ក្រុមកាំភ្លើងធំ Arsenal ដែលកំពុងឈរនៅកំពូលតារាងនៃក្របខ័ណ្ឌ Premier League បានរបូតពិន្ទុទើបតែជាលើកទី២ ក្នុងរដូវកាលនេះ ដោយធ្វើបានលទ្ធផលស្មើដ៏គួរឱ្យខកចិត្ត ១-១ នៅទឹកដីរបស់ក្រុម Southampton ខណៈដែលក្រុម Newcastle បានឡើងទៅចំណាត់ថ្នាក់លេខ ៤ បន្ទាប់ពីដាក់ទោសចំពោះកំហុសរបស់អ្នកចាំទី Hugo Lloris ដោយការយកឈ្នះក្រុមម្ចាស់ផ្ទះ Tottenham Hotspur (Spurs) ២-១ កាលពីថ្ងៃអាទិត្យ។
![](https://cambodiaflashnews.com/wp-content/uploads/2021/06/top-banner.gif)
ក្រុម Arsenal មើលទៅទំនងជារំកិលទៅមានគម្លាត ក្នុងការនាំមុខដាច់ ៤ពិន្ទុ នៅទីកំពូលតារាងហើយ នៅពេលដែលកីឡាករ Granit Xhaka បន្តទម្រង់លេងដ៏ល្អរបស់ខ្លួន ដោយការស៊ុតគ្រាប់បាល់នាំមុខ នៅកីឡដ្ឋាន St Mary’s ក្រោយការប្រកួត ចាប់ផ្ដើមបានត្រឹមតែ ១១ នាទីប៉ុណ្ណោះ។
ក្រុមរបស់ Mikel Arteta បានគ្រប់គ្រងហ្គេមស្ទើរទាំងស្រុង ក្នុងវគ្គទី១ ប៉ុន្តែមិនអាចទាញយកផលពីការមានប្រៀបរបស់ខ្លួនបាន ខណៈដែលខ្សែប្រយុទ្ធ Gabriel Jesus បានបង្កើតកំហុស នៅពេលមានឱកាសដ៏ល្អ ហើយមិនអាចស៊ុតបន្ថែមគ្រាប់បាល់នាំមុខបាន។
ចុងក្រោយ ក្រុម Arsenal ក៏ត្រូវបានដាក់ទោសដោយក្រុមម្ចាស់ផ្ទះ នៅពេលដែលកីឡាករ Stuart Armstrong បានបញ្ចប់ទីយ៉ាងស្អាតអស្ចារ្យ ដើម្បីជួយឱ្យមានលទ្ធផលស្មើ នៅប្រមាណជា ២៥នាទី មុនចប់ការប្រកួត ហើយលទ្ធផល ១-១ បន្តរហូតដល់ចប់ ៩០នាទីតែម្ដង។ ការដណ្ដើមបានតែ ១ពិន្ទុនេះ ធ្វើឱ្យ Arsenal នាំមុខដាច់តែ ២ពិន្ទុប៉ុណ្ណោះលើក្រុម២ Manchester City។
លោក Arteta បាននិយាយថា៖ «យើងពិតជាល្អណាស់នៅក្នុងវគ្គទី១ ហើយបានបង្កើតឱកាសល្អៗជាច្រើនដង ដែលយើងបណ្ដោយឱ្យបាត់បង់យ៉ាងគួរសោកស្ដាយ។ ជាសំណាងមិនល្អ នៅ Premier League នៅពេលដែលអ្នកធ្វើមិនបាន (ស៊ុតបញ្ចូលទីមិនបាន) អ្នកអាចទទួលបានផលពីការថ្លោះធ្លោយនោះ»។
ការចាប់ផ្តើមដ៏រឹងមាំរបស់ក្រុម Newcastle នារដូវកាលនេះ ទទួលបានសន្ទុះកាន់តែខ្លាំងបន្ថែមទៀត ខណៈដែលពួកគេបានធ្វើឱ្យក្រុម Spurs រងបរាជ័យក្នុងផ្ទះជាលើកដំបូង ចាប់តាំងពីខែមេសា ហើយជ័យជម្នះនេះ នាំឱ្យក្រុមរបស់លោក Eddie Howe ឡើងដល់ចំណាត់ថ្នាក់ ដែលមានសិទ្ធិទៅលេង នៅក្របខ័ណ្ឌ Champions League ដោយមាន ២ពិន្ទុតាមពីក្រោយក្រុមលេខ ៣ Spurs បន្ទាប់ពីបន្តការមិនស្គាល់ចាញ់របស់ពួកគេដល់ទៅ ៧ដង។
ខ្សែប្រយុទ្ធ Callum Wilson បានជួយឱ្យរក្រុម Newcastle នាំមុខនៅនាទីទី៣១ ហើយក្រុមភ្ញៀវ បន្ថែមការនាំមុខ នៅ ៥នាទី មុនឈប់សម្រាកវគ្គទី ១ ដែលទម្លុះសំណាញ់ទីដោយ Miguel Almiron។ ខ្សែប្រយុទ្ធ Harry Kane បានផ្ដល់ក្ដីសង្ឃឹមឱ្យក្រុមម្ចាស់ផ្ទះ ដោយការធ្វើបានសម្រេច ១គ្រាប់ នៅនាទីទី៥៤ តែយ៉ាងណាក្ដី ក្រុម Spurs នៅតែខកចិត្ត ពេលសំឡេងកញ្ចែចុងក្រោយបន្លឺឡើង៕