ភ្នំពេញ៖រថយន្ដទំនើបម៉ាក BMW តម្លៃរាប់សិបម៉ឺនដុល្លារ បានបើកបំពានភ្លើងស្តុបក៏បុកគ្នាជាមួយរថយន្តម៉ាកហាយឡិនឌ័របណ្តាលឱ្យខូចខ្ទេច តែមិនបង្កគ្រោះថ្នាក់ដល់ជីវិតមនុស្សទេ។
ហេតុការណ៍នេះបានកើតឡើងនៅត្រង់ស្ដុបទេពផន ក្នុងខណ្ឌទួលគោក កាលពីយប់ថ្ងៃទី១ ខែវិច្ឆិកា។កម្លាំងប្រចាំគោលដៅបានឱ្យដឹងថា មុនកើតហេតុ មានរថយន្តទំនើបម៉ាក BMW មិនមានផ្លាកលេខ បើកបរដោយស្ត្រីម្នាក់ដែលគេស្គាល់ជាអ្នកលក់ឡេនិងមេតុងទីនដ៏ល្បីឈ្មោះ ម៉ូលីកា ប្រើល្បឿនលឿន ហើយបានបំពានភ្លើងស្តុប។
ពេលនោះក៏មានរថយន្តម៉ាកហាយឡិនឌ័រ ផ្លាកលេខភ្នំពេញ 2AJ 1503កំពុងឆ្លងស្តុបបានបុកគ្នាពេញទំហឹង បណ្តាលឱ្យរថយន្តខូចខ្ទេចទាំងសងខាង។បន្ទាប់ពីបង្កហេតុ ស្ត្រីបើករថយន្តទំនើបបានចុះគេចខ្លួនបាត់បន្សល់រថយន្តនៅទីនោះ។ក្រោយមកសមត្ថកិច្ចក៏បានចុះវាស់វែងរួចយករថយន្តទាំង២ទៅរក្សាទុកដើម្បីបន្ដនីតិវិធី៕ដោយ៖វិចិត្រ
