ការប៉ះគ្នារបស់ក្រុម Liverpool ជាមួយក្រុមមេឃខៀវ Manchester City ក្លាយជាម៉ូដែល (គំរូ) ដ៏ទំនើបរបស់ក្របខ័ណ្ឌ Premier League ក្នុងយុគសម័យរបស់លោក Jurgen Klopp និងលោក Pep Guardiola ប៉ុន្តែការប្រកួត នៅថ្ងៃអាទិត្យ ក្នុងកីឡដ្ឋាន Anfield នេះ អាចបញ្ចប់ពេលវេលានៃមហិច្ឆតា ក្នុងការប្រជែងពានរបស់ក្រុមហង្សក្រហមរួចទៅហើយ។
![](https://cambodiaflashnews.com/wp-content/uploads/2021/06/top-banner.gif)
ក្លិបទាំង២ បានចែករំលែកភាពលេចធ្លោនៃការប្រកួតបាល់ទាត់ នៅអង់គ្លេស ក្នុងរយៈពេល ៥ឆ្នាំចុងក្រោយនេះ ដោយក្រុម Man City ដណ្តើមជើងឯកពីក្រុម Liverpool យ៉ាងប្រផិតប្រផើយចំនួន ២លើក ជាមួយនឹងការមានគម្លាតតែ ១ពិន្ទុ ដែលកើតឡើងក្នុងឆ្នាំ ២០១៨-២០១៩ និងរដូវកាលមុន។
ប៉ុន្តែជ័យជម្នះតែ ២លើកពីការប្រកួតបើកឆាក ៨ដងរបស់ពួកគេ នៅ Premier League បាននាំឱ្យក្រុម Liverpool មានគម្លាតដល់ទៅ ១៤ពិន្ទុតាមពីក្រោយក្រុមកំពូលតារាង Arsenal និង ១៣ពិន្ទុពីក្រុមលេខ ២ Man City។ ផ្ទុយទៅវិញ ក្រុមការពារតំណែងជើងឯក Man City កំពុងរកគ្រាប់បាល់ជាមធ្យមជិត ៤គ្រាប់ ក្នុង ១ហ្គេម ខណៈដែលការមកដល់របស់ខ្សែប្រយុទ្ធ Erling Haaland បាននាំឱ្យក្រុមអ្នកឈ្នះដ៏ពេញដោយពិសោធន៍ឡើងទៅកម្រិតថ្មីមួយទៀត។
លោក Guardiola អាចលៃលកយ៉ាងស្រួល ក្នុងការទុកឱ្យកីឡាករ Haaland សម្រាក សម្រាប់ការប្រកួត ដែលបានស្មើ ០-០ នៅឯផ្ទះរបស់ក្រុម Copenhagen កាលពីយប់ថ្ងៃអង្គារ ដោយលទ្ធផលត្រឹម ១ពិន្ទុនេះ គ្រប់គ្រាន់ឱ្យក្រុម Man City ធ្វើដំណើរទៅវគ្គ ១៦ក្រុមចុងក្រោយនៃក្របខ័ណ្ឌ Champions League ជាមួយនឹងការប្រកួតនៅសល់ ២លើកទៀត។
កីឡាករសញ្ជាតិន័រវែសរូបនេះ ស៊ុតបាល់បញ្ចូលទីបានដល់ទៅ ២០គ្រាប់ ក្នុងចំណោម ១២ហ្គេមប៉ុណ្ណោះ គិតចាប់តាំងពីក្រុម Liverpool បានបើករដូវកាលជាមួយនឹងជ័យជម្នះ ៣-១ លើក្រុម Man City ក្នុងកម្មវិធីប្រកួត Community Shield។
ក្រុមរបស់លោក Guardiola មិនទាន់បរាជ័យសោះ ក្នុងចំណោមការប្រកួត ១៣ដង គិតចាប់តាំងពីកីឡាករ Haaland មិនអាចរកគ្រាប់បាល់បានតែ ១លើកប៉ុណ្ណោះ ក្នុងអាជីពរយៈពេលខ្លីរបស់ខ្លួន នៅ Premier League។ ប៉ុន្តែក្រុម Man City ឈ្នះបានតែម្តងគត់ នៅទឹកដី Anfield រាប់តាំងពីឆ្នាំ២០០៣ មក ហើយហ្គេមនោះ គឺធ្វើឡើងនៅពីមុខកីឡដ្ឋានទទេស្អាត (គ្មានអ្នកគាំទ្រ) ក្នុងខែកុម្ភៈ ឆ្នាំ២០២១។
នៅមុនការប្រកួតដ៏ធំនេះ កើតឡើង កីឡាករ Kevin De Bruyne របស់ក្រុមមេឃខៀវ បានប្រាប់ប្រព័ន្ធផ្សព្វផ្សាយ Sky Sports ថា៖ «ខ្ញុំរំពឹងថា ពួកគេនឹងអាចក្លាយជាក្រុម Liverpool ដ៏ល្អបំផុត។ ច្បាស់ណាស់ ពួកគេបានបាត់បង់ពិន្ទុខ្លះ តែពួកគេនៅតែជាក្រុម Liverpool ហើយខ្ញុំរំពឹងថាពួកគេនឹងល្អប្រសើរឡើងជាមិនខាន»។
សម្រាប់ Liverpool យ៉ាងហោចណាស់ក៏មានការធូរស្រាលខ្លះៗ បន្ទាប់ពីបានបំបាក់ក្រុម Rangers ៧-១ ក្នុងការប្រកួត នៅ Champions League កាលពីយប់ថ្ងៃពុធ ខណៈដែលខ្សែប្រយុទ្ធ Mohamed Salah បានងើបចេញពីកៅអីកីឡាករបម្រុង ហើយទៅសម្រេចបានហ៊ែតទ្រិក (ស៊ុតបាន ៣គ្រាប់) លឿនបំផុត ក្នុងប្រវត្តិសាស្ត្រនៃការប្រកួតប្រជែងរបស់អឺរ៉ុបនេះ៕