«The Rock» ឬលោក Dwayne Johnson អតីតកីឡាកាសរបស់ស្ថាប័ន WWE និងដែលឥឡូវនេះ ជាតារាសម្តែងជួរមុខរបស់ហូលីវូដ និងដែលកំពុងមានភាពយន្តខ្នាតធំ «Black Adam» បានផ្ដល់ចម្លើយថា លោកគឺជាអ្នកគាំទ្ររបស់ Liverpool ដែលជាក្លិបយក្ស នៅក្របខ័ណ្ឌ Premier League អង់គ្លេស ដោយការលាតត្រដាងឱ្យដឹងនេះ នាំឱ្យអ្នកគាំទ្ររបស់ក្រុមហង្សក្រហមញញឹមបិទមាត់មិនជិតនោះទេ។
![](https://cambodiaflashnews.com/wp-content/uploads/2021/06/top-banner.gif)
តារាសម្តែងជនជាតិអាមេរិកវ័យ ៥០ឆ្នាំ បានប្រាប់ពីឈ្មោះក្លិបបាល់ទាត់ ដែលគាត់ចូលចិត្ត ក្នុងអំឡុងពេលផ្ដល់បទសម្ភាសជាមួយសារព័ត៌មានកីឡាឈានមុខគេ talkSPORT ថ្មីៗនេះ ដោយមាន លោក Sam Ellard ជាអ្នកសួរ។
-លោក Ellard៖ «តើមានក្រុមបាល់ទាត់ ដែលអ្នកតាមគាំទ្រដែរទេ?»
-The Rock៖ «បាទ! មាន»។
-លោក Ellard៖ «តើក្រុមមួយណា?»
-The Rock៖ «លោកក៏ដឹងរួចហើយតើ»។
-លោក Ellard៖ «អឺណា! ប្រាប់ខ្ញុំបន្តិចមក»។
-The Rock៖ «មោទនភាពចំពោះក្រុមតំបន់ Cheshire»។
-លោក Ellard៖ «អូ! មែនហើយ! ប្រាកដជា Liverpool»។
-The Rock៖ «បាទ! មែន»។
-លោក Ellard៖ «តើលោកជាអ្នកគាំទ្រ Liverpool មែនទេ?»។
-The Rock៖ «បាទ! មែន»។
-លោក Ellard៖ «អូខេ! ពិសេសណាស់ ការប្រកួត កាលពីថ្ងៃអាទិត្យ (Liverpool យកឈ្នះ Manchester City ១-០) គឺជាលទ្ធផលល្អ មិនអ៊ីចឹងឬ?»។
-The Rock៖ «ខ្ញុំក៏ថាបែបហ្នឹងដែរ»។
សម្រាប់ «The Rock» បានចាប់ផ្តើមអាជីព ក្នុងវិស័យកីឡា ដោយការធ្វើជាកីឡាករបាល់ទាត់អាមេរិកាំង (American Football) ប៉ុន្តែមិនទទួលបានជោគជ័យនោះទេ មុនពេលងាកមកចាប់ប្រឡូកលើសង្វៀនកីឡាកាស ក្នុងឆ្នាំ១៩៩៦ ដែលទទួលបាននូវភាពរុងរឿងយ៉ាងខ្លាំង រហូតក្លាយជាស៊ុបភើស្តារលំដាប់លេខ១ ក្នុងវិស័យនេះ និងឈ្នះជើងឯកពិភពលោកសរុប ១០សម័យកាល (៨ដងជាមួយ WWE និង ២ដងជាមួយ WCW)។
បន្ទាប់ពីឆ្អែតឆ្អន់នឹងកីឡាកាស លោក Johnson បានចាប់ផ្ដើមចូលក្នុងវិស័យសិល្បៈម្ដង ហើយបានសាងកេរ្តិ៍ឈ្មោះក្នុងរឿង « The Scorpion King» (ឆ្នាំ២០០២) ដោយបន្ទាប់ពីនោះ លោកបានដើរជាតួឯកក្នុងរឿងល្បីៗជាច្រើន ដូចជា «Fast Five» (២០១១), «Journey 2: The Mysterious Island» (២០១២), «G.I. Joe: Retaliation» (២០១៣), Fast & Furious (២០១៣), «Hercules» (២០១៤), «Furious 7» (២០១៥), «San Andreas» (២០១៥), «Rampage» (២០១៨), «Hobbs & Shaw» (២០១៩), «Jumanji: The Next Level» (២០១៩) និងថ្មីៗបំផុតចុងក្រោយនេះ »Black Adam» (២០២២)៕