អ្នកចាំទី David de Gea របស់ក្រុម Manchester United ត្រូវបានផ្សារភ្ជាប់ជាមួយនឹងព័ត៌មានថា ព្រមកាត់បន្ថយប្រាក់ឈ្នួល ដើម្បីបានចុះកិច្ចសន្យាថ្មីជាមួយក្លិប បន្ទាប់ពីក្រុមបិសាចក្រហម មានគម្រោងក្នុងការនាំយកអ្នកចាំទីថ្មីមករួមក្រុម។
![](https://cambodiaflashnews.com/wp-content/uploads/2021/06/top-banner.gif)
កីឡាករសញ្ជាតិអេស្ប៉ាញ De Gea បានផ្លាស់មកយាមបង្គោលទីឱ្យក្រុមបិសាចក្រហម តាំងពីឆ្នាំ២០១១ ហើយបានបង្ហាញខ្លួនឱ្យក្រុម រហូតដល់ជាប់ចំណាត់ថ្នាក់ក្នុងចំណោមកីឡាករលើគេទាំង ១០ បើគិតពីចំនួនហ្គេម ដែលបានចូលលេងរួចហើយ។ រហូតមកទល់ពេលនេះ អ្នកចាំទីវ័យ ៣១ឆ្នាំ នៅមានកុងត្រាជាមួយក្លិប ត្រឹមចុងបញ្ចប់រដូវកាលនេះប៉ុណ្ណោះ បើទោះបីជាក្រុម Man United មានជម្រើសក្នុងការបន្តរយៈពេល ១ឆ្នាំទៀតក៏ដោយ។
ក្នុងពេលជាមួយគ្នានេះដែរ ដោយអតីតកីឡាកររបស់ក្លិប Atletico Madrid ទទួលបានប្រាក់ឈ្នួលខ្ពស់រហូតដល់ ៣៧៥ ០០០ផោន (ជាង ៤៣ម៉ឺនដុល្លារ) ក្នុង ១សប្ដាហ៍ ទើបបង្កឱ្យមានពាក្យចចាមអារ៉ាមថា គ្រូបង្វឹកសញ្ជាតិហូឡង់ លោក Erik ten Hag សង្ឃឹមថា នឹងអនុញ្ញាតឱ្យរូបគេចាកចេញពីទឹកដី Old Trafford ដើម្បីជួយសន្សំសំចៃការចំណាយ ហើយបានប្រគល់តួនាទីដល់លោក Tony Coton ដែលជាប្រធានក្រុមអ្នកតាមដានអ្នកចាំទី ឱ្យស៊ើបរកអ្នកយាមបង្គោលទីគួរឱ្យចាប់អារម្មណ៍ថ្មី។
ពាក់ព័ន្ធនឹងករណីនេះ មានសេចក្ដីរាយការណ៍ថា ក្រុម Man United កំពុងដាក់រ៉ាដាទៅលើអ្នកចាំទី Diogo Costa វ័យ ២៣ឆ្នាំរបស់ក្លិប Porto និងអ្នកចាំទីសញ្ជាតិអេស្ប៉ាញ Unai Simon អាយុ ២៥ឆ្នាំរបស់ក្លិប Athletic Bilbao។ លើសពីនេះ ក្លិប Man United ក៏នៅមាន Dean Henderson ដែលត្រូវបានក្លិប Nottingham Forest ខ្ចីជើង និងដែលត្រៀមខ្លួនជាស្រេច ដើម្បីវិលមកប្រជែងដណ្តើមតំណែងអ្នកចាំទីដៃទី ១ នារដូវកាលក្រោយ។
ទោះជាយ៉ាងណាក៏ដោយ វេបសាយផ្នែកកីឡា «The Athletic» បានឱ្យដឹងថា កីឡាករ De Gea រីករាយក្នុងការឱ្យក្លិបកាត់បន្ថយប្រាក់ខែ ដើម្បីបានបន្តកិច្ចសន្យាថ្មី ខណៈដែលរូបគេប្តេជ្ញាក្នុងការបន្តអាជីពជាមួយក្លិបយក្ស នៅក្របខ័ណ្ឌ Premier League អង់គ្លេសមួយនេះ៕