ក្រុមបិសាចក្រហម Manchester United បង្កើតបាននូវទម្រង់លេងមួយ ក្នុងចំណោមទម្រង់លេងដ៏ល្អបំផុតរបស់ពួកគេ នារដូវកាលនេះ ខណៈដែលការស៊ុតបញ្ចូលទីពីកីឡាករ Fred និង Bruno Fernandes បានជួយដណ្ដើមជ័យជម្នះយ៉ាងត្រចះត្រចង់ ២-០ លើក្រុមភ្ញៀវ Tottenham Hotspur (Spurs) នៅក្របខ័ណ្ឌ Premier League កាលពីថ្ងៃពុធ។
ក្រុមម្ចាស់ផ្ទះ Man United បានធ្វើការស៊ុតយ៉ាងសន្ធាប់ដល់ទៅ ១៩លើក តម្រង់ទីរបស់ក្រុម Spurs នៅវគ្គទី១ តែមិនមានគ្រាប់បាល់សូម្បី ១គ្រាប់ ដោយការព្យាយាមស៊ុតកោងរបស់កីឡាករ Antony បានបុកបង្គោលទី ហើយការស៊ុតទាត់យ៉ាងពេញកម្លាំងរបស់កីឡាករ Marcus Rashford ដែលត្រូវបានសង្គ្រោះបានយ៉ាងល្អពីអ្នកចាំទី គឺជាការស៊ុតយ៉ាងល្អបំផុត ដែលប៊ិះនឹងមានគ្រាប់បាល់នាំមុខ។
តែទោះជាយ៉ាងណាក្ដី វាក៏មិនចំណាយពេលយូរនោះទេ ដើម្បីបំបែកភាពជាប់គាំង ក្នុងការប្រកួតនេះ ដោយការស៊ុតរបស់កីឡាករ Fred បានប្លាតផុតដៃអ្នកចាំទី Hugo Lloris របស់ក្រុម Spurs ចូលទីយ៉ាងស្អាត ដែលកើតឡើងមិនដល់ ២នាទីផង ក្នុងវគ្គទី ២ ហើយក្រុម Man United សមនឹងទទួលបាន ៣ពិន្ទុពីការប្រកួតនេះ នៅពេលដែលកីឡាករ Fernandes បន្ថែមការនាំមុខ ២-០ នៅនាទីទី៦៩។
ក្រុមម្ចាស់ផ្ទះមានឱកាសបន្ថែមគ្រាប់បាល់ទៀត ដើម្បីធ្វើឱ្យលទ្ធផលកាន់តែងាយស្រួលជាងនេះ ប៉ុន្តែ ២គ្រាប់នេះ គឺគ្រប់គ្រាន់ ក្នុងការធ្វើឱ្យក្រុមលេខ ៥ Man United មានគម្លាតក្នុងរង្វង់ ៤ពិន្ទុពីក្រុម Spurs ដែលឈរនៅលេខ៣។
ក្រុមរបស់លោក Erik Ten Hag ធ្វើការស៊ុតដល់ទៅ ២៨ដង ក្នុងការប្រកួតនេះ ដែលជាចំនួនច្រើនបំផុតរបស់ក្រុមមួយ ក្នុងហ្គេម នៅ Premier League នារដូវកាលនេះ។ វាក៏ជាចំនួនដ៏ច្រើន ក្នុងការប្រឈមនឹងការប្រកួតនៅលីគកម្រិតកំពូលជាមួយក្រុមក្រោមការដឹកនាំរបស់លោក Antonio Conte ដោយនេះជាការប្រកួតក្នុងលីគលើកទី៣១៨ ដែលគាត់បានដឹកនាំ រវាងនៅ Serie A និង Premier League៕