ព្រះសីហនុ៖BNI Cambodia នៅទីបំផុត បានមកដល់ខេត្តព្រះសីហនុហើយ។ជាមួយការបង្កើតChapterថ្មី «Blue Sea (សមុទ្រខៀវ)» BNI ប្រចាំខេត្តព្រះសីហនុបានត្រូវអ្នកជំនាញអះអាងថា នឹងជួយសមាជិកម្ចាស់អាជីវកម្ម ឱ្យមានការរីកចម្រើន ការពង្រីកនិងអភិវឌ្ឍខ្លួន ទទួលបានឱកាសអាជីវកម្ម ការភ្ជាប់ទំនាក់ទំងនិងបណ្តាញ និងការចែករម្លែកការងារ ព្រមទាំងការជួយគ្នាទៅវិញទៅមក។
កាលពីថ្ងៃទី៣១ខែតុលាឆ្នាំ២០២២មានការប្រកាសBNIនៅខេត្តព្រះសីហនុដោយលោក ឡុកស្មីត សាមឌី ស្ថាបនិកBNI Cambodia ។ ពិធីប្រកាសនិងជជែកពិភាក្សានេះមានការចូលរួមពីសមាជិកចាស់និងសមាជិកថ្មី អ្នកមកស្វែងយល់ពីBNI នៅភោជនីយដ្ឋាន SEA .1 ដែលស្ថិតនៅតាមបណ្តោយឆ្នេរអូរឈើទាល។
លោក ឡុកស្មិត សាមឌី ដែលជាអ្នកនាំប្រែននែម BNI ពីសហរដ្ឋអាមេរិកមកកម្ពុជា បានមានប្រសាសន៍ថា៖ម្ចាស់អាជីវកម្មនៅខេត្តព្រះសីហនុកំពុងត្រូវការការពង្រីកអាជីវកម្ម ត្រូវការទំនាក់ទំនងបណ្ដាញអាជីវកម្ម និងឱកាសអាជីវកម្ម។ដោយមើលឃើញដូច្នេះហើយបានជាលោកសម្រេចចិត្តនាំBNI មកខេត្តព្រះសីហនុដើម្បីជួយពួកគាត់។
លោកបានបន្ថែមថា៖ខេត្តព្រះសីហនុជាខេត្តមួយមានសក្តានុពលជាប៉ូលសេដ្ឋកិច្ចដ៏សំខាន់ដែលក្នុងនោះមានដូចជាផ្លូវល្បឿនលឿន តំបន់ទេសចរណ៍ កំពង់ផែ មានអ្នកវិនិយោគច្រើន ហើយអាជីវកម្ម ក៏មានច្រើន។ការចូលជាសមាជិក BNIមានន័យថាសមាជិកនឺងមានការរីកចម្រើនលើវិស័យអាជីវកម្មរបស់ខ្លួន មានបណ្ដាញអាជីវកម្ម កើនចំណូល បង្កើតការងារ ជាពិសេសបង្កើតជាចរន្តGDPនៅកំពង់សោមតែម្ដង។
ក្នុងពេលពន្យល់និងបង្ហាញទៅដល់សមាជិកថ្មី លោក សាមឌី បានលើកឡើងនូវ ៦ចំណុចសំខាន់ៗរបស់BNI៖ទី១៖-មានក្រុមលក់និងទីផ្សារដ៏ធំមួយ។ទី២-សិទ្ធិផ្ដាច់មុខអាជីវកម្មនៅក្នុងក្រុម។ ទី៣ -ប្រភពអាជីវកម្មនិងអតិថិជនថ្មីៗមិនចេះរីស្ងួត។ទី៤-ការបណ្ដុះបណ្ដាលនិងការអប់រំ ទី៥-ទំនាក់ទំនងអាជីវកម្មយូរអង្វែងនិងទី៦-ពង្រីកអាជីវកម្មក្នុងនិងក្រៅប្រទេស។នៅកម្ពុជាមានសមាជិកជិត២០០០នាក់។១២ខែ ចុងក្រោយ BNI បានបង្កើតចំណូល៨៨លានដុល្លារហើយរយៈពេល៣ ខែចុងក្រោយជាង៣០លានដុល្លារ។
លោក ភួន វីរៈ ជាម្ចាស់ក្រុមហ៊ុន Power Vision Energy Co.,Ltd ដែលនាំចូលសម្ភារៈអគ្គិសនីពីក្រៅប្រទេស និងជាអគ្គនាយកBNI ប្រចាំតំបន់ក្រុងព្រះសីហនុ បានថ្លែងឱ្យដឹងថា ៖ចាប់ពីថ្ងៃទី១០ ខែតុលាឆ្នាំ២០២២ លោកបានទិញហ្វ្រេនឆាយប៊ីអិនអាយមកផ្សព្វផ្សាយ នៅខេត្តព្រះសីហនុ។មូលហេតុដែលលោកបង្កើតBNIនៅខេត្តព្រះសីហនុគឺដើម្បីជួយម្ចាស់អាជីវកម្មឲ្យស្គាល់គ្នា ជួយអាជីវកម្មឲ្យរីកចម្រើន ចេះស្រឡាញ់គ្នា ចេះជួយគ្នានិងដើម្បីកុំឲ្យម្ចាស់ជីវកម្មនៅកំពង់សោមឯកោដែលពួកគាត់អាចចូលមកតុចរចានិយាយគ្នាជជែកគ្នានិងធ្វើឲ្យអាជីវកម្មរីកចម្រើន។ជាពិសេសជួយបង្កើតបណ្តាញនៅទូទាំងខេត្តព្រះសីហនុ។ជាងនេះទៅទៀតជួយម្ចាស់អាជីវកម្មឲ្យមានការរីកចម្រើន អភិវឌ្ឍន៍ខ្លួនចែករំលែកបទពិសោធន៍ចំណេះដឹងសមត្ថភាពធនធានមនុស្ស។ ក៏ដូចជាចូលរួមចំណែកអភិវឌ្ឍន៍សេដ្ឋកិច្ចកម្ពុជា។
លោកបានបន្ថែមថា៖ម្ចាស់អាជីវកម្ម៧០% បានចូលជាសមាជិកBNI នៅខេត្តព្រះសីហនុនិង៣០%កំពុងស្វែងរកនិងចាប់អារម្មណ៍ចង់ចូលរួម។សមាជិកថ្មីជាម្ចាស់អាជីវកម្មដូចជាកញ្ចក់,លក់ឡាន,ហ្គារាសឡាន,លក់ហ្គាស,ធនាគារ,ធានារ៉ាប់រង,មេធាវី,ខាងប្រកាសពន្ធនិងផ្នែកផ្សព្វផ្សាយ។
លោកបានបន្ថែមថា៖ពួកគាត់ចូលរួមដោយសារឃើញយុទ្ធសាស្ត្ររបស់ប៊ីអិនអាយល្អមានបណ្ដាញច្រើនរៀនសូត្រនិងទទួលការបណ្ដុះបណ្ដាលមិនគិតលុយហើយម្ចាស់អាជីវកម្មអាចមកចែករំលែកបទពិសោធន៍ ផ្ដល់អាជីវកម្មឲ្យគ្នាទៅវិញទៅមកនិងមានទំនាក់ទំនងទាំងក្នុងនិងក្រៅប្រទេស។BNI មានសមាជិក៣០៨ប្រទេសនិងមានសមាជិកជាង ៣០ម៉ឺននាក់។
លោក ភួន វីរៈ បានឱ្យដឹងថា៖BNI នៅខេត្តព្រះសីហនុមានឈ្មោះថា The Blue Sea ដែលមានន័យថាសមុទ្រខៀវ។លោករំពឹងថានឹងមានសមាជិកជាច្រើនទៀតចូលរួមក្នុងប៊ីអិនអាយនៅខេត្តព្រះសីហនុនេះ។
ចំណែក លោក សៅ ហុក ជា Executive Director នៅខេត្តព្រះសីហនុលោកជាម្ចាស់ភោជនីយដ្ឋាន SEA 1 នៅខេត្តព្រះសីហនុ នេះបានប្រាប់CFNថាការជួបប្រជុំគ្នានេះមានគោលបំណងផ្សព្វផ្សាយឲ្យអាជីវករ,ពាណិជ្ជករ,ម្ចាស់អាជីវកម្ម,នៅខេត្តព្រះសីហនុបានស្វែងយល់ពី BNIនិងជម្រាបជូនដំណឹងថាBNIបានមកដល់ខេត្តព្រះសីហនុហើយ។គោលបំណងនិងមូលហេតុដែលបង្កើតប៊ីអិនអាយនៅខេត្តព្រះសីហនុគឺក្នុងគោលបំណងជួយម្ចាស់អាជីវកម្មនៅខេត្តព្រះសីហនុឲ្យមានទំនាក់ទំនង,មានបណ្ដាញនិងមានអាជីវកម្មរីកចម្រើនក៏ដូចជាទទួលបាននូវឱកាសអាជីវកម្មពីគ្នាទៅវិញទៅមក។
លោក អ៊ីវ សៅសារិន ជាម្ចាស់អាជីវកម្មហ្គារ៉ាសឡាននៅខេត្តព្រះសីហនុដែលទើបចាប់ផ្ដើមអាជីវកម្មថ្មី បានមានប្រសាសន៍ថាលោកចាប់អារម្មណ៍ចង់ស្គាល់ BNI ហើយបានមកស្វែងយល់ពីសារៈប្រយោជន៍ក្នុងការក្លាយជាសមាជិកព្រោះប៊ីអិនអាយជាបណ្ដាញមួយបណ្ដុំទៅដោយ ម្ចាស់អាជីវកម្មជាច្រើនដែលមានអាជីវកម្មគ្រប់ប្រភេទ។តាមរយៈការស្វែងយល់នេះនឹងជួយឲ្យអាជីវកម្មរបស់យើងរីកចម្រើននិងបានផ្លាស់ប្ដូរអាជីវកម្មផ្ដល់ការងារឲ្យគ្នាទៅវិញទៅមក។ការចូលជាសមាជិកមានប្រយោជន៍សម្រាប់អាជីវកម្មរបស់យើងហើយយើងអាចអភិវឌ្ឍន៍ខ្លួននិងទទួលបានឱកាសនិងផលអាជីវកម្ម។
លោកកែវ វណ្ណាតារា ជានាយកគម្រោងនៃក្រុមហ៊ុនសាងសង់ HRC បានចូលជាសមាជិកBNI ដោយសារផ្អែកលើមូលដ្ឋានគ្រឹះទាំង៦ចំណុចរបស់BNI ដែលបានចែករំលែកដោយលោកឡុកស្មីត សាមឌី ស្ថាបនិក BNI Cambodia។ចំណុចទាំងប្រាំមួយនេះមានសក្តានុពលល្អទាំងទ្រឹស្ដីនិងការអនុវត្តជាក់ស្ដែង។វាមានវិសាលភាពនិងប្រសិទ្ធភាពល្អមានភាពងាយស្រួលច្រើនពេលចូលជាសមាជិកដែលយើងអាចពង្រីកខ្លួនកាន់តែធំ។
លោក វណ្ណាតារា បានលើកឡើងថាកន្លងមកយើងពិបាកណាស់ចង់ឲ្យអាជីវកម្មរបស់យើងមួយមានគេស្គាល់ ពិបាកក្នុងការចង់ឲ្យគេជឿទុកចិត្តតែបើបានចូលជាសមាជិកBNI ដែលជាកន្លែងប្រមូលផ្ដុំសហគ្រិននោះ យើងទទួលបានការចែករំលែកការងារនិងអាជីវកម្ម ។
ចំណុចដែលលោកចាប់អារម្មណ៍ហើយគិតថាមានសក្កានុពលទីមួយការក្លាយជាសមាជិកអាចពង្រីកខ្លួនបានតាមរយៈសមាជិក ទី២ឱកាសទទួលបានការហ្វឹកហាត់បន្ថែម ទី៣ការចែករំលែកអាជីវកម្មគ្នាទៅវិញទៅមក។លោករំពឹងថាក្រុមហ៊ុនរបស់លោកនឹងទទួលបានភាពរីកចម្រើននិងផលចំណេញ៕ដោយៈសិរីមតី
