សហព័ន្ធកីឡាបាល់ទាត់របស់ប្រទេសកូសា្តរីកា (FCRF) បានប្រកាសកាលពីថ្ងៃអង្គារថា ខ្សែបម្រើ Orlando Galo របស់ក្រុមជម្រើសជាតិកូស្តារីកា បានធ្វើតេស្តវិជ្ជមាន ចំពោះសារធាតុហាមឃាត់ ក្នុងខែកញ្ញា។
![](https://cambodiaflashnews.com/wp-content/uploads/2021/06/top-banner.gif)
កីឡាករ Galo វ័យ ២២ឆ្នាំ ត្រូវបានរកឃើញថា មានសារធាតុជំនួយសាច់ដុំម៉្យាង នៅក្នុងទឹកនោមរបស់គេ អំឡុងការត្រួតពិនិត្យ បន្ទាប់ពីការប្រកួតស្មើ ២-២ ជាមួយកូរ៉េខាងត្បូង កាលពីខែមុន។
FCRF បានឱ្យដឹងថា៖ «សហព័ន្ធបាល់ទាត់កូស្តារីកា សូមប្រកាសថា សហព័ន្ធបានទទួលលិខិតពី សហព័ន្ធបាល់ទាត់អន្តរជាតិ (FIFA) ដែលជូនដំណឹងពីលទ្ធផលនៃការធ្វើតេស្តរកសារធាតុជំនួយកម្លាំងផ្សេងៗ ហើយកីឡាករ Orlando Galo Calderon បានធ្វើតេស្តវិជ្ជមាន ចំពោះសារធាតុហាមឃាត់»។
កីឡាករ Galo មានពេលចន្លោះពី ៣ ទៅ ៧ថ្ងៃ ដើម្បីធ្វើការប្តឹងឧទ្ធរណ៍ ហើយបន្ទាប់ពីរយៈពេលនោះ FIFA នឹងសម្រេចថា តើត្រូវដាក់ពិន័យ ឬអត់។
ក្រុមជម្រើសជាតិកូស្តារីកា នឹងត្រូវចាប់ផ្តើមយុទ្ធនាការនៅឯព្រឹត្តិការណ៍ World Cup នាប្រទេសកាតា សម្រាប់ការប្រកួតក្នុងពូល E របស់ខ្លួន ទល់នឹងក្រុមអេស្ប៉ាញ នៅថ្ងៃទី២៣ ខែវិច្ឆិកា មុននឹងជួបជាមួយក្រុមជប៉ុន និងអាល្លឺម៉ង់តាមលំដាប់លំដោយ៕