ខ្សែប្រយុទ្ធ Luis Diaz របស់ក្រុមហង្សក្រហម Liverpool នឹងត្រូវអវត្តមាន រហូតដល់ក្រោយព្រឹត្តិការណ៍ World Cup ដោយសាររបួសជង្គង់។ នេះបើយោងតាមសេចក្ដីរាយការណ៍ កាលពីថ្ងៃចន្ទ។
Diaz បានរងរបួស ក្នុងវគ្គទី១ នៃការប្រកួត នៅក្របខ័ណ្ឌ Premier League កាលពីថ្ងៃអាទិត្យ ដែលក្រុម Liverpool រងបរាជ័យ ៣-២ នៅឯផ្ទះរបស់ក្រុមកាំភ្លើងធំ Arsenal។
កីឡាករសញ្ជាតិកូឡុំប៊ីវ័យ ២៥ឆ្នាំរូបនេះ បានចាកចេញពីកីឡដ្ឋាន Emirates ដោយប្រើឈើច្រត់ ហើយលទ្ធផលស្កែន បានបង្ហាញថា កីឡាករ Diaz មិនត្រូវការការវះកាត់ទេ តែមានសេចក្ដីរាយការណ៍ថា របួសនេះនឹងធ្វើឱ្យរូបគេនៅក្រៅទីលាន រហូតដល់ក្រោយ World Cup ដែលចាប់ផ្តើមនៅប្រទេសកាតា នាថ្ងៃទី២០ ខែវិច្ឆិកា។
នេះបានន័យថា កីឡាករ Diaz នឹងខកខានយ៉ាងហោចណាស់ ១០ហ្គេម សម្រាប់ក្រុមដ៏យ៉ាប់យ៉ឺនរបស់លោក Jurgen Klopp ដែលមានគម្លាតដល់ទៅ ១៤ពិន្ទុ តាមពីក្រោយក្រុមកំពូលតារាង Arsenal។
វាជាផលប៉ះពាល់ដ៏ធំមួយទៀតសម្រាប់ Liverpool ដោយ Diaz បានលេចមុខមកជាអ្នកលេងដ៏មានឥទ្ធិពលរបស់ក្រុម ចាប់តាំងពីមកចូលរួមដោយចាកចេញពីក្លិប Porto ក្នុងខែមករា។ រូបគេនឹងសង្ឃឹមថា នឹងត្រឡប់មកមានសកម្មភាពវិញ នៅពេលដែលការប្រកួត នៅ Premier League ចាប់ផ្តើមឡើងវិញ ក្នុងខែធ្នូ បន្ទាប់ពី World Cup ចប់សព្វគ្រប់។
ក្រុមហង្សក្រហម ប្រឈមនឹងបញ្ហារបួសនេះរួចទៅហើយ ដោយខ្សែការពារ Trent Alexander-Arnold កំពុងរង់ចាំលទ្ធផលស្កែននៃរបួសកជើង ដែលកើតមានពេលលេងទល់នឹងក្រុម Arsenal ដែរ៕
