កោះកុង៖ ក្រុមហ៊ុនចិនមួយ បានបង្ហាញចំណាប់អារម្មណ៍ចង់បង្កើតរោងចក្រនិងដំឡើងរថយន្តអគ្គិសនីក្នុងភូមិសាស្ត្រខេត្តកោះកុងបន្ទាប់ពីមើលឃើញសក្តានុពលវិនិយោគរបស់ខេត្តជាប់សមុទ្រនេះ។
នៅក្នុងជំនួបពិភាក្សាការងារជាមួយលោកស្រី មិថុនា ភូថង អភិបាលខេត្តកោះកុង កាលពីចុងសប្តាហ៍មុន លោក លីវ ឈាន់ហ្វូ (LIU CHUANFU) អគ្គនាយកក្រុមហ៊ុន China Matrix Technology Group-Horche Intelligent Automobile បានចាប់អារម្មណ៍ និងមានគោលបំណងបោះទុនវិនិយោគលើវិស័យបច្ចេកវិទ្យាឧស្សាហកម្មដោយនឹងបង្កើតរោងចក្រនិងដំឡើងរថយន្តអគ្គិសនីក្នុងភូមិសាស្ត្រខេត្តកោះកុងកម្ពុជា។
លោកស្រី មិថុនា ភូថង បានស្វាគមចំពោះគោលបំណងបោះទុនវិនិយោគលើវិស័យបច្ចេកវិទ្យាឧស្សាហកម្ម និងបង្កើតរោងចក្រ ដំឡើងរថយន្តអគ្គិសនីក្នុងភូមិសាស្ត្រខេត្តកោះកុងនេះ។
លោកស្រីអភិបាលខេត្ត បានលើកឡើងថា៖ជំនួបនេះ គឺជាការបើកឱកាសមួយសម្រាប់រដ្ឋបាលខេត្តកោះកុង ដើម្បីកសាងទំនាក់ ទំនងល្អប្រសើរ និងដើម្បីអាចឱ្យក្រុមហ៊ុនវិនិយោគចិនបានឈ្វេងយល់ពីគោលនយោបាយ កិច្ចសហប្រតិបត្តិការដីធ្លី ធនធានមនុស្ស និងសក្តានុពលនានាពាក់ព័ន្ធនឹងវិស័យបច្ចេកវិទ្យា ឧស្សាហកម្ម រថយន្តអគ្គិសនីក្នុងខេត្តកោះកុង។
ប្រជាជនប្រមាណ ៥៥,៥% ជាកសិកររស់នៅពឹងផ្អែកលើវិស័យកសិកម្មដែលជាវិស័យចម្បង ក្នុងការទ្រទ្រង់ជីវភាពរស់នៅប្រចាំថ្ងៃ។ក្រៅពីវិស័យកសិកម្ម នៅមានវិស័យផ្សេងៗទៀតដូចជាវិស័យឧស្សាហកម្ម ០,៣% វិស័យសេវាកម្ម ៤៤,២% ក្នុងនោះកម្លាំង ពលកម្មដែលជាកម្មករ កម្មការិនី បម្រើការងារក្នុងរោងចក្រ សហគ្រាស និងវិស័យឯកជនមានប្រមាណ ១៥,១% នៃប្រជាជនសរុប។វិស័យរ៉ែ និងថាមពល បានផ្ដល់ភាពទូលំទូលាយ ដល់អ្នកវិនិយោគទាំងឡាយ ដើម្បីអភិវឌ្ឍវារីអគ្គិសនីខ្នាតតូច និងជំរុញការអភិវឌ្ឍបច្ចេកវិទ្យាប្រកបដោយគុណភាពខ្ពស់ស្របតាមស្តង់ដាអន្តរជាតិមានតម្លៃថោកសមរម្យ និងមានសេវាកម្មទំនើបគ្របដណ្តប់ទូទាំងខេត្ត។
លោកស្រី បានឱ្យដឹងថា នៅកោះកុង មានវារីអគញគិសនីចំនួន៣៖១- វារីអគ្គិសនី ស្ទឹងឫស្សីជ្រុំក្រោម មានអានុភាពតម្លើង ៣៣៨មេហ្គាវ៉ាត់។២- វារីអគ្គិសនីគិរីរម្យ៣ មានអានុភាពតម្លើង ១៨មេហ្គាវ៉ាត់ និង៣- វារីអគ្គិសនីស្ទឹងតាតៃមានអានុភាពតម្លើង ២៤៦មេហ្គាវ៉ាត់។
ក្នុងឆ្នាំ២០២១ ខេត្កោះកុងតមានឧស្សាហកម្មធុនធំចំនួន ០៧រោងចក្រ សហគ្រាស មានចំនួនកម្មករ និយោជិកចំនួន ១០,៨៤៣នាក់ ដែលក្នុងនោះមានរោងចក្រតំឡើងរថយន្ត បង្គុំខ្សែភ្លើង គ្រឿងអេឡិចត្រូនិច វាយនភ័ណ្ឌកាត់ដេរ សំលៀកបំពាក់ សម្ភារកីឡា។ល។ សហគ្រាសធុនតូច មធ្យម និងសិប្បកម្ម ដែលមានចំនួន ៧៥៥ មូលដ្ឋាន។
កោះកុងជាខេត្តដែលស្ថិតនៅបែកនិរតីនៃប្រទេសកម្ពុជា មានចំងាយប្រមាណ ២៩០គីឡូម៉ែត ពីរាជធានីភ្នំពេញ ដោយមានខ្សែផ្លូវជាតិដ៏សំខាន់ចំនួន២ ក្នុងការតភ្ជាប់គឺផ្លូវជាតិលេខ៤ និងផ្លូវជាតិ លេខ៤៨ ក្នុងនោះខេត្តកោះកុងក៏មានព្រលានយន្តហោះខ្នាតអន្តរជាតិចំនួន០១ គឺព្រលានយន្តហោះតារាសាគរ ស្ថិតក្នុងតំបន់វិស្សមកាលតារាសាគរ នៃក្រុមហ៊ុនយូញៀន ក្នុងស្រុកគិរីសាគរ។
ក្រៅពីផ្លូវ គោក និងផ្លូវអាកាស ខេត្តកោះកុង ក៏កំពុងត្រូវបានសាងសង់កំពង់ផែទឹកជ្រៅ និងផ្លូវនាវាចរ និងហេដ្ឋារចនាសម្ព័ន្ធសំខាន់ៗដទៃទៀតផងដែរ ក្នុងនោះច្រកទ្វារព្រំដែនអន្តរជាតិចាំយាម កម្ពុជា-ថៃ ក៏ជាច្រកព្រំដែនដ៏សំខាន់មួយក្នុងនោះការដោះដូរទំនិញ កសិកម្ម ការវិនិយោគ និងពាណិជ្ជកម្មចម្រុះ។ខេត្តបាននិងកំពុងធ្វើការទំនាក់ទំនង និងបន្តកិច្ចសហប្រតិបត្តិការជាមួយខេត្តត្រាត ប្រទេសថៃ ក្នុងការបង្កើនបរិយាកាសកក់ក្ដៅសម្រាប់ការធ្វើអាជីវកម្ម រវាងប្រទេសទាំងពីរ។ បន្ថែមលើសនេះទៀត ខេត្តបានពង្រីកទំនាក់ទំនងរបស់ខ្លួនជាមួយខេត្តកាម៉ៅ និងខេត្តគៀនយ៉ាងនៃប្រទេសវៀតណាម និងខេត្តជីលីន ខេត្តយូណាន នៃប្រទេសចិន៕ដោយៈសិរីមតី
