កំពត៖រដ្ឋបាលខេត្តកំពត គ្រោងបង្កើតឆ្នេរសមុទ្រថ្មី មួយកន្លែងនាពេលឆាប់ៗ ខាងមុខនេះ នៅឃុំជុំគ្រៀល ស្រុកទឹកឈូ ខេត្តកំពត ដើម្បីបង្កើនភាពទាក់ទាញទេសចរណ៍ឱ្យបានកាន់តែសម្បូរបែប ក៏ដូចជាការជំរុញការងារអភិវឌ្ឍតំបន់ឆ្នេរសមុទ្រក្នុងខេត្តឱ្យបានស្អាតសមជាខេត្តគោលដៅទេសចរណ៍ព្រមទាំង ឆ្លើយតបតម្រូវការជូនដល់ភ្ញៀវទេសចរជាតិ-អន្តរជាតិ ដែលទៅសម្រាកទស្សនាកម្សាន្តឱ្យបានកាន់តែល្អប្រសើរឡើង ថែមទៀត ទៅថ្ងៃអនាគត។
ទាក់ទងនឹងគម្រោងបង្កើតឆ្នេរថ្មីនេះ កាលពីថ្ងៃទី២១ ខែតុលា ឆ្នាំ២០២២ អភិបាលខេត្តកំពតលោក ម៉ៅ ធនិន បានដឹកនាំមន្ត្រីជំនាញ កងកម្លាំង និងអាជ្ញាធរពាក់ព័ន្ធក្រោមឱវាទ ចុះពិនិត្យទីតាំងគ្រោងបង្កើតឆ្នេរសមុទ្រថ្មីនេះ ។
លោក ម៉ៅ ធនិន បានឱ្យដឹងថា គម្រោងខាងលើនេះក៏មានភ្ជាប់ជាមួយនឹងគម្រោងពង្រីកផ្លូវដែលមានទំហំទទឹង៦០ម៉ែត្រ តាមដងព្រែក ដើម្បីឆ្ពោះទៅចូលកាន់តំបន់ឆ្នេរខ្សាច់នោះ។ ទន្ទឹមនឹងនេះរដ្ឋបាលខេត្ត បានត្រៀមដីទំហំប្រមាណ ៥ហិកតាជាប់នឹងមាត់សមុទ្រ ដើម្បីរៀបចំជាសួនកម្សាន្តផងដែរ។
តាមចក្ខុវិស័យរបស់រដ្ឋបាលខេត្ត គម្រោងបង្កើតឆ្នេរខ្សាច់ថ្មីនៃខេត្តកំពត ពិតជាមានសារៈសំខាន់ និងបានផ្ដល់ផលប្រយោជន៍ជាច្រើន ពិសេសការផ្ដល់នូវចំណូលសម្រាប់ខេត្ត និងចំណូលដល់ជីវភាពរបស់ប្រជាពលរដ្ឋក្នុងខេត្តលើ សេវាកម្មទេសចរណ៍ ទាំងការស្នាក់នៅ ការហូបចុក និងសេវាកម្មផ្សេងៗទៀត៕ដោយៈផាវី
