មន្ត្រីជាន់ខ្ពស់របស់ក្លិបបាល់ទាត់អាជីពរបស់ប្រទេសអ៊ុយក្រែន បានលើកឡើងថា ក្រុមជម្រើសជាតិអ៊ីរ៉ង់ គួរតែត្រូវដកចេញពីការប្រកួតបាល់ទាត់ពិភពលោក (World Cup) ឆ្នាំនេះ ហើយជំនួសវិញដោយអ៊ុយក្រែន ដោយចោទប្រកាន់ថា យន្តហោះគ្មានមនុស្សបើក (ដ្រូន) របស់អ៊ីរ៉ង់ ត្រូវបានរុស្ស៊ីយកទៅប្រើប្រាស់ក្នុងសង្រ្គាមប្រឆាំងនឹងទីក្រុងកៀវ។
នាយកប្រតិបត្តិរបស់ក្លិប Shakhtar Donetsk លោក Sergiy Palkin បានសរសេរ នៅលើបណ្ដាញសង្គម Facebook ថា៖ «ក្នុងខណៈពេលដែលអ្នកដឹកនាំរបស់ប្រទេសអ៊ីរ៉ង់ នឹងរីករាយក្នុងការមើលក្រុមជម្រើសជាតិរបស់ពួកគេលេងនៅ World Cup ប្រជាជនអ៊ុយក្រែនឯណេះវិញនឹងត្រូវបានសម្លាប់ដោយដ្រូន និងមីស៊ីលអ៊ីរ៉ង់»។
«ពួកវា (ដ្រូន) នីមួយៗ ត្រូវបានផលិត និងបញ្ជូនដោយអាជ្ញាធរអ៊ីរ៉ង់ ហើយគ្រូបង្ហាត់ និងយោធាអ៊ីរ៉ង់ បានបណ្តុះបណ្តាល និងគ្រប់គ្រងដោយផ្ទាល់សម្រាប់ការបាញ់បង្ហោះដ្រូន ដែលបានបំផ្លាញផ្ទះ សារមន្ទីរ សាកលវិទ្យាល័យ ការិយាល័យ កន្លែងកីឡា និងកន្លែងលេងកម្សាន្តនានា ហើយសំខាន់បំផុតនោះ គឺការបំផ្លាញជីវិតពលរដ្ឋអ៊ុយក្រែន»។ លោក Palkin បានបន្ត។
លោកនាយកប្រតិបត្តិរូបនេះ បានបន្ថែមថា៖ «ក្លិប Shakhtar សូមអំពាវនាវឱ្យ FIFA (សហព័ន្ធបាល់ទាត់ពិភពលោក) និងសហគមន៍អន្តរជាតិទាំងមូល ធ្វើការហាមឃាត់ ចំពោះក្រុមជម្រើសជាតិអ៊ីរ៉ង់ជាបន្ទាន់ក្នុងការចូលរួមប្រកួតប្រជែងនៅ World Cup ដោយសារការចូលរួមដោយផ្ទាល់របស់ប្រទេសនេះក្នុងការវាយប្រហារភេរវកម្មលើជនជាតិអ៊ុយក្រែន»។
លោក Palkin បានជំរុញឱ្យ FIFA យកក្រុមអ៊ុយក្រែនជំនួសអ៊ីរ៉ងនេះ បន្ទាប់ពីបង្ហាញថា ក្រុមជម្រើសជាតិនេះស័ក្តិសមចូលរួមក្នុងព្រឹត្តិការណ៍ World Cup ដោយលោកបានប្រាប់ថា៖ «ដោយមានលក្ខខណ្ឌមិនស្មើគ្នាជាមួយនឹងក្រុមជម្រើសជាតិផ្សេងទៀត ក្នុងពេលប្រកួតវគ្គជម្រុះ ពួកគេលេងដោយបេះដូង»។
ការប្រកួតប្រជែង World Cup នៅប្រទេសកាតា នឹងចាប់ផ្តើមនៅថ្ងៃទី២០ ខែវិច្ឆិកាខាងមុខនេះ។ ក្រុមអ៊ុយក្រែនបានយកឈ្នះស្កុតឡេន ៣-១ នៅទីក្រុង Glasgow មុននឹងធ្លាក់ដោយសារក្រុមវេលស៍ ជាមួយនឹងបរាជ័យ ១-០ ក្នុងវគ្គ Play-off ផ្ដាច់ព្រ័ត្រ សម្រាប់ការដណ្ដើមសិទ្ធិទៅចូលរួម World Cup កាលពីខែមិថុនា ក្នុងទីក្រុង Cardiff៕
