ងាកមកឥណ្ឌាឯណេះវិញ កាលពីម្សិលមិញនេះ បានបាញ់បង្ហោះផ្កាយរណបអ៊ីនធើណេត ជាង៣០គ្រឿងទៅកាន់គន្លងតារាវិថីដោយជោគជ័យ បន្ទាប់ពីមានការពន្យារពេលច្រើនខែដោយសារ សង្រ្គាមរុស្ស៊ី-អ៊ុយក្រែន។

យោងតាមប្រធានអង្គការស្រាវជ្រាវអវកាសឥណ្ឌា ហៅកាត់ថា ISRO លោក Sreedhara Panicker Somanath បានឲ្យដឹងថា បេសកកម្មនេះ គឺជាផ្នែកនៃការរៀបចំពាណិជ្ជកម្មរវាង New Space India Limited ដែលជាក្រុមហ៊ុនគ្រប់គ្រងដោយរដ្ឋាភិបាល និង OneWeb ក្រុមហ៊ុនអ៊ីនធើណេតមាន មូលដ្ឋាននៅចក្រភពអង់គ្លេស។ កាលពីព្រឹកថ្ងៃអាទិត្យ បេសកកម្មត្រូវបានធ្វើរួមគ្នាដោយជោគជ័យ ជាការបាញ់បង្ហោះពាណិជ្ជកម្មលើកដំបូងមិនធ្លាប់មាននៃរ៉ុក្កែតLVM3 របស់ឥណ្ឌា”។ ការបាញ់បង្ហោះផ្កាយរណប OneWeb លើកទី១៤នេះ ពឹងផ្អែកលើរ៉ុក្កែតធ្ងន់បំផុតរបស់ប្រទេសឥណ្ឌា ដែលជាធម្មតាពឹងផ្អែកជាមួយរុស្ស៊ីប៉ុណ្ណោះ។

ចាប់តាំងពីរុស្ស៊ីបានឈ្លានពានលើអ៊ុយក្រែនមក កិច្ចសហប្រតិបត្តិការពាណិជ្ជកម្មត្រូវបាន បែកបាក់ រវាងអង់គ្លេសនិងរុស្ស៊ី ធ្វើឲ្យការបាញ់បង្ហោះត្រូវបានពន្យារពេល។​ ទោះបីជាមានការរអាក់រអួល នៅឆ្នាំនេះក៏ដោយ ក្រុមហ៊ុនអង់គ្លេសបាននិយាយថា ខ្លួននៅតែស្ថិតនៅលើផ្លូវសមប្រកបដដែល ដោយមានផែនការថានឹងធ្វើការគ្របដណ្តប់ជាសកលនៅឆ្នាំក្រោយជាមួយនឹងផ្កាយរណបគ្រោងទុកចំនួន ៦៤៨គ្រឿង ដោយផ្កាយរណប OneWeb នីមួយៗមានទម្ងន់ប្រហែល ១៥០ គីឡូក្រាម៕

ប្រភព៖ALJAZEERA

ប្រភពរូប៖ALJAZEERA
ប្រែសម្រួល៖សុខ តុលា