ប្រែសម្រួល៖ រ៉ាម៉េត
បើយោងតាម VN express បានឲ្យដឹងថាក្រុមហ៊ុនហាណូយ Airlios បានបង្ហាញរថយន្តអគ្គិសនីហោះ ដែលខ្លួនគ្រោងនឹងដាក់លក់ជាលក្ខណៈពាណិជ្ជកម្មនៅឆ្នាំ ២០២៤ខាងមុខនេះ។
ក្រុមហ៊ុនបាននិយាយនៅឯការតាំងពិព័រណ៍នាពេលថ្មីៗនេះថា កៅអីទោល ឬហៅថា Airlios អាចហោះហើរបញ្ឈរបានដល់ទៅ 10 ម៉ែត្រក្នុងរយៈពេល 10 វិនាទី ហើយបន្ទាប់មកហោះហើរក្នុងល្បឿន 100 គីឡូម៉ែត្រក្នុងមួយម៉ោង។
វាអាចឡើងដល់កម្ពស់ ១២០ ម៉ែត្រ ដែលមានកម្ពស់ដូចនឹងអគារ ៤៤ ជាន់។ វាមានថ្មចំនួន 8 ដែលត្រូវបានសាកពេញក្នុងរយៈពេល 7 ទៅ 9 នាទីនៅស្ថានីយសាកថ្ម 30 គីឡូវ៉ាត់។
ក្រុមហ៊ុនបានលើកឡើងថា វាភាគច្រើនគឺផលិតពីអាលុយមីញ៉ូម និងសរសៃកាបូន ហើយអាចហោះហើរបានទាំងដោយស្វ័យប្រវត្តិ និងដោយដៃបញ្ជា។
ចំពោះការសាកល្បងបានហោះបានយ៉ាងជោគជ័យក្នុងរយៈចម្ងាយ ៣៣ គីឡូម៉ែត្រក្នុងរយៈពេលត្រឹមតែ ២០ នាទីក្នុងរយៈកម្ពស់ក្រោម ១២០ ម៉ែត្រ។ វាត្រូវបានសាកល្បងរយៈពេល 100 ម៉ោង និង 1,000 គីឡូម៉ែត្រ។
លោក ម៉ាយ ធៀនវូ (Mai Thien Vu ) ប្រធានផ្នែកបច្ចេកវិទ្យារបស់ក្រុមហ៊ុនបានប្រាប់ VN Express ថា “ឥឡូវនេះគម្រោងនេះបានបញ្ចប់ ពី70-80%” ។
“យើងគ្រោងនឹងចាប់ផ្តើមការហោះហើរលើកដំបូងនៃកំណែពាណិជ្ជកម្មរបស់ Airlios នៅចុងឆ្នាំ 2023” ។
លោក Mai Thien Vu បានបន្ថែមថា អ្នកគ្រប់គ្រង និងវិស្វករនៅក្រុមហ៊ុន Airlios បានចាប់ផ្តើមគិតអំពីការផលិតរថយន្តហោះនេះកាលពី៥ឆ្នាំមុន។
ប្រសិនបើវាត្រូវបានគេដាក់ឱ្យដំណើរការតាមការគ្រោងទុកមែន នោះ Airlios អាចនឹងក្លាយជារថយន្តហោះដំបូងគេបង្អស់នៅអាស៊ីអាគ្នេយ៍។
កំណែស្តង់ដារនឹងមានតម្លៃប្រហែល $81,000 បើប្រៀបធៀបទៅនឹង $92,000 សម្រាប់ម៉ាក Jetson របស់ស៊ុយអែត។
Airlios ក៏នឹងត្រូវផ្តល់ជូនម៉ូដែលផ្សេងទៀតដែលមានតម្លៃរហូតដល់ 99,000 ដុល្លារ។
សូមរំលឹកថា ការចាប់ផ្តើមអាជីវកម្មជាច្រើននៅក្នុងប្រទេសមួយចំនួនបានចាប់ផ្តើមធ្វើការលើរថយន្តហោះនេះដែរ បើទោះបីជាមានការបើកដំណើរការពាណិជ្ជកម្មតិចតួចក៏ដោយ។ជាក់ស្តែងសិង្ហបុរី ម៉ាឡេស៊ី និងឥណ្ឌូណេស៊ី ក៏គ្រោងនឹងបើកដំណើរការសេវាកម្មតាក់ស៊ីហោះហើរនាពេលអនាគតផងដែរ៕
