លេចធ្លាយរបាយការណ៍ប្រធានាធិបតីចូបៃដិន ដំឡើងសំឡេងរាងធ្ងន់ដាក់ហ្សេឡិនស្គីអ៊ុយក្រែនតាមការហៅទូរសព្ទកាលពីខែមិថុនា ទាក់ទងរឿងសុំជំនួយយោធាបន្ថែម។
![](https://cambodiaflashnews.com/wp-content/uploads/2021/06/top-banner.gif)
យោងតាមសារព័ត៌មាន NBC ចុះផ្សាយនៅថ្ងៃចន្ទសប្តាហ៍នេះបានឲ្យដឹងពីបុគ្គលចំនួនបួននាក់បានប្រាប់ក្នុងលក្ខខណ្ឌមិនបញ្ចេញឈ្មោះថា ការហៅទូរសព្ទរវាងប្រធានាធិបតីអាម៉េរិកចូបៃដិន និងអ៊ុយក្រែនហ្សេឡិនស្គី កាលពីខែមិថុនាកន្លងទៅ ហាក់មានភាពខុសប្លែកនឹងរាល់ដង ចាប់តាំងពីសង្រ្គាមបានចាប់ផ្តើម។ ប្រភពទាំងនេះបានបន្តថា លោកបៃដិន ហាក់ដូចជាបានដំឡើងសំឡេងរាងឮ និងធ្ងន់បន្តិចដាក់ហ្សេឡិនស្គី បន្ទាប់ពីហ្សេឡិនស្គីបាននិយាយស្នើដដែលៗអំពីតម្រូវការដទៃទៀតរបស់ខ្លួន។ បៃដិនបានពោលយ៉ាងដូច្នេះថា “ប្រជាជនអាម៉េរិកមានចិត្តសប្បុរសណាស់ ហើយរដ្ឋបាលរបស់លោក និងយោធាអាម៉េរិកទាំងអស់សុទ្ធតែកំពុងធ្វើការយ៉ាងខ្លាំងដើម្បីជួយដល់អ៊ុយក្រែនហើយ”។ លោកបន្តថា “ទីក្រុងកៀវគួរតែដឹងគុណសម្រាប់ជំនួយបន្ថែមទៀត” ខណៈដែលរដ្ឋបាលទើបតែបានផ្តល់ជូនជំនួយចំនួន ១ ពាន់លានដុល្លារក្នុងជំនួយយោធាសម្រាប់អ៊ុយក្រែន។
យ៉ាងណាក៏ដោយ ទីក្រុងកៀវក្រោយមកត្រូវបានគេដឹងថា ព្យាយាមយ៉ាងខ្លាំងដើម្បីលុបបំបាត់ភាពតានតឹងនេះ។ ហ្សេឡិនស្គី បានចេញសារថ្លែងអំណរគុណច្រើនដងជាសាធារណៈទៅកាន់អាម៉េរិកសម្រាប់ជំនួយដ៏លើសលប់រហូតដល់បៃដិនត្រជាក់ចិត្ត ខណៈដែលមន្រ្តីទីប្រឹក្សាអ៊ុយក្រែនបានគូសបញ្ជាក់ថា ភាពរកាំរកូសជាមួយបៃដិន នឹងមិនហុចផលល្អឡើយ៕
ប្រភព៖ NBC NEWS
ប្រភពរូប៖NBC NEWS
ប្រែសម្រួល៖សុខ តុលា