ភ្នំពេញ៖ក្រុមការងារហិរញ្ញវត្ថុហៅកាត់ថា FATF ដែលមានមូលដ្ឋាននៅទីក្រុងប៉ារីសប្រទេសបារាំងកាលពីខែមីនាឆ្នាំ២០២២ បានសម្រេចបន្តដាក់កម្ពុជាឲ្យស្ថិតក្នុង «បញ្ជីប្រផេះ» ដែលពិភពលោក ត្រូវបង្កើនការតាមដាន។
![](https://cambodiaflashnews.com/wp-content/uploads/2021/06/top-banner.gif)
ដើម្បីឆ្លើយតបនឹងបញ្ហានេះអគ្គនាយកដ្ឋានពន្ធប្តេជ្ញាពង្រឹងការអនុវត្តច្បាប់ពន្ធដារ ការប្រមូលពន្ធ និងលុបបំបាត់ការគេចវេសពន្ធផ្សេងៗ ដើម្បីផ្តល់ភាពយុត្តិធម៌ដល់អ្នកជាប់ពន្ធទាំងអស់ និងជំរុញឱ្យធ្វើឱ្យកម្ពុជា លុបឈ្មោះចេញពីបញ្ជីប្រផេះ ដើម្បីទាក់ទាញលំហូរ វិនិយោគពីក្រៅប្រទេស។
នេះជាការលើកឡើងរបស់លោក គង់ វិបុល រដ្ឋមន្ត្រីប្រតិភូអមនាយករដ្ឋមន្ត្រីនិងជាអគ្គនាយកនៃអគ្គនាយកដ្ឋានពន្ធដារនៅក្នុងវេទិកាពន្ធដារឆ្នាំ២០២២ ដែលរៀបចំឡើងដោយសភាពាណិជ្ជកម្មអឺរ៉ុបប្រចាំកម្ពុជា នាថ្ងៃទី២៦ ខែតុលា ឆ្នាំ ២០២២ នេះ នៅសណ្ឋាគារសូហ្វីតែល។
លោកបានគូសបញ្ជាក់ថា «កម្ពុជា មានភ្នាក់ងារប្រឆាំងនឹងការលាងសម្អាតប្រាក់ ព្រោះប្រទេសកម្ពុជា កំពុងស្ថិតក្នុងបញ្ជីប្រផេះ យើងមានយន្តការផ្សេងៗ ដែលយើងសង្ឃឹមថា ប្រទេសកម្ពុជានឹងចាកចេញពីបញ្ជីប្រផេះ ហើយវិលទៅស្ថិតក្នុងបញ្ជី ស ម្តងទៀត ដើម្បីទាក់ទាញលំហូរវិនិយោគពីក្រៅប្រទេស មកបណ្តាក់ទុននៅកម្ពុជា»។
ពីខែមករា ដល់ខែតុលាឆ្នាំនេះ ពន្ធដារប្រមូលចំណូលបានជាង ១០៤%នៃច្បាប់ថវិកាជាតិ និងរំពឹងថា រហូតដល់ដំណាច់ឆ្នាំនេះ ការប្រមូលពន្ធដារ នឹងលើសផែនការពី១៥% ទៅ២៥%៕ដោយៈសិរីមតី