ភ្នាក់ងាររបស់ខ្សែបម្រើ Paul Pogba បានបញ្ជាក់ថា កីឡាករសញ្ជាតិបារាំងរូបនេះ នឹងមិនជាសះស្បើយពីរបួសចុងក្រោយបង្អស់របស់ខ្លួន ទាន់ពេលវេលា សម្រាប់ព្រឹត្តិការណ៍ World Cup 2022 នាចុងខែនេះ នៅប្រទេសកាតានោះទេ។
កីឡាកររបស់ក្រុមសេះបង្កង់ Juventus បានរងរបួសជង្គង់ កាលពីដើមរដូវក្តៅនេះ ហើយមិនទាន់បានបង្ហាញខ្លួនជាលើកទី ២ សម្រាប់ក្លិបថ្មីរបស់ខ្លួននៅឡើយទេ។ គេរំពឹងថា រូបគេនឹងត្រឡប់មកវិញ ក្នុងពេលឆាប់ៗនេះ ប៉ុន្តែរបួសភ្លៅ ដែលបានមានក្នុងពេលហ្វឹកហាត់ បានពន្យារពេលការវិលមកមានកាន់ទីលានរបស់គេម្តងទៀត។
ឥឡូវនេះ ដោយបាននិយាយទៅកាន់អង្គភាពព័ត៌មាន Telefoot ភ្នាក់ងារ គឺលោកស្រី Rafaela Pimenta បានបញ្ជាក់ថា កីឡាករ Pogba នឹងមិនអាចវិលត្រឡប់មកឱ្យទាន់ពេល សម្រាប់ World Cup ទេ។
លោកស្រីបានប្រាប់ថា៖ «Paul ចង់វិលត្រឡប់មកវិញឱ្យបានឆាប់តាមដែលអាចធ្វើទៅបាន ប៉ុន្តែគាត់ត្រូវតែអត់ធ្មត់ ប្រឹងប្រែងយ៉ាងខ្លាំង ក្នុងគ្រាដ៏លំបាកទាំងនេះ ហើយប្រឹងធ្វើគ្រប់យ៉ាងឱ្យអស់ពីលទ្ធភាព ដើម្បីបានវិលមកទីលានវិញ សម្រាប់អ្នកគាំទ្រ និងក្រុមរបស់គេឱ្យបានឆាប់តាមដែលអាចធ្វើទៅបាន»។
លោកស្រី Pimenta បានអះអាងទៀតថា កីឡាករ Pogba នឹងត្រូវការពេលវេលាបន្ថែមទៀត ដើម្បីបានជាសះស្បើយពីរបួសភ្លៅ ដែលត្រូវបានគេរំពឹងថា នឹងនាំឱ្យកីឡាករវ័យ ២៩ឆ្នាំរូបនេះ អវត្តមានរយៈពេល ៣សប្តាហ៍បន្ថែមទៀត៕
