ភ្នំពេញ៖គិតត្រឹមត្រីមាសទី៣ ឆ្នាំ២០២២ គ្រឹះស្ថានមីក្រូហិរញ្ញវត្ថុទទួលប្រាក់បញ្ញើជាង៤,៧ពាន់លានដុល្លារពីអតិថិជនប្រមាណជា ២,៦ លាននាក់ហើយរំពឹងថាចំនួនប្រាក់បញ្ញើនេះនឹងបន្តកើនឡើង។នេះបើតាមការបញ្ជាក់របស់លោក សុខ វឿន ប្រធានក្រុម ប្រឹក្សាភិបាល នៃសមាគមមីក្រូហិរញ្ញវត្ថុកម្ពុជា។
ក្នុងសិក្ខាសាលាផ្សព្វផ្សាយស្តីពីទិវាសន្សំអាស៊ានឆ្នាំ២០២២ក្រោមប្រធានបទ«សន្សំតិចប្រសើរជាងមិនបានសន្សំ»ដែលប្រារព្ធធ្វើ ឡើង នៅខេត្តសៀមរាប នាថ្ងៃទី៣១ ខែតុលា ឆ្នាំ២០២២ លោក សុខ វឿន បានឱ្យដឹងថា សមាគម មានគោលដៅធានាឱ្យបានថាប្រជាជនកម្ពុជាគ្រប់រូបទទួល បាននូវសេវាហិរញ្ញវត្ថុផ្លូវការ ប្រកបដោយភាពសំបូរបែប ទាន់ពេលវេលា តាមរយៈប្រព័ន្ធហិរញ្ញវត្ថុ ប្រកបដោយនិរន្តរភាព ហើយសមាគមតែងតែបាន លើកទឹកចិត្តដល់សមាជិក របស់ខ្លួនទាំងអស់ក្នុងការលើកកម្ពស់ចំណេះដឹងហិរញ្ញវត្ថុក៏ដូចជាការសន្សំប្រាក់ ក្នុងចំណោមអតិថិជន និងសាធារណៈជនផងដែរ។
លោក បានបញ្ជាក់ថា «គិតត្រឹមត្រីមាសទី៣ ឆ្នាំ២០២២នេះ គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើទាំង៥ បានទទួលប្រាក់បញ្ញើសរុបចំនួនជាង ៤,៧ពាន់លានដុល្លារអាមេរិក ពីអតិថិជនប្រមាណ ២,៦លាននាក់ ហើយយើងរំពឹងថា ចំនួនប្រាក់បញ្ញើនេះ ក៏នឹងបន្តកើនឡើងជាលំដាប់ តាមរយៈសេវាកម្មដែលមានភាពច្នៃប្រឌិត និងងាយស្រួលដល់ ប្រជាពលរដ្ឋក្នុងការប្រើប្រាស់»៕
