ក្រុម Lazio បានរំកិលទៅនៅក្នុងរង្វង់តែ ៥ពិន្ទុ តាមពីក្រោយក្រុម Napoli ដែលឈរលើគេក្នុងតារាងពិន្ទុនៃក្របខ័ណ្ឌ Serie A កាលពីថ្ងៃអាទិត្យ ជាមួយនឹងជ័យជម្នះ ២-០ នៅឯទឹកដីរបស់ក្រុម Atalanta ដែលលទ្ធផលនេះ បានបញ្ចប់កំណត់ត្រាមិនចាញ់សោះរបស់ក្រុមគូប្រជែងរបស់ខ្លួន សម្រាប់ការប្រកួតនៅលីគកំពូលរបស់ប្រទេសអ៊ីតាលី។
ក្រុម Atalanta មានឱកាសទៅឈរលេខ ២ ប៉ុន្តែក្រុម Lazio បានបង្ហាញទម្រង់លេងយ៉ាងល្អឥតខ្ចោះ ទោះបីជាគ្មានខ្សែប្រយុទ្ធអន្តរជាតិអ៊ីតាលី Ciro Immobile ដែលរងរបួសក៏ដោយ ដើម្បីរក្សាឱកាសក្នុងការទៅកាន់តែកៀកនឹងក្រុមកំពូលតារាង។
ការស៊ុតបញ្ចូលទីរបស់កីឡាករ Mattia Zaccagni បានជួយឱ្យក្រុមភ្ញៀវនាំមុខ នៅនាទីទី១០សម្រាប់ការប្រកួត នៅកីឡដ្ឋាន Gewiss ហើយខ្សែប្រយុទ្ធ Felipe Anderson ដែលមកជំនួសកន្លែងរបស់កីឡាករ Immobile បានបន្ថែមការនាំមុខទ្វេដង នៅដើមវគ្គទី ២ ដែលជាគ្រាប់បាល់ជួយធានាឱ្យក្រុម Lazio ហក់ឡើងទៅនៅពីលើក្រុម Atalanta ក្នុងចំណាត់ថ្នាក់លេខ ៣។
តែយ៉ាងណាក្ដី ក្រុមរបស់លោក Maurizio Sarri មាន ២៤ពិន្ទុស្មើជាមួយនឹងក្រុម Atalanta ដែលឈរនៅលេខរៀងទី៤ បន្ទាប់ពីឈ្នះ ៤លើកក្នុងចំណោមការប្រកួត នៅលីគចំនួន ៦លើកចុងក្រោយរបស់ពួកគេ ដោយក្នុងនោះពួកគេមិនបានរបូតគ្រាប់បាល់សូម្បីតែ ១គ្រាប់។
នៅក្រោយការប្រកួត កីឡាករ Anderson បានប្រាប់ប្រព័ន្ធផ្សព្វផ្សាយ DAZN ថា៖ «ឆ្នាំនេះយើងលេងគ្រប់ការប្រកួត ដូចជាក្រុមដែលប្រយុទ្ធដើម្បីដណ្ដើមបានគ្រប់គ្រាប់បាល់អ៊ីចឹង ហើយអ្នកអាចឃើញលទ្ធផលនោះហើយ។ យើងបានដឹងថា នេះនឹងក្លាយជាការប្រកួតដ៏លំបាកបំផុតមួយនៃរដូវកាល ជាពិសេសដោយគ្មានប្រធានក្រុម Ciro (Immobile)។ ថ្ងៃនេះយើងសប្បាយចិត្តណាស់»៕
