ភ្នំពេញ៖ នៅក្នុងព្រឹត្តិការណ៍រាត្រីសមោសរជួបជុំម្ចាស់អាជីវកម្មកម្ពុជា CEO Award 2022 កាលពីល្ងាច ថ្ងៃទី ២៩ ខែ តុលា ឆ្នាំ២០២២ កន្លងទៅនេះម្ចាស់ពានកិត្តិយស“ស្ថាបនិកឆ្នើម Best Founder Award “ កាលពីឆ្នាំ២០១៩ លោកគ្រូធំ អោម សេងបូរ៉ា ស្ថាបនិក CEO Master Club ត្រូវបានថ្នាក់ដឹកនាំជាន់ខ្ពស់នៃរាជរដ្ឋាភិបាលកម្ពុជា ឯកឧត្តមបណ្ឌិតហ៊ុន ម៉ាណែត បេក្ខភាពអនាគតនាយករដ្ឋមន្ត្រីនៃព្រះជាណាចក្រកម្ពុជា ផ្តល់ជូននូវពានកិត្តិយសដ៏ឧត្តុង្គឧត្តមមួយថ្មីថែមទៀតគឺ“ពានកិត្តិយសលោកគ្រូធំឆ្នើម Best Guru Award“។នេះជាពានកិត្តិយសដំបូងគេបំផុតនៅកម្ពុជាដើម្បីជាការទទួលស្គាល់និងឱ្យតម្លៃខ្ពស់ដល់ទេពកោសល្យក្នុងការបណ្តុះបណ្តាលបច្ចេកទេសគរុកោសល្យក្នុងការបណ្តុះបណ្តាលភាពច្នៃប្រឌិតក្នុងការបណ្តុះបណ្តាល ការប្តេជ្ញាចិត្ត និង ពលីកម្ ក្នុងការបណ្តុះបណ្តាល ជាពិសេសស្នាដៃដ៏ធំធេងរបស់លោកគ្រូនាពេលកន្លងមកក្នុងបេសកកម្មបង្វឹកបណ្តុះបណ្តាលធនធានមនុស្ស និងម្ចាស់អាជីវកម្មកម្ពុជា រាប់ម៉ឺននាក់ទាំងក្នុងនិងក្រៅប្រទេស ឱ្យក្លាយជាអ្នកដឹកនាំឆ្នើមជាសហគ្រិនឆ្នើម និងជាមូលធនមនុស្សដ៏សំខាន់របស់កម្ពុជាដោយមានការគោរព ស្រលាញ់ ពេញចិត្ត និងគាំទ្រជាខ្លាំងពីសំណាក់ សមាជិក សិស្ស និស្សិត សិក្ខាកាម ដែលបានចូលរួមកម្មវិធីបណ្តុះបណ្តាល របស់ CEO Master Club និងវិទ្យាស្ថានស៊ីអ៊ីអូ នាពេលកន្លងមក។
យោងតាមសេចក្តីថ្លែងរបស់លោកគ្រូធំ អោម សេងបូរ៉ា នៅក្នុងព្រឹត្តិការណ៍រាត្រីសមោសរជួបជុំម្ចាស់អាជីវកម្មកម្ពុជាCEO Award 2022 បានបង្ហាញថា CEO Master Clubគឺជាក្លឹបបណ្តុំម្ចាស់អាជីវកម្មដ៏ធំមួយនៅក្នុងព្រះរាជាណាចក្រកម្ពុជាដែលមានទស្សនៈវិស័យចង់ឃើញប្រទេសកម្ពុជាក្លាយជាប្រទេសអ្នកមានបានឆាប់រហ័ស តាមរយៈការបង្វឹក និងជួយជ្រោមជ្រែងម្ចាស់អាជីវកម្មកម្ពុជាពេញមួយជីវិតឱ្យមានសមត្ថភាពបម្លែងការដឹកនាំគ្រប់គ្រងចាត់ចែងអាជីវកម្មរបស់ខ្លួនពីតូចទៅធំ ពីលក្ខណៈហេងស៊យ ឬលក្ខណៈគ្រួសារ ទៅជាលក្ខណៈស្ដង់ដារ ហើយមានសក្តានុពលអាចពង្រីកអាជីវកម្មរបស់ខ្លួនទៅទូទាំងប្រទេសបាន ក៏ដូចជាពង្រីកខ្លួនទៅកាន់ពិភពលោកបានផងដែរ។
តាមរយៈការជួយជ្រោមជ្រែងម្ចាស់អាជីវកម្មឱ្យទទួលបានជោគជ័យ គឺជាការជួយដល់សេដ្ឋកិច្ចជាតិរបស់កម្ពុជា ឱ្យមានភាពរីកចម្រើន និងរឹងមាំបានឆាប់រហ័ស ព្រោះពួកគាត់ បានចូលរួមចំណែក បង្កើតផលិតផលសេវាកម្មដែលជាតម្រូវការរបស់សង្គមបានច្រើន បង្កើតការងារនិងប្រាក់ចំណូលជូនប្រជាពលរដ្ឋបានច្រើនបណ្តុះបណ្តាលធនធានមនុស្សនៅកន្លែងការងារជាក់ស្តែងបានច្រើន បង្កើនប្រាក់ចំណូលជូនរដ្ឋតាមរយៈការបង់ពន្ធបានច្រើន និងជាមូលដ្ឋានគ្រឹះសេដ្ឋកិច្ចក្នុងស្រុកដែលមិនអាចខ្វះបានគ្រប់កាលៈទេសៈទាំងអស់។ “សហគ្រិនល្អគឺជាជនស្នេហាជាតិ” ពាក្យស្លោកនេះក៏ទទួលបានការគាំទ្រយ៉ាងពេញទំហឹងពីសំណាក់ពីឯកឧត្តមបណ្ឌិត ហ៊ុន ម៉ាណែត ផងដែរ។
ក្នុងរយៈពេល១៣ឆ្នាំកន្លងមកនេះ លោកគ្រូធំ អោម សេងបូរ៉ា បានបូជាទាំងពេលវេលា កម្លាំង កាយចិត្ត ប្រាជ្ញា ស្មារតី ដើម្បីបង្កើតកម្មវិធីបណ្តុះបណ្តាដែលមានលក្ខណៈពិសេសនិងមានភាពច្នៃប្រឌិតខ្ពស់ ដើម្បីជួយដល់អ្នកសិក្សាដែលមានកម្រិតសិក្សាខុសគ្នា តំណែងតួនាទីខុសគ្នា វ័យខុសគ្នា អាចរៀនជាមួយគ្នាបានប្រកបដោយភាពងាយស្រួលនិងប្រសិទ្ធភាពខ្ពស់។ លោកគ្រូធំ អោម សេងបូរ៉ា ពិតជាមានសេចក្តីពេញចិត្តរីករាយក្រៃលែងដែលលោកគ្រូបានឃើញសមាជិកពេញមួយជីវិតរបស់លោកមានភាពរីកចម្រើនសុខដុម្យរមនាទាំងនៅក្នុងភាពជាខ្លួនឯង ភាពជាគ្រួសារ ភាពជាស្ថាប័នអាជីវកម្ម ការពង្រីកទំនាក់ទំនងនៅក្នុងសង្គម ក៏ដូចជាការចូលរួមចំណែកកិច្ចការសង្គមនិងមនុស្សធម៌បានច្រើនជាងមុនផងដែរ។ លោកគ្រូក៏បានលើកឡើងផងដែរថា «ភាពជោគជ័យសមាជិកពេញមួយជីវិតរបស់ CEO Master Club គឺជាភាពជោគជ័យរបស់ CEO Master Club ទាំងមូលហើយវាក៏ជាភាពជោគជ័យក្នុងការចូលរួមចំណែកកសាងសេដ្ឋកិច្ចជាតិរបស់យើងឱ្យកាន់មានភាពល្អប្រសើរជាងមុនផងដែរ។
រហូតមកដល់ពេលនេះ CEO Master Club បានធ្វើការបណ្ដុះបណ្ដាលសហគ្រិនកម្ពុជាយើងបានចំនួនរាប់ម៉ឺននាក់ និងមានសមាជិកម្ចាស់អាជីវកម្មពេញមួយជីវិតចំនួន ១,៦១១នាក់ ទាំងនៅក្នុងនិងនៅក្រៅប្រទេសដែលពួកគាត់ទាំងអស់បានកាន់កាប់អាជីវកម្ម ប្រមាណ៣,០០០ក្រុមហ៊ុននិងបានចូលរួមបង្កើតប្រតិបត្តិការអាជីវកម្មជាទឹកប្រាក់ប្រមា៣,០០០លានដុល្លារក្នុង១ឆ្នាំ និងបានជួយបង្កើតការងាររកប្រាក់ចំណូលសម្រាប់ប្រជាពលរដ្ឋប្រមាណ ១៥ម៉ឺននាក់ទៀតផង។
ថ្លែងនៅក្នុងកម្មវិធីរាត្រីសមោសរជួបជុំម្ចាស់អាជីវកម្មកម្ពុជា CEO Award 2022 នៅសណ្ឋាគារសុខា រាជធានីភ្នំពេញ ឯកឧត្តម បណ្ឌិត ហ៊ុន ម៉ាណែត បានកោតសរសើរនិងវាយតម្លៃខ្ពស់ចំពោះសកម្មភាពចូលរួមចំណែកជាច្រើនរបស់CEO Master Club ដែលជាស្ថាប័នបណ្តុះបណ្តាលសហគ្រិនភាពដែលមានទស្សនវិស័យនិងបេសកកម្មប្រកបដោយគុណតម្លៃជាក់ស្តែងពោលគឺការកសាង និងការពង្រឹងសមត្ថភាព អ្នកដឹកនាំធុរកិច្ចក្នុងស្រុកឱ្យក្លាយជាអគ្គនាយកអាជីពប្រកបដោយចំណេះដឹង និងជំនាញច្បាស់លាស់ក្នុងការដឹកនាំ, គ្រប់គ្រង និងចាត់ចែងសា្ថប័នអាជីវកម្មពីតូចទៅធំ ពីលក្ខណៈគ្រួសារទៅស្តង់ដារអន្តរជាតិ ដោយធានាបាននូវវឌ្ឍនភាពអាជីវកម្មប្រសើររឹងមាំ និងលឿនឆ្ពោះទៅមុខព្រមជាមួយនឹងការជួយបង្កើនសេដ្ឋកិច្ចកម្ពុជា តាមរយៈការពង្រឹងភាពប្រកួតប្រជែងរបស់ក្រុមហ៊ុន-សហគ្រាសកម្ពុជានៅលើទីឆាកអន្តរជាតិ។
ឯកឧត្តមបណ្ឌិតក៏បានអបអរសាទរដល់ជ័យលាភី CEO Master Club ឆ្នាំ២០២២ ដែលបានខិតខំប្រឹងប្រែងកសាងសមត្ថភាពនិងការជួយជ្រោមជ្រែងគ្នាទៅវិញទៅមកប្រកបដោយសាមគ្គីភាព និងភាតរភាព ព្រមទាំងបានប្រើប្រាស់ និងអនុវត្តជាក់ស្តែងនូវចំណេះដឹង និងចំណេះធ្វើ ទទួលបានពីវគ្គបណ្តុះបណ្តាលនានារបស់ CEO Master Club សម្រាប់ការដឹកនាំ, គ្រប់គ្រង និងចាត់ចែងអាជីវកម្មរបស់ខ្លួន រហូតទទួលបាននូវវឌ្ឍនភាព, វិបុលភាព និងជោគជ័យដ៏គួរឱ្យកត់សម្គាល់។
បណ្ឌិត ហ៊ុន ម៉ាណែត បានលើកឡើងថា៖សហគ្រិនកម្ពុជាទាំងអស់ បានចូលរួមលើកស្ទួយកេរ្តិ៍ឈ្មោះរបស់ប្រទេសយើង តាមរយៈការភ្ជាប់ទំនាក់ទំនងជាមួយពាណិជ្ជករនិងវិនិយោគិនអន្តរជាតិ និងការបង្ហាញអំពីចំណុចវិជ្ជមានប្រកបដោយសក្តានុពលរបស់កម្ពុជា និង ការចូលរួមទាក់ទាញវិនិយោគទុនផ្ទាល់ពីបរទេសជាពិសេសការណែនាំឱ្យមិត្តបរទេសបានស្គាល់, គោរព, និង ផ្តល់តម្លៃចំពោះប្រទេសកម្ពុជា។ ទាំងនេះ គឺជាការចូលចំណែកមួយដ៏សំខាន់ក្នុងភាពជាដៃគូជាមួយរាជរដ្ឋាភិបាលនៅក្នុងបេសកកម្មនៃការនាំប្រទេសកម្ពុជាទៅកាន់ពិភពលោក, ការធ្វើឱ្យពិភពលោកស្គាល់ច្បាស់ពីកម្ពុជា និងការលើកកម្ពស់សហគ្រិនភាពកម្ពុជា ដើម្បីលើកស្ទួយកិត្យានុភាពជាតិ, ធានាបាននូវភាពប្រកួតប្រជែង,រក្សាបាននូវស្ថិរភាពម៉ាក្រូ និងជំរុញកំណើនសេដ្ឋកិច្ចជាតិនៅក្នុងកម្រិតតំបន់ និងសកល។
ឯកឧត្តមបណ្ឌិត បានគូសបញ្ជាក់ថា៖«សហគ្រាសអាជីវកម្ម គឺជាកោសិកាសំខាន់នៃវិស័យឯកជន ហើយវិស័យឯកជនជាកោសិកាសំខាន់នៃសេដ្ឋកិច្ចជាតិ។ ដូច្នេះគោលដៅសំខាន់នៃការលើកកម្ពស់សេដ្ឋកិច្ចជាតិ គឺការកាត់បន្ថយភាពក្រីក្ររបស់ប្រជាជន និងការអភិវឌ្ឍរីកចម្រើនប្រកបដោយសមធម៌ ដែលអាចធានាបាននូវលំនឹងស្ថិរភាពនៃសង្គមជាតិ។ ក្នុងនេះ មីក្រូសហគ្រាស សហគ្រាសធុនតូច និងមធ្យម គឺជាមូលដ្ឋានសំខាន់ ហើយគឺជាអាទិភាពចម្បងសម្រាប់ពង្រឹងការរីកចម្រើនបច្ចុប្បន្ន និងទៅអនាគត។ ដូច្នេះហើយការជួយជំរុញមីក្រូសហគ្រាស សហគ្រាសធុនតូច និងមធ្យម គឺជាគោលដៅអទិភាពក្នុងការបង្កើតការងារនិងកាត់បន្ថយភាពក្រីក្រ ដែលរាជរដ្ឋាភិបាលបាននិងកំពុងធ្វើ ហើយបន្តជំរុញជាប្រចាំ»។
សូមបញ្ជាក់ថាបុគ្គលឆ្នើម១០៤រូបទទួលបានពានជ័យលាភីMaster CEO Award(ពានស៊ីអ៊ីអូ ម៉ាស្ទ័រ),១៩រូបទទួលបានOutstanding Entrepreneur Medal(មេដាយសហគ្រិនឆ្នើម),០៣រូបទទួលបានពាន Outstanding Accounting Award (ពានគណនេយ្យឆ្នើម), ០៣រូប ទទួលបានពាន Best Ambassador Award, ១៤រូប ទទួលបានពាន Best Leader Award និង១១ រូប ទៀតទទួលបានពានជ័យលាភី Outstanding CEO Award (ពាន ស៊ីអ៊ីអូ ឆ្នើម)។
បើតាមលោកស្រីសូ សេរីវឌ្ឍនា អគ្គនាយិកានៃក្រុមហ៊ុន CEO Master Club បានឱ្យដឹងថា៖ពាននេះ គឺជាការទទួលស្គាល់ ការផ្តល់កិត្តយស ដល់កិច្ចខំប្រឹងប្រែង របស់ម្ចាស់អាជីវកម្មដែលជាសមាជិក CEO Master Clubពេញមួយជីវិតបានវិយោគលើការរៀនសូត្រឲ្យតម្លៃលើចំណេះដឹង ចំណេះធ្វើ អនុវត្តជាក់ស្ដែង យកក្បួន ដែលបានរៀនទៅ ធ្វើផ្ទាល់នៅក្នុងអាជីវកម្មរបស់ខ្លួន ដែលក្នុងនោះមានចំនួន១២ វគ្គគឺ ៖១.ជំនាញភាពជាអ្នកដឹកនាំឆ្ពោះទៅរកជោគជ័យកម្រិតកំពូល,២.ជំនាញគ្រប់គ្រងនិងចាត់ចែងស្ថាប័នសម្រាប់ម្ចាសអាជីវកម្ម,៣.ជំនាញគ្រប់គ្រងធនធានមនុស្សសម្រាប់ម្ចាស់អាជីវកម្ម,៤.សិល្បៈនិងចិត្តសាស្ត្រនិយាយសម្រាប់អ្នកដឹកនាំ,៥.ជំនាញអភិបាលកិច្ចអាជីវកម្មស្ដង់ដារនិងការវិនិយោគ,៦.វិធីសាស្ត្រកសាងកេរ្តិ៍ឈ្មោះអាជីវកម្មឲ្យល្បីនិងបង្កើនការលក់ដល់កម្រិតកំពូលសម្រាប់សតវត្សទី២១,៧.ជំនាញគណនេយ្យដើម្បីគ្រប់គ្រងអាជីវកម្មបានច្រើន,៨.វិធីសាស្ត្រការពារការលួចបន្លំទ្រព្យសម្បត្តិក្រុមហ៊ុន,៩.ជំនាញគ្រប់គ្រងហិរញ្ញវត្ថុសម្រាប់ម្ចាស់អាជីវកម្ម,១០.ជំនាញរៀបចំផែនការអាជីវកម្មសម្រាប់ម្ចាស់អាជីវកម្ម,១១.ជំនាញបង្កើតគោលការណ៍និងនិតិវិធីសម្រាប់ម្ចាស់អាជីវកម្មនិង១២.ជំនាញច្បាប់ និងពន្ធដារសម្រាប់ម្ចាស់អាជីវកម្ម។
គួរជម្រាបថា កម្មវិធីរាត្រីសមោសរជួបជុំម្ចាស់អាជីវកម្មកម្ពុជា CEO Award 2022 មានការចូលរួមពីសំណាក់ ឯកឧត្តម ហ៊ុន ម៉ានី ប្រធាន សហភាពសហព័ន្ធយុវជនកម្ពុជា ឯកឧត្តម កើត រិទ្ធិ រដ្ឋមន្ត្រី នៃក្រសួងយុត្តិធម៌,ឯកឧត្តម ឃួង ស្រេង អភិបាល គណៈអភិបាលរាជធានីភ្នំពេញ,ឯកឧត្តម ហេង សួរ រដ្ឋលេខាធិការ ក្រសួងការងារនិងបណ្តុះ បណ្តាលវិជ្ជាជីវៈ,ឯកឧត្តម ម៉ឹង ពន្លក អគ្គនាយករងនៃអគ្គនាយកដ្ឋានភស្ដុភារ ហរិញ្ញវត្ថុ ក្រសួងការពារជាតិ,ឯកឧត្តម នួន ផារ័ត្ន អភិបាលរង គណៈអភិបាលរាជធានីភ្នំពេញ និងលោកតា ម៉ក់ ហឺន និងភរិយា៕ដោយៈសិរីមតី
