គិតត្រឹមពាក់កណ្តាលខែតុលា ឆ្នាំ ២០២២ អាកាសយានដ្ឋានអន្តរជាតិតេជោ សម្រេចវឌ្ឍនភាពបានប្រមាណ ៤០% ហើយ ដោយគ្រោងនឹងបញ្ចប់ការសាងសង់ដំណាក់កាលទី១នៅឆ្នាំ ២០២៤។
![](https://cambodiaflashnews.com/wp-content/uploads/2021/06/top-banner.gif)
សេចក្ដីប្រកាសព័ត៌មានរបស់អាកាសយានដ្ឋានអន្តរជាតិតេជោបានបញ្ជាក់ថាគម្រោងកសាងអាកាសយានដ្ឋានអន្តរជាតិតេជោបច្ចុប្បន្នសម្រេចបាន៤០%ដែលបានចំណាយទឹកប្រាក់សរុប ៥២៤លានដុល្លារអាមេរិក ដោយមិនរាប់បញ្ចូលថ្លៃដី ដែលវិនិយោគរួចដោយ CAIC ដែលជាក្រុមហ៊ុនបណ្តាក់ទុនរួមគ្នារវាង រាជរដ្ឋាភិបាលកម្ពុជា ដែលតំណាងដោយរដ្ឋលេខាធិការដ្ឋានអាកាសចរស៊ីវិល និង ក្រុមហ៊ុន OCIC ។
ក្រុមហ៊ុនអភិវឌ្ឍន៍អាកាសយានដ្ឋានមួយនេះ បានឲ្យដឹងថា ក្រុមហ៊ុនបានទាញយកប្រភពទុន ដើម្បីគាំទ្រដល់ ការអភិវិឌ្ឍគម្រោងពី ដៃគូសហការជាបន្តបន្ទាប់ដែលជាក់ស្តែងកាលពីថ្ងៃទី១៤ ខែតុលានេះ មាន ធនាគារធំៗចំនួន ៥ នៅកម្ពុជា បានសម្រេចវិនិយោគសញ្ញាបណ្ណនូវ ទំហំទឹកប្រាក់សរុបចំនួន ២៣លានដុល្លារអាមេរិកដែលជាការចូលរួមគាំទ្រដល់ដំណើរការសាងសង់ ឱ្យសម្រេចតាមការគ្រោងទុក។
ធនាគារទាំង ៥ រួមមាន៖ Cathay United Bank, First Commercial Bank, Mega International Commercial Bank, Taiwan Cooperative Bank និង Union Commercial Bank។ចំពោះ អត្រាការប្រាក់របស់សញ្ញាបណ្ណនេះគឺ ៥,៥% ក្នុងមួយឆ្នាំ ជាមួយនឹងរយៈពេល ៣ឆ្នាំ ហើយត្រូវបានធានាដោយក្រុមហ៊ុន OCIC ។
គួររម្លឹកថា សម្តេចតេជោ ហ៊ុន សែន នាយករដ្ឋមន្ដ្រីនៃកម្ពុជា ធ្លាប់បានអំពាវនាវដល់ គ្រឹះស្ថានធនាគារ និងហិរញ្ញវត្ថុនានា ឱ្យជួយទិញសញ្ញាបណ្ណ របស់ក្រុមហ៊ុន CAIC ដែលសាងសង់អាកាសយានដ្ឋានអន្តរជាតិតេជោ ដែលជាការចូលរួមការអភិវឌ្ឍន៍ព្រលានយន្តហោះថ្មី ជួយកាត់បន្ថយនូវការប្រើប្រាស់ទុនពីក្រៅប្រទេស ជាមួយផលចំណេញពី អត្រាការប្រាក់ ដោយទទួលបានការធានាផ្នែកហានិភ័យស្មើសូន្យពី រាជរដ្ឋាភិបាលកម្ពុជា៕ដោយៈសិរីមតី