ព្រះរាជអាជ្ញាក្នុងប្រទេសអេស្ប៉ាញ បានទម្លាក់ចោលការចោទប្រកាន់ពីបទពុករលួយ និងក្លែងបន្លំ កាលពីថ្ងៃសុក្រ ប្រឆាំងនឹងកីឡាករបាល់ទាត់ Neymar និងអ្នកដទៃផ្សេងទៀត ដែលត្រូវបានចោទអំឡុងសវនាការ ជុំវិញការផ្ទេរកីឡាករសញ្ជាតិប្រេស៊ីល ក្នុងឆ្នាំ២០១៣ ពីក្លិប Santos ទៅក្លិប Barcelona។
ក្នុងចំណាត់ការដ៏ខ្លាំងក្លាមួយ ព្រះរាជអាជ្ញាបានប្រកាសថា «លុបចោលនូវបទចោទលើជនជាប់ចោទទាំងអស់ និងរាល់ការប្ដឹងទាំងឡាយ» ដែលពួកគេបានប្រឈមជាមួយ។
កីឡាករ Neymar វ័យ ៣០ឆ្នាំ បាននិយាយថា រូបគេមិនចាំថា តើបានចូលរួមក្នុងកិច្ចចរចា ដែលនាំឱ្យមានកិច្ចព្រមព្រៀងប្រថាប់ត្រា ក្នុងឆ្នាំ២០១១ ជាមួយក្លិប Barcelona ឬអត់នោះទេ ជុំវិញការផ្ទេរលើរូបគេពីក្លិប Santos របស់ប្រេស៊ីល ទៅក្លិបយក្សអេស្ប៉ាញ នៅ ២ឆ្នាំក្រោយមក។
ព្រះរាជអាជ្ញាអេស្ប៉ាញ បានស្វះស្វែងឱ្យមានការដាក់ពន្ធនាគាររយៈពេល ២ឆ្នាំ និងការពិន័យជាប្រាក់ចំនួន ១០លានអឺរ៉ូ (៩,៧លានដុល្លារ) ចំពោះកីឡាករ Neymar ដែលជាសមាជិកដ៏សំខាន់ម្នាក់របស់ក្រុមជម្រើសជាតិប្រេស៊ីល សម្រាប់ការធ្វើដំណើរទៅចូលរួមប្រកួតប្រជែង ក្នុងព្រឹត្តិការណ៍ World Cup នៅប្រទេសកាតា នាខែក្រោយ។
ការទម្លាក់បទចោទប្រកាន់នេះ គឺជាការបញ្ចប់រឿងអាស្រូវផ្លូវច្បាប់រយៈពេលជាច្រើនឆ្នាំ ជុំវិញការផ្ទេរដ៏ល្បីសុសសាយរបស់ Neymar ទៅកាន់ទ្វីបអឺរ៉ុប។ បន្ទាប់មករូបគេបានទៅចូលរួមជាមួយក្លិប Paris Saint-Germain ក្នុងតម្លៃផ្ទេរជាកំណត់ត្រាពិភពលោក ២២២លានអឺរ៉ូ ក្នុងឆ្នាំ២០១៧។
កីឡាករ Neymar ធ្លាប់ជាម្នាក់ក្នុងចំណោមជនជាប់ចោទ ៩នាក់ ដែលត្រូវបានជំនុំជម្រះក្ដីលើការចោទប្រកាន់ពាក់ព័ន្ធនឹងអំពើពុករលួយ ដោយក្នុងចំណោមជនជាប់ចោទទាំងនោះ មានឪពុកម្តាយរបស់គេ និងក្រុមហ៊ុន N&N ដែលគ្រប់គ្រងចាត់ចែងកិច្ចការគ្រប់យ៉ាងរបស់គេដែរ៕
