ភ្នំពេញ៖ពិព័រណ៍ការងារ និងផលិតភាពជាតិ ឆ្នាំ២០២២ នៅថ្ងៃទី២៨-២៩ ខែតុលា ឆ្នាំ២០២២នាមជ្ឈមណ្ឌលកោះពេជ្រ រាជធានីភ្នំពេញ នឹងផ្តល់ឱកាសការងារជាង២ម៉ឺនកន្លែងដល់យុវជន។ពិព័រណ៍នេះ ប្រមូលផ្តុំនិយោជកធំៗ គ្រប់វិស័យ ប្រមាណ ១៥០ ដែលនឹងប្រកាសជ្រើសរើសបេក្ខជន គ្រប់មុខតំណែង ស្របតាមចំណេះ ជំនាញ និងសមត្ថភាព។
យោងតាមទីភ្នាក់ងារជាតិមុខរបរ និងការងារ(NEA) នៃក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថាព្រឹត្តិការណ៍នេះ នឹងមានការចូលរួមពីវិស័យនាំមុខគេជាច្រើន រួមមានធនាគារ គ្រឹះស្ថានមីក្រូហិរញ្ញវត្ថុ និងធានារ៉ាប់រង, សេវាកម្មលក់ដុំ និងរាយ, ទេសចរណ៍ និងបដិសណ្ឋារកិច្ច, ម្ហូបអាហារ និងភេសជ្ជៈ, អចលនទ្រព្យ, សេវាកម្ម ព្រមទាំងវិស័យឧស្សាហកម្ម និងកម្មន្តសាល ។
ពិព័រណ៍ការងារថ្នាក់ជាតិ គឺជាអន្តរាគមន៍ ទីផ្សារការងារដ៏ធំ និងមានលក្ខណៈប្រមូលផ្តុំ ដែលត្រូវបានរៀបចំឡើង ក្នុងមួយឆ្នាំម្តង បន្ថែមទៅលើការផ្តល់សេវាការងារ ជាប្រចាំថ្ងៃ សំដៅពង្រីកការផ្សព្វផ្សាយ បង្កើនការយល់ដឹង និងការត្រៀមខ្លួនចូលទីផ្សារការងារ ឱ្យកាន់តែទូលំទូលាយ ដល់គ្រប់ភាគីពាក់ព័ន្ធ។ ជាពិសេស ព្រឹត្តិការណ៍ ឆ្នាំ២០២២ នេះ ត្រូវបានរៀបចំឡើង ដោយជុំគ្នាផ្ទាល់ជាថ្មីឡើងវិញ បន្ទាប់ពីស្ថានភាពកូវីដ-១៩ បានធូរស្រាល៕ដោយៈផាវី
