គ្រូបង្វឹករបស់ក្រុមបិសាចក្រហម Manchester United លោក Erik ten Hag សង្ឃឹមថា កីឡាកររបស់គាត់ កំពុងសន្សំគ្រាប់បាល់សម្រាប់សប្តាហ៍ក្រោយៗទៀត បន្ទាប់ពីការបង្ហាញនូវទម្រង់លេងដ៏គួរឱ្យខកចិត្ត អំឡុងជ័យជម្នះ ១-០ លើក្រុម Omonia Nicosia នៅក្របខ័ណ្ឌ Europa League កាលពីថ្ងៃព្រហស្បតិ៍។
![](https://cambodiaflashnews.com/wp-content/uploads/2021/06/top-banner.gif)
កីឡាករ Scott McTominay អាចទម្លុះសំណាញ់ទីបានពីការស៊ុតលើកទី៣៤ របស់ក្រុម Man United នៅនាទីទី៣ ក្នុងម៉ោងបន្ថែមបង្គ្រប់មានរបួស ដើម្បីបានក្លាយជាកីឡាករបម្រុងដំបូងគេបង្អស់ ដែលរកបានគ្រាប់បាល់ជ័យជម្នះ ក្រោយនាទី៩០ ក្នុងការប្រកួត នៅទ្វីបអឺរ៉ុប សម្រាប់ក្រុមបិសាចក្រហម ចាប់តាំងពីគ្រាប់បាល់និមិត្តរូបរបស់លោក Ole Gunnar Solskjaer ក្នុងវគ្គផ្ដាច់ព្រ័ត្រ នៅក្របខ័ណ្ឌ Champions League ឆ្នាំ១៩៩៩។
គ្រាប់បាល់នេះ កើតឡើងតាមមកដោយទម្រង់លេងដ៏ខ្ជះខ្ជាយរបស់កីឡាករ ក្នុងក្រុម ជាពិសេសខ្សែប្រយុទ្ធ Marcus Rashford ដែលមិនអាចបំប៉ោងសំណាញ់ទីបាន ជាមួយនឹងការស៊ុតយ៉ាងច្រើនរហូតដល់ទៅ ១០លើក។
តែយ៉ាងណាក្ដី លោក Ten Hag មិនខ្វល់ខ្វាយខ្លាំងពេកនោះទេ ចំពោះភាពខ្ចីខ្ជារបស់ក្រុម Man United ហើយរំពឹងថា ក្រុមរបស់គាត់នឹងចាប់ផ្តើមស៊ុតបញ្ចូលទីបានយ៉ាងទៀងទាត់វិញ ឆាប់ៗនេះ ហើយនៅពេលត្រូវបានសួរថា តើការឈ្នះ គឺជារឿងសំខាន់ ឬអត់ លោកបានឆ្លើយប្រាប់ទូរទស្សន៍ BT Sport ថា៖ «ទេ! វាមិនមែនទេ ព្រោះបាល់ទាត់ គឺនិយាយអំពីការស៊ុតបាល់បញ្ចូលទី»។
«យើងបានបង្កើតឱកាសយ៉ាងច្រើន ប៉ុន្តែយើងទម្លុះសំណាញ់ទីបានតែម្ដងប៉ុណ្ណោះ។ ក្រុមមានភាពអត់ធ្មត់ ពួកគេបន្តបង្កើតឱកាស ហើយបន្ទាប់មកពួកគេបានស៊ុតបញ្ចូលទី។ ខ្ញុំគ្មានការព្រួយបារម្ភអ្វីទេ ព្រោះនៅគ្រប់ការប្រកួត យើងរកគ្រាប់បាល់បាន។ ខ្ញុំមានជំនឿថា យើងនឹងបន្តធ្វើបានទៀត»។ សង្ឃឹមថា យើងកំពុងសន្សំគ្រាប់បាល់សម្រាប់សប្តាហ៍បន្ទាប់»។ គ្រូបង្វឹកសញ្ជាតិហូឡង់ បានបន្ថែម។
គ្រាប់បាល់របស់កីឡាករ McTominay គឺជាគ្រាប់បាល់ដំបូងរបស់រូបគេ នៅអឺរ៉ុប សម្រាប់ United ចាប់តាំងពីខែកុម្ភៈ ឆ្នាំ២០២០ ពេលលេងទល់នឹង Club Brugge ហើយកីឡាករអន្តរជាតិស្កុតឡេនពេញចិត្តនឹងភាពអត់ធ្មត់របស់មិត្តរួមក្រុម ក្នុងការតទល់នឹងក្រុមគូប្រជែងដ៏រឹងត្អឹងបែបនេះ៕