ប្រទេសឥណ្ឌូណេស៊ីនឹងវាយកម្ទេច ហើយសាងសង់ជាថ្មីឡើងវិញនូវកីឡដ្ឋានបាល់ទាត់ ដែលមានកើតហេតុការណ៍រត់ជាន់គ្នា រហូតបណ្ដាលឱ្យមនុស្សជាង ១៣០នាក់ បានបាត់បង់ជីវិតកាលពីដើមខែ។ នេះបើតាមការអះអាងរបស់លោក Joko Widodo កាលពីថ្ងៃអង្គារ ទី១៨ ខែតុលា ខណៈដែលប្រធានាធិបតីឥណ្ឌូណេស៊ីរូបនេះ ប្ដេជ្ញាកែប្រែវិស័យកីឡានេះទាំងស្រុង ក្នុងប្រជាជាតិដែលងប់នឹងបាល់ទាត់។
លោក Widodo បានលើកឡើងបែបនេះ អំឡុងពេលធ្វើសន្និសីទកាសែត បន្ទាប់ពីជួបជាមួយប្រធានសហព័ន្ធបាល់ទាត់អន្តរជាតិ (FIFA) លោក Gianni Infantino ដោយលោកបានអះអាងថា លោកបានយល់ព្រមជាមួយប្រធានគ្រប់គ្រងស្ថាប័នបាល់ទាត់ពិភពលោកលើការផ្លាស់ប្តូរចំពោះរបៀបគ្រប់គ្រងកីឡាបាល់ទាត់នៅឥណ្ឌូណេស៊ី ឱ្យស្របតាមស្ដង់ដា (មាត្រដ្ឋាន) របស់ FIFA។
លោកប្រធានាធិបតី Widodo បានថ្លែងថា៖ «កីឡដ្ឋាន Kanjuruhan នៅក្រុង Malaangនឹងត្រូវកម្ទេចចោល ហើយសាងសង់ឡើងវិញ ឱ្យស្របតាមស្តង់ដារបស់ FIFA»។
ការជួបគ្នា រវាងលោក Widodo និងលោក Infantino ធ្វើឡើងបន្ទាប់ពីឥណ្ឌូណេស៊ី និង FIFA បានយល់ព្រមបង្កើតក្រុមការងាររួមមួយ ក្រោយកើតមានសោកនាដកម្ម នៅកីឡដ្ឋាន ហើយខណៈឥណ្ឌូណេស៊ី ត្រៀមខ្លួនធ្វើជាម្ចាស់ផ្ទះសម្រាប់ការប្រកួត World Cup អាយុក្រោម ២០ឆ្នាំ នាឆ្នាំក្រោយ។
ហេតុការណ៍រត់ជាន់គ្នា បន្ទាប់ពីការប្រកួតបាល់ទាត់ ក្នុងលីគ កាលពីថ្ងៃទី១ ខែតុលា ត្រូវបានដាក់កំហុសទៅលើក្រុមប៉ូលិស ដែលបាញ់ឧស្ម័នបង្ហូរទឹកភ្នែកក្នុងកីឡដ្ឋាន ពោលគឺជាវិធានការគ្រប់គ្រងក្រុមមនុស្ស ដែលហាមឃាត់ដោយ FIFA។ លោក Infantino ថ្លែងនៅពេលឈរជាមួយលោក Widodo ថា អាទិភាពចម្បងរបស់ FIFA គឺការធានាសុវត្ថិភាព សម្រាប់ទាំងកីឡាករ និងអ្នកគាំទ្រ នៅប្រជាជាតិអាស៊ីអាគ្នេយ៍។
«នេះគឺជាប្រទេសបាល់ទាត់ ពោលគឺជាប្រទេសដែលមនុស្សជាង ១០០លាននាក់ មានចំណូលចិត្តលើបាល់ទាត់។ យើងមានកាតព្វកិច្ចថែរក្សាពួកគេ ដោយនៅពេលគេមើលការប្រកួត យើងត្រូវធានាថា ពួកគេមានសុវត្ថិភាព»។ លោក Infantino បានបន្ថែម។
ដោយរងសម្ពាធឱ្យពន្យល់ពីអ្វីដែលបណ្តាលឱ្យមានការរត់ជាន់គ្នាស្លាប់ ក្នុងកីឡដ្ឋាននេះ ក្រុមស្វែងរកការពិត ដែលបង្កើតឡើងដោយរដ្ឋាភិបាលឥណ្ឌូណេស៊ី បានចេញផ្សាយរបាយការណ៍មួយកាលពីសប្តាហ៍មុន ដែលសន្និដ្ឋានថា ការប្រើប្រាស់ឧស្ម័នបង្ហូរទឹកភ្នែកហួសហេតុ និងប៉ាតណាប៉ាតណី គឺជាមូលហេតុនៃការស្លាប់។
ហើយរបាយការណ៍ក៏បានកំណត់កត្តារួមចំណែកផ្សេងទៀតដែរ ដូចជាដាក់ចំនួនអ្នកចូលរួមលើសចំណុះ បិទសោទ្វារចេញចូល និងរៀបចំការប្រកួតនៅពេលយប់ ដើម្បីទទួលបានការវាយតម្លៃការប្រកួតឱ្យកាន់តែប្រសើរសម្រាប់អ្នកផ្សាយក្នុងស្រុក ទោះបីជាមានការស្នើសុំពីប៉ូលិសឱ្យរៀបចំការប្រកួតនៅពេលថ្ងៃក៏ដោយ៕
