កីឡាករ Marcus Rashford បានសារភាពថា គ្រាប់ទី១០០ របស់ខ្លួន សម្រាប់ក្លិប Manchester United គឺជាពេលវេលាដ៏ស្រស់បំព្រងបំផុត នៅពេលដែលខ្សែប្រយុទ្ធសញ្ជាតិអង់គ្លេសរូបនេះ បានជួយឱ្យក្រុមបិសាចក្រហមមានជ័យជម្នះ ១-០ លើក្រុម West Ham កាលពីថ្ងៃអាទិត្យ។
Rashford គឺជាម្នាក់ក្នុងចំណោមកីឡាករ ដែលល្អប្រសើរឡើងវិញ ក្នុងរដូវកាលនេះ បន្ទាប់ពីជួបនូវភាពលំបាកលំបិនជាច្រើនឆ្នាំ។ ប៉ុន្តែកីឡាករវ័យ ២៤ឆ្នាំ នៅតែមិនទាន់ធានាបាននូវកៅអី សម្រាប់ដំណើរហោះហើររបស់ក្រុមជម្រើសជាតិអង់គ្លេសទៅកាន់ប្រទេសកាតា ដើម្បីចូលរួមប្រកួតប្រជែងបាល់ទាត់ពិភពលោក (World Cup) ក្នុងខែវិច្ឆិកានោះឡើយ។
កីឡាករ Rashford ដែលត្រូវបានដកឈ្មោះចេញពីក្រុមអង់គ្លេស សម្រាប់កម្មវិធី Nations League ថ្មីៗកន្លងទៅនេះ បានឆក់ឱកាស ដើម្បីរំឭកគ្រូបង្វឹករបស់ក្រុមតោកំណាច លោក Gareth Southgate ពីគុណសម្បត្តិរបស់ខ្លួន ដោយការបង្ហាញនូវទម្រង់លេង ដែលលេចឡើងយ៉ាងជាក់ច្បាស់ជាមួយនឹងគ្រាប់បាល់ជ័យជម្នះ ក្នុងហ្គេម នៅកីឡដ្ឋាន Old Trafford។
ដោយមានលោក Southgate កំពុងអង្គុយមើលពីវេទិកា គ្រាប់បាល់ទី ៧ របស់កីឡាករ Rashford គិតក្នុងការប្រកួត នៅគ្រប់កម្មវិធីទាំងអស់ នារដូវកាលនេះ បានកើតឡើង ក្នុងពេលពេលវេលាយ៉ាងល្អឥតខ្ចោះ មុនពេលអ្នកចាត់ការរបស់ក្រុមអង់គ្លេសបញ្ចេញឈ្មោះកីឡាករក្នុងក្រុមរបស់គាត់ សម្រាប់ព្រឹត្តិការណ៍ World Cup។
ក្រោយចប់ការប្រកួតនេះ កីឡាករ Rashford បាននិយាយថា៖ «វាជាអារម្មណ៍ដ៏ស្រស់ថ្លា។ វាវិលវល់នៅក្នុងគំនិតរបស់ខ្ញុំជានិច្ច សម្រាប់ ២-៣ ហ្គេមចុងក្រោយនេះ។ ខ្ញុំទន្ទឹងរង់ចាំឱ្យវា (គ្រាប់បាល់) កើតឡើង ហើយអរគុណ ដែលធ្វើបាននៅថ្ងៃនេះ។ ខ្ញុំមានអារម្មណ៍ថា ខ្ញុំត្រូវការរកគ្រាប់បាល់បែបនោះបន្ថែមទៀត ហើយបន្តធ្វើឱ្យសម្រេច ក្នុងតំបន់ទាំងនោះ»។
ដោយសារការលោតតែតបញ្ចូលទីយ៉ាងស្អាតរបស់ Rashford ជាកីឡាករទី២២ ដែលស៊ុតបញ្ចូលទីបាន ១០០គ្រាប់ សម្រាប់ក្រុម Man United និងការសង្គ្រោះដ៏អស្ចារ្យជាបន្តបន្ទាប់របស់អ្នកចាំទី David De Gea ទើបក្រុមរបស់ Erik Ten Hag មានឱកាសឡើងដល់លេខ ៥ ក្នុងតារាងពិន្ទុនៃក្របខ័ណ្ឌ Premier League។
ដោយមិនចាញ់សោះក្នុងការប្រកួត ៨លើកចុងក្រោយរបស់ពួកគេ គិតក្នុងការប្រកួត នៅគ្រប់កម្មវិធីទាំងអស់ ឥឡូវនេះ ក្រុម Man United មានគម្លាត ១ពិន្ទុតាមពីក្រោយក្រុមលេខ៤ Newcastle ក្នុងការប្រកួតប្រជែង ដើម្បីដណ្ដើមសិទ្ធិទៅលេង នៅក្របខ័ណ្ឌ Champions League នារដូវកាលក្រោយ៕
