ភ្នំពេញ៖បុរសម្នាក់ជិះម៉ូតូបុកអ្នកកំពុងធ្វើចរាចររថយន្តចេញពីហាងបណ្តាលឱ្យរងរបួសធ្ងន់ទាំង២នាក់ ត្រូវបានរថយន្តអង្គភាព៧១១ ដឹកយកទៅសង្គ្រោះបន្ទាន់។
គ្រោះថ្នាក់ចរាចរនេះបានកើតឡើងនៅផ្លូវជាតិលេខ៣ ខាងមុខបុរី ជារី ស្ថិតក្នុងភូមិព្រៃព្រីងខាងត្បូង១ សង្កាត់ចោមចៅទី២ ខណ្ឌពោធិ៍សែនជ័យ កាលពីរំលងអធ្រាត្រឈានចូលថ្ងៃទី១ ខែវិច្ឆិកា។
សមត្ថកិច្ចបានឱ្យដឹងថា បុរសរងគ្រោះមិនទាន់អត្តសញ្ញាណនៅឡើយទេ។ចំណែកម៉ូតូដែលបើកបុកម៉ាកហុងដា ZOOMER ផ្លាកលេខភ្នំពេញ1GD-1514 អ្នកបើកបរក៏មិនទាន់ស្គាល់អត្តសញ្ញាណដែរ ព្រោះពួកគេត្រូវដឹកទៅមន្ទីរពេទ្យ ។
មុនកើតហេតុ មានបុរសម្នាក់កំពុងធ្វើបញ្ជាឱ្យរថយន្តនៅហាងមួយថយក្រោយ។ពេលនោះស្រាប់តែមានម៉ូតូបើកពីត្បូងទៅជើងក្នុងល្បឿនលឿនទៅបុកជនរងគ្រោះពេញទំហឹង បណ្តាលឱ្យរងរបួសរយះក្បាលហូរឈាមសន្លប់ឈឹង។រីឯខាងម៉ូតូក៏រងរបួសធ្ងន់ដែរ។បន្ទាប់ពីមានគ្រោះថ្នាក់ភ្លាម ត្រូវបានរថយន្តអង្គភាព៧១១ ដឹកទៅមន្ទីរពេទ្យព្រះកុសុមៈទាំង២នាក់ដើម្បីជួយសង្គ្រោះ៕ដោយ៖វិចិត្រ
