ភ្នំពេញ៖ក្នុងសប្តាហ៍ទី២ចាប់ពីថ្ងៃទី១០-១៦ ខែតុលា ២០២២ ចំនួនទេសចរបានឡើងដល់ចំនួន៩៣៨,៩២៨នាក់ ក្នុងនោះភ្ញៀវជាតិ៩១៤,៥៤៣នាក់ និងភ្ញៀវបរទេសផ្ទៃក្នុង២៤,៣៨៥នាក់។នេះបើយោងតាមហ្វេសប៊ុករបស់ក្រសួងទេសចរណ៍កាលពីថ្ងៃទី១៨ខែតុលា។
ក្រសួងទេសចរណ៍បានឱ្យដឹងថា៖គោលដៅទេសចរណ៍សំខាន់ៗ រួមមាន៖ខេត្តកំពង់ចាម ៤០១,៩២៩នាក់,ខេត្តព្រះសីហនុ ១៣៩,៥៩១នាក់,បាត់ដំបង ១៣៥,៨៩៩នាក់, ព្រៃវែង ៦៨,៥២៥នាក់,ពោធិ៍សាត់ ៥៩,៨៤៥នាក់,សៀមរាប២៧,៨២២នាក់,ខេត្តកំពត២៣,២៤៦នាក់។
តួលេខខាងលើ មានការកើនឡើងប្រមាណ១៥០.៤៥% ធៀបនឹងសប្តាហ៍កន្លងមក។ កំណើនភ្ញៀវផ្ទៃក្នុងច្រើនក្នុងសប្តាហ៍កន្លងមក ដោយសាររដ្ឋបាលខេត្តកំពង់ចាម ព្រៃវែង និងពោធិ៍សាត់បានរៀបចំពិធីប្រណាំងទូក បណ្តែតប្រទីប អុជកាំជ្រួច និងតាំងពិព័រណ៍ ដែលបានទាក់ទាញភ្ញៀវទេសចរ និងប្រជាពលរដ្ឋជាច្រើនកុះកុរ។
ទន្ទឹមនឹងនេះ ខេត្តព្រះសីហនុបន្តទទួលបានភ្ញៀវទេសចរមកកម្សាន្តជាច្រើនក្នុងរយៈពេល២សប្តាហ៍ជាប់គ្នាបន្ទាប់ពីមានការដាក់ឱ្យដំណើរការសាកល្បងផ្លូវល្បឿនលឿនភ្នំពេញ- ព្រះសីហនុ រយៈពេល១ខែ ចាប់ពីថ្ងៃទី១-៣១ ខែតុលា ឆ្នាំ២០២២។បណ្តាខេត្តផ្សេងទៀតដែលនៅជាប់បណ្តោយដងទន្លេ បានកំពុងត្រៀមរៀបចំព្រឹត្តិការណ៍ប្រណាំងទូក ទៅតាមពេលវេលាសមស្រប និងស្ថានភាពជាក់ស្តែងក្នុងមូលដ្ឋានរបស់ខ្លួន៕ដោយៈផាវី
