ក្លិប Barcelona បានបញ្ជាក់ថា កីឡាករ Jules Kounde និង Eric Garcia មានបញ្ហាភ្លៅ និងត្រគាករៀងៗខ្លួន ក្នុងការប្រកួតនៅក្របខ័ណ្ឌ La Liga ដែលក្រុមអ្នកមានបុណ្យ មានជ័យជម្នះ ១-០ លើក្រុមម្ចាស់ផ្ទះ Valencia កាលពីថ្ងៃអាទិត្យ។
ខ្សែការពារកណ្តាលទាំង ២នាក់ មិនអាចលេងពេញម៉ោងបានទេ ក្នុងការប្រកួតនេះ ដោយកីឡាករ Garcia បានដូរចេញនៅនាទីទី៤២ ហើយកីឡាករ Kounde នាទីទី៧៤។
កីឡាករ Kounde ដែលត្រូវបានទិញពីក្លិប Sevilla ក្នុងតម្លៃដ៏ថ្លៃនោះ បានចាប់ផ្តើមអាជីព ជាមួយក្រុម Barca ទាំងទ្រេតទ្រោត ដោយរូបគេទើបតែបានវិលមកកាន់ទីលានវិញ កាលពីថ្ងៃទី១៦ ខែតុលា ក្រោយជាពីរបួសសរសៃពួរ ដែលបានកើតមានពេលបំពេញកាតព្វកិច្ចអន្តរជាតិជាមួយក្រុមជម្រើសជាតិបារាំង ក្នុងខែកញ្ញា។
ក្លិប Barca បានប្រកាសឱ្យដឹងកាលកាលពីថ្ងៃអាទិត្យថា កីឡាករ Kounde មានបញ្ហារបួសភ្លៅខាងឆ្វេង ខណៈដែលខ្សែការពារអេស្ប៉ាញ Garcia ដែលនឹងសង្ឃឹមថា មានរាងកាយរឹងប៉ឹងវិញនៅមុនព្រឹត្តិការណ៍ World Cup នោះ មានបញ្ហាត្រគាកខាងឆ្វេងរបស់គេ។
មិនមានការកំណត់ពេលវេលាណាមួយ ដែលត្រូវបានបញ្ជាក់ឱ្យដឹងពីការត្រឡប់មកវិញ របស់កីឡាករទាំង ២រូបនោះទេ ទោះបីជាក្លិបបានបំភ្លឺថា បញ្ហារបួសពួកគេ គឺមិនជាធ្ងន់ធ្ងរក៏ដោយ ដោយលើកឡើងថា ពួកគេមានរបួសតិចតួចប៉ុណ្ណោះ។
តែយ៉ាងណាក្ដី កីឡាករទាំង ២រូប នឹងមិនមានវត្តមានក្នុងជំនួបទល់នឹងក្រុម Viktoria Plzen សម្រាប់ការប្រកួតចុងក្រោយនៃក្របខ័ណ្ឌ Champions League របស់ក្រុម Barca នៅយប់ថ្ងៃអង្គារនេះទេ៕
