លោក Paul Merson ដែលជាអតីតកីឡាករដ៏ឆ្នើមម្នាក់របស់ក្រុមកាំភ្លើងធំ Arsenal បានលើកឡើងថា ខ្សែប្រយុទ្ធ Erling Haaland នឹងមិនអាចស៊ុតបញ្ចូលទីបានក្រាស់ក្រែលបែបនេះឡើយ បើមិនមានអ្នកបញ្ជូនបាល់ឱ្យបានយ៉ាងចំៗល្អនោះ ជាឧទាហរណ៍ ប្រសិនបើកីឡាករ Haaland ទៅលេងនៅលីគកម្រិតទី៣ League Two នោះ ប្រាកដណាស់ រូបគេនឹងមិនអាចទម្លុះសំណាញ់ទីបាន ៦០គ្រាប់នោះទេ។
ទោះបីជាទើបតែផ្ទេរពីក្លិប Borussia Dortmund កាលពីរដូវក្តៅមុននេះក៏ដោយ ប៉ុន្តែកីឡាករ Haaland អាចបង្ហាញនូវទម្រង់លេងយ៉ាងអស្ចារ្យជាមួយក្រុមមេឃខៀវ Manchester City ភ្លាមៗ ដោយស៊ុតបញ្ចូលទីបាន ២០គ្រាប់ ពីការបង្ហាញខ្លួន ១៤លើក គិតក្នុងការប្រកួត នៅគ្រប់កម្មវិធីទាំងអស់ ដែលសមិទ្ធផលនោះ ធ្វើឱ្យមនុស្សជាច្រើនលើកសរសើររូបគេថា នឹងអាចសាងកេរ្តិ៍ឈ្មោះជាមួយនឹងការលេងនៅទឹកដីអង់គ្លេសបាន ដោយមិនយូរ ក៏ឆាប់។
តែយ៉ាងណា លោក Merson បាននិយាយថា៖ «ក្រុម Manchester City បានឈ្នះ Premier League ៤ដង ក្នុងចំណោម ៥រដូវកាលចុងក្រោយ។ ប៉ុន្តែដោយមានការប្រកួតប្រជែង នៅព្រឹត្តិការណ៍ World Cup ក្នុងរដូវកាលនេះនោះ កីឡាករ Haaland នឹងមិនបានលេងរយៈពេលដល់ទៅ ៦សប្តាហ៍ (ក្រុមជម្រើសជាតិន័រវែសមិនបានលេងនៅ World Cup 2022)»។
«រូបគេត្រូវការអ្នកដែលចាំបញ្ជូនបាល់ឱ្យ។ គ្រប់គ្នាតែងតែនិយាយថា គេមានសមត្ថភាពពូកែប៉ុនណា ល្អប៉ុនណា ធ្វើចលនាលឿនរហ័សបានល្អកម្រិតណា និងមានកម្លាំងកាយរឹងមាំប៉ុនណា ប៉ុន្តែប្រសិនបើមិនមានការបញ្ជូនបាល់ចំៗល្អទេនោះ រូបគេក៏នឹងមិនបានទទួលបាល់ ហើយមានឱកាសស៊ុតបញ្ចូលទីដែរ។ ទោះបីជារូបគេផ្លាស់ទីបានលឿនយ៉ាងណាក៏ដោយ ប្រសិនបើលេងនៅ League Two វិញនោះ ច្បាស់ណាស់ រូបគេក៏នឹងមិនមានផ្លូវរកបាន ៦០គ្រាប់ដែរ។ ខ្ញុំនិយាយនេះ ដោយសារធ្លាប់ធ្វើជាអ្នកចាត់ការក្រុម Walsall (២០០៣-២០០៦) នៅក្របខ័ណ្ឌនោះកាលពីមុន»៕
