរុស្ស៊ីផ្ទាល់ បានមានប្រសាសន៍តាមបណ្តាញសារតេលេក្រាមយ៉ាងក្បោះក្បាយកាលពីល្ងាចថ្ងៃចន្ទថា ការជម្លៀសគឺដើម្បីរក្សាជីវិតប្រជាជន ការពារជីវិតពីការតាមបំផ្លាញដោយរបបទីក្រុងកៀវ។ “ដោយសារតែលទ្ធភាពនៃការប្រើប្រាស់វិធីសាស្រ្តហាមឃាត់នៃសង្រ្គាមដោយរបបអ៊ុយក្រែន ក៏ដូចជាព័ត៌មានដែលថាទីក្រុង Kyiv កំពុងរៀបចំការវាយប្រហារដោយកាំជ្រួចដ៏ធំមួយលើស្ថានីយវារីអគ្គិសនី Kakhovka ធ្វើឲ្យមានគ្រោះថ្នាក់ជន់លិចភ្លាមៗដល់តំបន់ Kherson”។ “ដោយមើលឃើញពីស្ថានភាពនេះ ខ្ញុំបានសម្រេចចិត្តពង្រីកតំបន់ជម្លៀសបន្ថែមចម្ងាយ ១៥ គីឡូម៉ែត្របួនជ្រុងពី Dnipro ការសម្រេចចិត្តនេះនឹងបង្កើតជាការការពារស្រទាប់ថ្មីមួយដើម្បីទប់ទល់នឹងការវាយប្រហារ”។
មិនទាន់មានដំណឹងឆ្លើយតបថ្មីពីខាងលោកហ្សេឡិនស្គីទេ ក៏ប៉ុន្តែកាលពីពេលកន្លងទៅ មិនថារុស្ស៊ី ឬអ៊ុយក្រែននោះទេ ពួកគេសុទ្ធតែបានច្រានចោលរៀងៗខ្លួន និងបានចោទគ្នាទៅវិញទៅមកអំពីគម្រោងវាយប្រហារទំនប់វារីអគ្គិសនីនៅតំបន់ឃើសន ដែលជាភូមិសាស្រ្តសមរភូមិដ៏មមាញឹកមួយ៕
ប្រភព៖ ALJAZEERA
ប្រភពរូប៖ALJAZEERA
ប្រែសម្រួល៖សុខ តុលា