ខ្សែប្រយុទ្ធឆ្នើម Cristiano Ronaldo របស់ក្រុមបិសាចក្រហម Manchester United បានបង្ហោះសារបន្ធូរអារម្មណ៍នៅលើបណ្ដាញសង្គម Instagram របស់ខ្លួន បន្ទាប់ពីមានរឿងរ៉ាវដ្រាម៉ា (រឿងមិនសប្បាយចិត្ត) រហូតនាំឱ្យក្លិបដកមិនឱ្យមានចំណែករួមក្នុងការប្រកួតជាមួយក្រុមតោខៀវ Chelsea នៅក្របខណ្ឌ Premier League នៅថ្ងៃសៅរ៍ ទី២២ ខែតុលានេះ។
![](https://cambodiaflashnews.com/wp-content/uploads/2021/06/top-banner.gif)
កីឡាករ ដែលគេស្គាល់ថា «CR7» បង្កើតបញ្ហាបំបាក់មុខខ្លួន ដោយត្រូវបានចោទថា បានដើរចេញពីទីលាន ហើយតម្រង់ឆ្ពោះចូលទៅក្នុងឧម្មង្គ (ច្រកចូលទៅផ្នែកក្នុងកីឡដ្ឋាន) មុនពេលបញ្ចប់ការប្រកួត ដែលក្រុមបិសាចក្រហម មានជ័យជម្នះ ២-០ លើក្រុម Tottenham Hotspur (Spurs) នៅកីឡដ្ឋាន Old Trafford កាលពីថ្ងៃពុធ។
សម្រាប់ហេតុផល ដែលនាំឱ្យ Ronaldo បញ្ចេញអាកប្បកិរិយាបែបនេះ មានការលាតត្រដាងពីកាសែតដ៏ល្បីល្បាញ Daily Mail នៅអង់គ្លេស ដែលថា លោក Erik ten Hag បានប្រាប់ទៅកីឡាករវ័យ ៣៧ឆ្នាំ ពីការផ្លាស់ប្ដូររូបគេនៅចុងម៉ោង ប៉ុន្តែរូបគេសុំមិនចូលលេងទេ ហើយភ្លាមៗនោះក៏ដើរចេញតែម្ដង។ ក្រោយហេតុការណ៍នោះ ក្លិប Man United បានចេញសេចក្តីថ្លែងការណ៍ហាមកីឡាករ Ronaldo ក្នុងការរួមដំណើរជាមួយក្រុម ដែលត្រូវទៅសួរសុខទុក្ខក្រុមតោខៀវ នៅកីឡដ្ឋាន Stamford Bridge។
បន្ទាប់ពីស្ងប់ស្ងាត់មួយរយៈធំ ពេលនេះ កីឡាករ Ronaldo បានបង្ហោះសារហូរហែថា៖ «អ្វីដែលខ្ញុំបានធ្វើពេញមួយអាជីពរបស់ខ្ញុំ គឺការព្យាយាមមានជីវិតរស់នៅ ហើយលេងដោយមានក្ដីគោរព ចំពោះមិត្តរួមក្រុម គូប្រកួត និងគ្រូបង្វឹកគ្រប់រូប។ រឿងនោះមិនដែលផ្លាស់ប្តូរនោះឡើយ។ ខ្ញុំមិនដែលផ្លាស់ប្តូរទេ»។
«ខ្ញុំនៅតែជាមនុស្សដដែល និងមានវិជ្ជាជីវៈដូចដើម ដូចដែលខ្ញុំធ្វើបែបហ្នឹងរហូត ២០ឆ្នាំកន្លងមក ក្នុងការបានលេងបាល់ទាត់កម្រិតខ្ពស់ ហើយការគោរពចំពោះតួនាទីនៃការលេងបាល់ទាត់របស់ខ្ញុំ គឺជារឿងសំខាន់បំផុតក្នុងការសម្រេចចិត្តរបស់ខ្ញុំ»។
«ខ្ញុំចាប់ផ្តើមអាជីពជាកីឡាករតាំងពីក្មេង។ កីឡាករ ដែលមានវ័យចំណាស់ និងមានបទពិសោធច្រើន តែងតែជាគំរូដ៏ល្អ សម្រាប់ខ្ញុំជានិច្ច ហេតុដូច្នេះហើយ ខ្ញុំតែងព្យាយាមធ្វើខ្លួនឯងឱ្យក្លាយជាគំរូដល់កីឡាករក្មេងៗ ដែលនឹងមកបន្តវេននៅគ្រប់ៗក្រុម ដែលខ្ញុំប្រកបអាជីពជាមួយ»។
«ជាសំណាងមិនល្អ វាមិនតែងតែអាចទៅរួចគ្រប់ពេលវេលានោះទេ ហើយពេលខ្លះ អារម្មណ៍នៅពេលវេលានោះ បានមកគ្របសង្កត់យើង។ ឥឡូវនេះ ខ្ញុំមានអារម្មណ៍ថា ខ្ញុំត្រូវតែប្រឹងប្រែងយ៉ាងខ្លាំង នៅ Carrington (កន្លែងហ្វឹកហាត់របស់ Man United) ផ្ដល់ការគាំទ្រដល់មិត្តរួមក្រុមរបស់ខ្ញុំ និងត្រៀមគ្រប់យ៉ាង នៅពេលមានឱកាសចូលទីលាន»។
«ការបង្កើនសម្ពាធ មិនមែនជាជម្រើសល្អទេ។ វាមិនដែលដូចនោះឡើយ។ នេះគឺជាក្រុម Manchester United ហើយពួកយើងត្រូវតែឈរក្នុងសាមគ្គីភាព។ ឆាប់ៗនេះ ពួកយើងនឹងត្រឡប់មកនៅរួមគ្នាម្តងទៀត»។ សារបន្ថែមចុងក្រោយរបស់កីឡាករ Ronaldo៕