លោក Michael Carrick ត្រូវបានតែងតាំងជាគ្រូបង្វឹកថ្មីរបស់ក្រុម Middlesbrough (Boro) ដែលកំពុងតែតស៊ូនៅលីគកម្រិតទី២ របស់អង់គ្លេស។ នេះបើយោងតាមការប្រកាសពីក្លិប នៅក្របខ័ណ្ឌ Championship កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
អតីតខ្សែបម្រើ និងជាជំនួយការរបស់ក្រុមបិសាចក្រហម Manchester United វ័យ ៤១ឆ្នាំរូបនេះ ត្រូវចូលមកជំនួសតំណែងរបស់លោក Chris Wilder ដែលត្រូវបានបញ្ចប់តួនាទី កាលពីដើមខែនេះ ហើយនឹងត្រូវបានចូលរួមនៅឯកីឡដ្ឋាន Riverside ដោយអតីតគ្រូបង្វឹករបស់ក្រុម Boro លោក Jonathan Woodgate ដែលនឹងត្រឡប់ទៅក្លិបភាគឦសានវិញ ក្នុងតួនាទីជាគ្រូបង្ហាត់ក្រុមធំ។
សេចក្តីថ្លែងការណ៍នៅលើគេហទំព័ររបស់ក្លិប Middlesbrough បានឱ្យដឹងថា៖ «ក្លិបមានសេចក្តីសោមនស្សរីករាយ ក្នុងការប្រកាសតែងតាំងលោក Michael Carrick ជាគ្រូបង្វឹកថ្មី។ លោក Michael នឹងនាំមកនូវបទពិសោធដ៏សម្បូរបែបដល់ក្លិប ដែលគាត់បានចំណាយពេល ១២ឆ្នាំ ក្នុងនាមជាកីឡាករនៅក្លិប Manchester United មុនពេលគ្រូបង្ហាត់ និងអ្នកចាត់ការបណ្ដោះអាសន្នរបស់ក្លិប នៅទឹកដី Old Trafford»។
បច្ចុប្បន្ន ក្រុម Middlesbrough កំពុងឈរនៅចំណាត់ថ្នាក់លេខទី២១ ក្នុងតារាងពិន្ទុរបស់ក្របខ័ណ្ឌ Championship ដោយមានគម្លាតត្រឹមតែ ១ពិន្ទុប៉ុណ្ណោះពីលើក្រុម នៅតំបន់ ដែលត្រូវកាត់ទម្លាក់ទីលីគទី ៣ បន្ទាប់ពីប្រកួតស្មើដោយគ្មានគ្រាប់បាល់ កាលពីថ្ងៃអាទិត្យ នៅឯផ្ទះរបស់ក្រុមបាតតារាង Huddersfield៕