អតីតគ្រូបង្វឹកក្រុមកាំភ្លើងធំ Arsenal លោក Unai Emery នឹងវិលត្រឡប់មកកាន់ក្របខ័ណ្ឌ Premier League វិញ ក្នុងខែវិច្ឆិកា ក្នុងនាមជាគ្រូបង្វឹកថ្មីរបស់ក្រុម Aston Villa។ នេះបើយោងតាមការប្រកាសរបស់ក្លិប នៅអង់គ្លេស កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
លោក Emery ដែលចាកចេញពីតំណែងរបស់គាត់នៅក្លិប Villarreal របស់អេស្ប៉ាញ ត្រូវចូលមកកាន់តំណែងតពីលោក Steven Gerrard ដែលត្រូវបានដកកាលពីសប្តាហ៍មុន បន្ទាប់ពីក្រុម Villa បានរងបរាជ័យ ៣-០ ដោយសារក្រុម Fulham។
ក្នុងសេចក្តីថ្លែងការណ៍របស់ខ្លួន ក្លិបនៃតំបន់ Midlands បានឱ្យដឹងថា៖ «ក្លិប Aston Villa មានភាពរីករាយ ក្នុងការប្រកាសឱ្យដឹងពីការតែងតាំងលោក Unai Emery ជាគ្រូបង្វឹកថ្មីរបស់ក្រុម។លោក Emery ជាគ្រូបង្វឹកមានបទពិសោធនកម្រិតកំពូលម្នាក់ ដែលបានដឹកនាំការប្រកួតចំនួនជាង ៩០០លើក»។
បុរសវ័យ ៥០ឆ្នាំរូបនេះ បានដឹកនាំក្រុម Villarreal ឱ្យទទួលបានជោគជ័យ នៅក្របខ័ណ្ឌ Europa League របស់អឺរ៉ុប ក្នុងឆ្នាំ២០២១ ដោយបានយកឈ្នះក្រុមបិសាចក្រហម Manchester United នៅវគ្គផ្តាច់ព្រ័ត្រ មុនពេលដឹកនាំក្រុមនេះឡើងទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League កាលពីរដូវកាលមុន ដែលពួកគេបានចាញ់ក្រុមហង្សក្រហម Liverpool។
នៅមុននោះ គាត់ក៏បានជួយឱ្យក្រុមនៅអេស្ប៉ាញមួយទៀត គឺ Sevilla លើកពានរបស់ Europa League ៣ដងជាប់គ្នា ចន្លោះឆ្នាំ២០១៣ និងឆ្នាំ២០១៦ ហើយបន្តទៅឈ្នះជើងឯក នៅក្របខ័ណ្ឌ Ligue 1 នៅបារាំងជាមួយក្រុម Paris Saint-Germain ទៀត។
អំឡុងពេលលេងនៅជាមួយក្លិប Arsenal គាត់បានដឹកនាំក្រុមកាំភ្លើងធំឱ្យឆ្លងដល់វគ្គផ្តាច់ព្រ័ត្រ នៅ Europa League ឆ្នាំ២០១៩ ដែលពេលនោះ បានចាញ់ក្រុមរួមលីគតោខៀវ Chelsea ៤-១៕