ខ្សែប្រយុទ្ធ Mohamed Salah បាននិយាយថា ក្រុម Liverpool នឹងមិនបោះបង់ការប្រជែងពាន នៅក្របខ័ណ្ឌ Premier League នោះទេ បន្ទាប់ពីកីឡាករសញ្ជាតិអេហ្ស៊ីបរូបនេះ ស៊ុតបញ្ចូលទីក្នុងជ័យជម្នះ ១-០ ដែលជាលទ្ធផលធ្វើឱ្យក្រុមមេឃខៀវ Manchester City រងបរាជ័យជាលើកដំបូង ក្នុងរដូវកាលនេះ កាលពីថ្ងៃអាទិត្យ។
ក្រុមហង្សក្រហម នៅតែមានគម្លាត ១០ពិន្ទុតាមពីក្រោយក្រុម Man City និង ១៤ពិន្ទុពីក្រោយក្រុមកំពូលតារាង Arsenal ប៉ុន្តែបានចាប់ផ្តើមរដូវកាលរបស់ពួកគេឡើងវិញជាមួយនឹងជ័យជម្នះក្នុងលីគជាលើកទី ៣ នារដូវកាលនេះ។
កីឡាករ Salah បាននិយាយថា៖ «ខ្ញុំផ្ទាល់ខ្លួន តែងតែចូលចិត្តលេង ដើម្បីឈ្នះពានរង្វាន់។ នៅក្នុងគំនិតរបស់ខ្ញុំ ខ្ញុំនឹងតស៊ូដើម្បីវា ប៉ុន្តែយើងត្រូវផ្តោតអារម្មណ៍បន្ថែមទៀត ហើយយកការលេងក្នុងហ្គេមមួយ ទៅបន្តហ្គេមមួយទៀត»។
គ្រូបង្វឹករបស់ក្រុមម្ចាស់ផ្ទះ លោក Jurgen Klopp ត្រូវបានពិន័យកាតក្រហម ក្នុងដំណាក់កាលចុងក្រោយនៃការប្រកួតនេះ ខណៈដែលគាត់បានចាញ់ការតវ៉ាជាមួយមន្ត្រីទីលាន ចំពោះការមិនផ្ដល់ការទាត់ហ្វ្រីឃិក ពេលកីឡាករ Salah ត្រូវបានគេប្រព្រឹត្តកំហុសលើ។
ប៉ុន្តែក្រុមភ្ញៀវ Man City ក៏មានការខឹងសម្បានឹងអាជ្ញាកណ្តាល លោក Anthony Taylor បន្ទាប់ពីគាត់មិនអនុញ្ញាតឱ្យគ្រាប់បាល់របស់ Phil Foden ទុកជាបានការ នៅដើមវគ្គទី ២ ក្រោយមានការពិនិត្យ VAR (វីដេអូជំនួយការអាជ្ញាកណ្ដាល) ឡើងវិញ។
«នេះគឺទឹកដី Anfield។»។ នេះជាសម្ដីរបស់គ្រូបង្វឹកក្រុម Man City លោក Pep Guardiola ដែលត្រូវបានគប់ដោយកាក់ចេញពីកន្លែងអ្នកគាំទ្រ ក្រោយតវ៉ា ពេលចប់ការប្រកួត ដោយសារមិនទទួលបានគ្រាប់បាល់នោះ។លោក Guardiola បានបន្ថែមថា៖ «អាជ្ញាកណ្តាលបាននិយាយជាមួយជំនួយការរបស់ខ្ញុំ និងលោក Jurgen (Klopp) នៅមុនការប្រកួត ហើយនិយាយថា ថ្ងៃនេះខ្ញុំនឹងមិនបង្កើតកំហុសស្រាលៗទេ ហើយការប្រកួតគឺបន្តលេង បន្តលេង លើកលែងតែគ្រាប់បាល់ដែលយើងស៊ុតបញ្ចូលទីប៉ុណ្ណោះ»។
សម្រាប់សមិទ្ធផលជោគជ័យទាំងអស់របស់ពួកគេក្រោមការដឹកនាំរបស់លោក Guardiola ក្រុម Man City នៅតែគ្របដណ្ដប់លើក្រុមម្ចាស់ទឹកដី Anfield ចំពោះមុខអ្នកទស្សនា ខណៈកំណត់ត្រាមិនចាញ់ក្នុងទឹកដីជាកំណត់ត្រាដ៏មានមោទនភាពរបស់ក្រុម Liverpool ដែលមានអ្នកគាំទ្រចូលរួម តាំងពីឆ្នាំ២០១៧ បន្តទៅមុខទៀត៕
