ភ្នំពេញ៖កិច្ចព្រមព្រៀងអនុស្សារណៈយោគយល់គ្នាស្ដីពីកិច្ចសហប្រតិបត្តិការថាមពល រវាងក្រសួងរ៉ែនិងថាមពលនៃព្រះរាជាណាចក្រកម្ពុជា និងក្រសួងពាណិជ្ជកម្មនិងឧស្សាហកម្មនៃសាធារណៈរដ្ឋសឹង្ហបុរី បានត្រូវចុះហត្ថលេខាកាលពីថ្ងៃទី២៥ខែតុលា។
អនុស្សារណៈយោគយល់គ្នានេះ គឺជាជំហានបន្តដ៏សំខាន់ ដើម្បីភាពរីកចម្រើននៃការអភិវឌ្ឍវិស័យថាមពល ទាំងក្នុងតំបន់ និងប្រទេសទាំងពីរបន្ថែមទៀត ជាពិសេសគឺចូលរួមចំណែកកែលម្អរចនាសម្ព័ន្ធអន្តរកាលថាមពល និងការបង្កើនឱកាសពាណិជ្ជកម្មភ្ជាប់ថាមពលក្នុងតំបន់របស់យើង។តាមរយៈកិច្ចសហប្រតិបត្តិនេះ យើងនឹងបោះជំហានឆ្ពោះទៅរកចក្ខុវិស័យនៃការតភ្ជាប់ថាមពលអាស៊ាន ដើម្បីលើកកម្ពស់សន្តិសុខថាមពល និងចីរភាពនៅក្នុងតំបន់។
ប្រទេសទាំងពីរនឹងត្រូវអនុវត្តគម្រោងរួមគ្នាជាច្រើនរួមមាន៖ ការសិក្សាស្រាវជ្រាវរួមគ្នាអំពីសក្ដានុពលបច្ចេកវិទ្យាថាមពលកាបូនទាប ខ្សែសង្វាក់ផលិតកម្មថាមពល ការផ្លាស់ប្ដូរព័ត៌មាន គោលនយោបាយ និងបទប្បញ្ញត្តិពាក់ព័ន្ធ ការកសាងសមត្ថភាពធនធានមនុស្ស ការរៀបចំរបាយការណ៍វាយតម្លៃ វិញ្ញាបនប័ត្រ និងថាមពលកើតឡើងវិញក្នុងគោលដៅធ្វើយ៉ាងណាបង្កើតឱកាសអភិវឌ្ឍន៍ និងវិនិយោគលើគម្រោងថាមពលករកើតឡើងវិញ និងពាណិជ្ជកម្មតភ្ជាប់បណ្ដាញអគ្គិសនី តាមរយៈប្រព័ន្ធបំពង់ខ្សែកាបរត់ក្រោមបាតសមុទ្រ ពីកម្ពុជាទៅសឹង្ហបុរីនាពេលអនាគត៕ដោយៈសិរីមតី
