កីឡាករ Lionel Messi របស់ក្លិប Paris Saint-Germain (PSG) នឹងមិនមានវត្តមានក្នុងការប្រកួតនៅក្របខ័ណ្ឌ UEFA Champions League (UCL) ក្នុងផ្ទះ នាសប្តាហ៍នេះ ជាមួយក្រុម Benfica ដោយសារមានរបួស។ នេះបើតាមប្រភពរបស់ក្លិប ដែលបានប្រាប់មកបណ្ដាញសារព័ត៌មាន កាលពីថ្ងៃចន្ទ។
![](https://cambodiaflashnews.com/wp-content/uploads/2021/06/top-banner.gif)
ស៊ុបភើស្តារសញ្ជាតិអាហ្សង់ទីនវ័យ ៣៥ឆ្នាំរូបនេះ បានមានបញ្ហាកំភួនជើងបន្តិចបន្តួច ក្នុងការប្រកួតកាលពីសប្តាហ៍មុន ក្នុងលទ្ធផលស្មើ ១-១ នៅប្រទេសព័រទុយហ្គាល់ ហើយបានខកខានកាលពីថ្ងៃសៅរ៍ ក្នុងហ្គេមនៅក្របខ័ណ្ឌ Ligue 1 ដែលស្មើជាមួយក្រុម Reims។
ជាមួយគ្នានេះដែរ ក្រុម PSG នឹងមិនមានខ្សែការពារ Presnel Kimpembe និង Nuno Mendes ក៏ដូចជាខ្សែបម្រើ Renato Sanches សម្រាប់ការប្រកួតនៅ UCL នាយប់ថ្ងៃអង្គារ ក្នុងរដ្ឋធានីនៃប្រទេសបារាំងនេះ។
ក្រុមយក្សនៅក្រុងប៉ារីស នាពេលនេះឈរទី១ ក្នុងពូល H ដោយនៅពីលើក្រុម Benfica ដែលជាជើងឯកទ្វីបអឺរ៉ុប ២ដង ដោយសារចំនួនគ្រាប់បាល់ចំណេញច្រើនជាង សម្រាប់ការប្រកួតប្រជែងក្នុងវគ្គសន្សំពិន្ទុនេះ។
អតីតខ្សែប្រយុទ្ធឆ្នើមរបស់ក្រុមអ្នកមានបុណ្យ Barcelona រូបនេះ បានបាត់មុខត្រឹមតែ ១លើកប៉ុណ្ណោះ ក្នុងចំណោម ១៤ហ្គេមរបស់ក្រុម PSG គិតក្នុងការប្រកួតនៅគ្រប់កម្មវិធីទាំងអស់ នារដូវកាលនេះ ហើយក្លិបនឹងសង្ឃឹមថា កីឡាករវ័យរូបនេះនឹងមានភាពរឹងប៉ឹងបរិបូរណ៍ សម្រាប់ការប្រកួតនៅ Ligue 1 នាថ្ងៃអាទិត្យជាមួយក្រុមគូប្រជែងដ៏ស្រួចស្រាល់ Marseille។
ចំណែកឯខ្សែការពារសញ្ជាតិអេស្ប៉ាញ Sergio Ramos ប្រាកដណាស់ នឹងខកខានការប្រកួតនៅថ្ងៃអាទិត្យនេះ ដោយសាររូបគេជាប់ពិន័យ៕