លោក Jurgen Klopp បាននិយាយថា អារម្មណ៍ ក្នុងក្រុម Liverpool ចាប់ផ្ដើមធូរស្រាលបន្តិច បន្ទាប់ពីខ្សែប្រយុទ្ធ Mohamed Salah បានងើបចេញពីកៅអីកីឡាករបម្រុង ដើម្បីមកធ្វើបានហ៊ែតទ្រិក (ស៊ុត ៣គ្រាប់) យ៉ាងលឿនបំផុត ក្នុងប្រវត្តិសាស្ត្ររបស់ក្របខ័ណ្ឌ Champions League ក្នុងជ័យជម្នះ ដែលបំបាក់ក្រុម Rangers ឥតប្រណី ៧-១ នៅកីឡដ្ឋាន Ibrox កាលពីយប់ថ្ងៃពុធ។
![](https://cambodiaflashnews.com/wp-content/uploads/2021/06/top-banner.gif)
ក្រុមហង្សក្រហម បានឈ្នះតែ ៤ដងប៉ុណ្ណោះ ក្នុងចំណោមការប្រកួត ១១លើកដំបូងនៃរដូវកាលថ្មី ហើយក៏បានភ្លាត់តាមពីក្រោយក្រុមគូបដិបក្ខជាលើកទី៨ នៃរដូវកាលនេះ នៅពេលដែលកីឡាករ Scott Arfield បានបំប៉ោងសំណាញ់ទីឱ្យក្រុមយក្សនៃក្រុង Glasgow នាំមុខមុន។ ប៉ុន្តែក្រុម Rangers របស់ស្កុតឡេនមួយនេះ កំពុងត្រូវបានផ្ដល់មេរៀន សម្រាប់ការវិលត្រឡប់របស់ពួកគេមកកាន់ Champions League វិញលើកដំបូង ក្នុងរយៈពេល ១២ឆ្នាំ ខណៈដែលពួកគេបានដួលរលំ ដោយសារបរាជ័យជាកំណត់ត្រា នៅអឺរ៉ុប ក្នុងវគ្គទី ២។
២គ្រាប់របស់កីឡាករ Roberto Firmino ទាំងក្នុងវគ្គទី១ និងទី២ បានកែប្រែហ្គេម មុនពេលកីឡាករសញ្ជាតិប្រេស៊ីល សហការជាមួយខ្សែប្រយុទ្ធ Darwin Nunez ដើម្បីបញ្ចប់ជីវិត (យកឈ្នះ) ក្រុមគូប្រជែង។
លោក Klopp បានទុកឱ្យ Salah, Thiago Alcantara និង Diogo Jota អង្គុយកៅអីបម្រុង ដោយភ្នែកម្ខាងរបស់គាត់ កំពុងសម្លឹងដល់ការប្រកួត នៅថ្ងៃអាទិត្យ ទល់នឹងក្រុមមេឃខៀវ Manchester City នៅក្របខ័ណ្ឌ Premier League ។ ប៉ុន្តែពួកគេត្រូវបានប្ដូរចូល នៅ ១៥នាទីចុងក្រោយ ហើយកីឡាករ Salah មិនបានខ្ជះខ្ជាយឱកាស ក្នុងការស៊ុតទម្លុះសំណាញ់ទី ខណៈខ្សែការពាររបស់ Rangers រងនូវសម្ពាធនោះទេ។
គ្រាប់បាល់ ៣គ្រាប់របស់កីឡាករអន្តរជាតិអេហ្ស៊ីប បានកើតឡើង ក្នុងរយៈពេលត្រឹមតែ ៦នាទី និង ១២វិនាទីប៉ុណ្ណោះ ដែលរយៈពេល បំបែកកំណត់ត្រាពីមុន ដែលកាន់កាប់ដោយកីឡាករ Bafetimbi Gomis ក្នុងជ័យជម្នះ ៧-១ របស់ក្រុម Lyon លើក្រុម Dinamo Zagreb ក្នុងឆ្នាំ២០១១។
ការស្មើ នៅទីក្រុង Amsterdam នឹងគ្រប់គ្រាន់សម្រាប់ក្រុម Liverpool ដើម្បីឡើងទៅវគ្គ ១៦ក្រុមចុងក្រោយ នៅពេលដែលពួកគេជួបជាមួយក្រុម Ajax របស់ហូឡង់ ក្នុងរយៈពេល ២សប្តាហ៍ទៀត។ ប៉ុន្តែក្រុម Napoli នៅតែឈរលើគេក្នុងពូល A បន្ទាប់ពីឈ្នះក្រុម Ajax ៤-២ ដែលជាលទ្ធផលនាំឱ្យក្រុមលំដាប់កំពូលអ៊ីតាលីដណ្ដើមបានសិទ្ធិទៅវគ្គបន្តរួចហើយ៕