សៀមរាប៖ ភូមិអ្នកនេសាទនាឃុំកំពង់ភ្លុក ស្រុកប្រាសាទបាគង ខេត្តសៀមរាប ដែលមានធម្មជាតិព្រៃលិចទឹកធំៗដ៏ស្រស់ស្អាត កំពុងតែទាក់ទាញភ្ញៀវទេសចរទាំងក្នុងស្រុកនិងបរទេសឱ្យទៅលេងកម្សាន្តឥតដាច់ ជាពិសេសនៅរដូវវស្សា ព្រោះមានទេសភាពស្រស់ស្អាត លំនៅស្ថានខ្ពស់ៗផុតពីទឹក និងផ្ទៃទឹកធំល្វឹងល្វើយមើលដាច់កន្ទុយភ្នែក ដែលគួរឱ្យជិះទូកលេងយ៉ាងសប្បាយ។
ប្រធានសហគមន៍ទេសចរណ៍ធម្មជាតិកំពង់ភ្លុក លោកសាង គង់ មានប្រសាសន៍ថា៖ ឃុំកំពង់ភ្លុកមានភូមិចំនួន៣ មានប្រជាពលរដ្ឋរស់នៅសរុបចំនួនជាង៣០០០នាក់ ដែលភាគច្រើនជាអ្នកប្រកបរបរនេសាទ និងពឹងអាស្រ័យលើវិស័យទេសចរណ៍។ លោកសាង គង់មានប្រសាសន៍បន្ថែមថា កំពង់ភ្លុកត្រូវបានគេស្គាល់ និងក្លាយជាគោលដៅទេសចរណ៍ធម្មជាតិដ៏ទាក់ទាញមួយនៅអំឡុងឆ្នាំ២០១៣ ដោយសារតែទីនោះមានទេសភាពស្រស់ស្អាត លំនៅស្ថានប្រជាពលរដ្ឋខ្ពស់ៗផុតពីទឹក ព្រៃស្រោងចំនួនជិត៥០ហិកតា ត្រូវថែរក្សាការពារយ៉ាងល្អប្រសើរ។
ជារៀងរាល់ថ្ងៃ មានអ្នកទេសចរធ្វើដំណើរតាមទូក ឬកាណូត ទៅកាន់ភូមិបណ្តែតទឹកនិងទស្សនាទេសភាពផ្ទៃបឹងទន្លេសាប ជាពិសេសនៅរដូវវស្សា មានភាពស្រស់ស្អាតខ្លាំង ដោយសារតែផ្ទៃទឹកធំល្វើងល្វើយដាច់កន្ទុយភ្នែក និងអាចទស្សនាទិដ្ឋភាពថ្ងៃលិចកណ្តាលបឹងទន្លេសាប គួរជាទីគយគន់និងមនោរម្យផង។
បើទោះបីជាក្នុងរយៈពេលជាង២ឆ្នាំមកនេះ ប្រជាពលរដ្ឋភាគច្រើនដែលពឹងអាស្រ័យផលលើវិស័យទេសចរណ៍ បានទទួលរងការប៉ះពាល់យ៉ាងខ្លាំងលើជីវភាពប្រចាំថ្ងៃដោយសារវិបត្តិជំងឺកូវីដ១៩ក៏ដោយ ក៏នៅក្រោយពេលនៃការប្រកាសបើកប្រទេសឡើងវិញរបស់រាជរដ្ឋាភិបាល បានធ្វើឱ្យភ្ញៀវទេសចរជាតិ និងអន្តរជាតិ ចាប់ផ្តើមមានកំណើនឡើងវិញយ៉ាងឆាប់រហ័ស ដោយក្នុងមួយថ្ងៃយ៉ាងហោចណាក៏មានភ្ញៀវទេសចរជិត១០០នាក់បានទៅទស្សនាសហគមន៍នោះដែរ។
សហគមន៍ទេសចរណ៍កំពង់ភ្លុក មានអាហារដ្ឋានបណ្តែតទឹក ដែលអាចឱ្យភ្ញៀវទេសចរអុំទូក ចូលទៅសំចតក្នុងព្រៃគុប និងចេញពីក្នុងព្រៃគុបទៅញ៉ាំអាហារបណ្តើរ គយគន់មើលទេសភាពបណ្តើរ លាយឡំជាមួយនិងខ្យល់ទន្លេដ៏ត្រជាក់បក់មកអង្អែលម្ដងៗផងដែរ។
បន្ទាប់ពីការចេញពីអាហារដ្ឋាន ភ្ញៀវទេសចរក៏អាចជិះទូក ឬកាណូតទៅក្នុងបឹងទន្លេសាប ដើម្បីមើលថ្ងៃលិច ជាមួយនឹងផ្ទៃទឹកដ៏ធំល្វឹងល្វើយ។
បឹងទន្លេសាបតំបន់កំពង់ភ្លុក បច្ចុប្បន្នមិនត្រឹមតែជាជម្រកមច្ឆជាតិសម្រាប់ជួយដល់ជីវភាពអ្នកនេសាទប៉ុណ្ណោះទេ វាក៏កំពុងមានសក្តានុពលសម្រាប់ទាក់ទាញភ្ញៀវទេសចរដ៏ធំធេងបំផុត សម្រាប់ឱ្យភ្ញៀវជាតិនិងអន្តរជាតិទៅទស្សនាកម្សាន្តអារម្មណ៍ផងដែរ។
សហគមន៍ទេសចរណ៍ធម្មជាតិកំពង់ភ្លុក ស្ថិតនៅជាប់មាត់បឹងទន្លេសាប ដែលមានចម្ងាយប្រហែល៣០គីឡូម៉ែត្រ ភាគខាងកើតឆៀងខាងត្បូងពីទីរួមខេត្តសៀមរាប។
អ្នកទៅទស្សនានៅតំបន់កំពង់ភ្លុក អាចកម្សាន្តសប្បាយជាមួយធម្មជាតិ ឈ្វេងយល់ពីវប្បធម៌របស់អ្នកភូមិបណ្ដែតទឹក គយគន់ថ្ងៃរៀបលិចនិងអាចទស្សនាហ្វូងសត្វស្លាបជាច្រើនប្រភេទ ដែលហើររកចំណី ព្រមទាំងវិលត្រឡប់រកទ្រនំវិញនៅពេលថ្ងៃរៀបលិច ដែលធ្វើឲ្យអារម្មរណ៍រសាត់អណ្ដែតអណ្ដូងនិងមានអារម្មណ៍ថាក្តីសុខយ៉ាងអស្ចារ្យ៕
