កីឡាករ Federico Valverde នឹងមិនបានចូលរួមការប្រកួតនៅក្របខ័ណ្ឌ Champions League នៅពេលដែលក្រុមអធិរាជស Real Madrid ជួបក្រុម RB Leipzig នៅថ្ងៃអង្គារនោះឡើយ ដោយរូបគេជាមួយនឹងខ្សែប្រយុទ្ធ Karim Benzema ត្រូវបានដកឈ្មោះចេញពីការធ្វើដំណើរទៅកាន់ប្រទេសអាល្លឺម៉ង់នេះ។
ខ្សែបម្រើសញ្ជាតិអ៊ុយរូហ្គាយ Valverde បង្ហាញទម្រង់លេងបានយ៉ាងល្អ សម្រាប់ក្រុម Madrid នារដូវកាលនេះ ហើយបានស៊ុតបញ្ចូលទីគ្រាប់ទី៧ របស់ខ្លួននៅរដូវកាលថ្មីនេះ ក្នុងជ័យជម្នះ ៣-១ លើក្រុម Sevilla កាលពីថ្ងៃសៅរ៍។
តែរូបគេបានរងរបួស ក្នុងការប្រកួតនោះ បន្ទាប់ពីមានការប៉ះទង្គិចជាមួយកីឡាករ Papu Gomez ដែលត្រូវបានពិន័យកាតលឿង ដោយសារបង្កកំហុសពីការប្រជែងនោះ ហើយរបួសនេះបានធ្វើឱ្យកីឡាករ Valverde ដកឈ្មោះចេញផែនការរបស់គ្រូបង្វឹក លោក Carlo Ancelotti សម្រាប់ហ្គេម នៅពាក់កណ្តាលសប្តាហ៍នេះ។
ម្ចាស់ជយលាភីពានរង្វាន់ Ballon d’Or កីឡាករ Benzema ក៏ត្រូវបានរំពឹងថា នឹងអវត្តមានក្នុងការប្រកួតទល់នឹងក្រុម Leipzig នេះដែរ ព្រោះមិនបានបង្ហាញខ្លួន ក្នុងហ្គេមជាមួយក្រុម Sevilla នោះឡើយ ដោយសារតែមានបញ្ហាសាច់ដុំនៅជើងខាងឆ្វេង ហើយការគ្មានឈ្មោះនេះ ក៏ត្រូវបានបញ្ជាក់ នៅពេលដែលក្រុម Madrid ប្រកាសពីក្រុម ក្នុងដំណើរទៅអាល្លឺម៉ង់របស់ពួកគេ។
ទាំងកីឡាករ Valverde និង Benzema ត្រូវបានរំពឹងថា នឹងនៅក្រៅទីលាន ក្នុងរយៈពេលយូរ ដោយសេចក្ដីរាយការណ៍ នៅក្នុងប្រទេសអេស្ប៉ាញ បានឱ្យដឹងថា ទាំង ២នាក់ អាចត្រឡប់មកមានសកម្មភាពវិញ ក្នុងការប្រកួតជាមួយក្រុម Girona នៅក្របខ័ណ្ឌ La Liga នាថ្ងៃអាទិត្យចុងសប្ដាហ៍នេះ៕