ភ្នំពេញ៖ក្រសួងសាធារណការ និងដឹកជញ្ជូន និងថ្នាក់ដឹកនាំក្រុមហ៊ុនគ្រប់គ្រងផ្លូវល្បឿនលឿនភ្នំពេញ-ក្រុងព្រះសីហនុ បានសម្រេចទម្លាក់តម្លៃខ្លះ ដើម្បីជួយសម្រួលឱ្យក្រុមហ៊ុនដឹកជញ្ជូន ប្រភេទរថយន្តកុងតឺន័រ មានលទ្ធភាពប្រើប្រាស់ផ្លូវនេះ។នេះបើតាមលោកហ៊ាង សុធាយុត្តិ អ្នកនាំពាក្យក្រសួងសាធារណការ និងដឹកជញ្ជូន។
លោក សុទ្ធាយុត្តិ បានឱ្យដឹងថាការសម្រេចបញ្ចុះតម្លៃខ្លះពីសំណាក់ក្រុមហ៊ុនធ្វើឡើង ក្រោយកិច្ចប្រជុំមួយរវាងក្រសួងសាធារណការ និងក្រុមហ៊ុនចិន China Road and Bridge នាពេលថ្មីៗនេះ។
លោកបន្តថា ក្រសួងបានដឹកនាំប្រជុំ ជាមួយក្រុមហ៊ុនជជែកលើតម្លៃដែលកើតចេញពីបញ្ហាមួយចំនួន ដូចជា ការអូស ស្ទូច សណ្តោង ក្នុងករណីរថយន្តជួបឧប្បតិ្តហេតុអ្វីមួយ និងតម្លៃនៃការប្រើប្រាស់ផ្លូវល្បឿនលឿន ក្រសួងបានចរចាឱ្យក្រុមហ៊ុនធ្វើការបញ្ចុះតម្លៃ ហើយជាលទ្ធផលក្រុមហ៊ុនក៏សម្រេចទម្លាក់ខ្លះ។
ជានីតិវិធីក្រុមហ៊ុនកំណត់តម្លៃ រីឯក្រសួងមានភារកិច្ចពិនិត្យ និងគាំទ្រ ហើយការប្រកាសផ្សព្វផ្សាយពីតម្លៃប្រើប្រាស់ផ្លូវ និងតម្លៃអូស ស្ទូច សណ្តោង នឹងប្រកាសនាពេលឆាប់ៗ ក្រោយភាគីទាំង២សម្រេចលើតួលេខរួមនៃតម្លៃ៕ដោយៈផាវី
