ភ្នំពេញ៖ឯកឧត្តម បណ្ឌិត ហ៊ុន ម៉ាណែត ក្នុងកម្មវិធីរាត្រីសមោសរជួបជុំម្ចាស់អាជីវកម្មកម្ពុជា CEO Award 2022 នៅសណ្ឋាគារសុខា រាជធានីភ្នំពេញ នៅថ្ងៃទី២៩ ខែតុលាឆ្នាំ២០២២ បានថ្លែងថា៖« សហគ្រាសអាជីវកម្មគឺជាកោសិកាសំខាន់នៃវិស័យឯកជនហើយវិស័យ ឯកជនជាកោសិកាសំខាន់នៃសេដ្ឋកិច្ចជាតិ។ ដូច្នេះគោលដៅសំខាន់នៃការលើកកម្ពស់សេដ្ឋកិច្ចជាតិ គឺការកាត់បន្ថយភាពក្រីក្ររបស់ប្រជាជន និងការអភិវឌ្ឍរីកចម្រើនប្រកបដោយសមធម៌ ដែលអាចធានាបាននូវលំនឹងស្ថិរភាពនៃសង្គមជាតិ»។
ឯកឧត្តម បណ្ឌិត បានបន្តថា៖មីក្រូសហគ្រាស សហគ្រាសធុនតូច និងមធ្យម គឺជាមូលដ្ឋានសំខាន់ ហើយគឺជាអាទិភាពចម្បងសម្រាប់ពង្រឹងការរីកចម្រើនបច្ចុប្បន្ន និងទៅអនាគត។ ដូច្នេះហើយ ការជួយជំរុញមីក្រូសហគ្រាស សហគ្រាសធុនតូច និងមធ្យម គឺជាគោលដៅអទិភាពក្នុងការបង្កើតការងារ និងកាត់បន្ថយភាពក្រីក្រ ដែលរាជរដ្ឋាភិបាលបាននិងកំពុងធ្វើ ហើយបន្តជំរុញជាប្រចាំ។
ឯកឧត្តមបណ្ឌិត បានថ្លែងទៀតថា៖ការពង្រឹងកំណើនសេដ្ឋកិច្ចជាតិឱ្យបានរីកចម្រើនប្រកបដោយចីរភាព ភាពធន់និងនិរន្តភាពគឺ ទាមទារឱ្យមានការចូលរួមមិនអាចខ្វះបានពីសហគ្រិនគ្រប់វិស័យដូចទស្សនៈរបស់លោកបណ្ឌិត អោម សេង បូរ៉ា ស្ថាបនិក CEO Master Club ដែលបានលើកឡើងថា៖សហគ្រិនគឺជាបុគ្គលស្នេហាជាតិដែលមានបេសកកម្មឧត្តុង្គឧត្តមក្នុងការកសាងនិងអភិវឌ្ឍជាតិលើគ្រប់វិស័យ តាមរយៈការចូលរួមផ្គត់ផ្គង់ផលិតផល និងសេវាកម្មសំដៅឆ្លើយតបទៅនឹងសេចក្តីត្រូវការរបស់សង្គម,ការបង្កើតការងារជូនប្រជាពលរដ្ឋនិងការកសាងធនធានមនុស្ស និង ការបង្កើនចំណូលថវិកាជាតិតាមរយៈការបង់ពន្ធជូនរដ្ឋ។
ឯកឧត្តម បណ្ឌិត ហ៊ុន ម៉ាណែត បានអំពាវនាវដល់សហគ្រិនសូមបន្តជឿទុកចិត្តលើរាជរដ្ឋាភិបាលក្នុងការជួយសហគ្រិនទាំងអស់តាមរយៈបង្កលក្ខណៈឱ្យមានបរិយាកាសប្រកួតប្រជែងនិងចូលរួមទាំងអស់គ្នាក្នុងទីផ្សាសេរីប្រកបដោយតម្លាភាពនិងទេពកោសល្យរៀងៗខ្លួន។ទន្ទឹមនឹងនេះរាជរដ្ឋាភិបាលក៏បន្តខិតខំប្រឹងប្រែងក្នុងការរិះរកគ្រប់មធ្យោបាក្នុងការសិក្សាស្រាវជ្រាវដើម្បីរៀបចំការតម្រង់ទិសជាក់លាក់ទាំងលើការពង្រឹងនិងអភិវឌ្ឍធនធានមនុស្សជាពិសេសការបណ្តុះបណ្តាលកម្រិតចំណេះទូទៅនិងបច្ចេកទេសវិជ្ជាជីវៈ(TVET) រួមទាំងការស្វែងរកទីផ្សារសម្រាប់ផលិតផលរបស់កម្ពុជានៅបរទេស៕ដោយៈសិរីមតី
