ក្លិប Atletico Madrid បានបញ្ជាក់ថា ក្លិបបានយល់ព្រមលើកិច្ចព្រមព្រៀងមួយ ដើម្បីចុះហត្ថលេខាផ្ទេរយកខ្សែប្រយុទ្ធសញ្ជាតិបារាំង Antoine Griezmann ជាអចិន្ត្រៃយ៍ពីក្លិបរួមលីគ Barcelona ក្នុងកិច្ចសន្យារហូតដល់ឆ្នាំ២០២៦។
កីឡាករ Griezmann ត្រូវបានក្រុម Atletico ខ្ចីជើងតាំងពីខែសីហា ឆ្នាំ២០២១ បន្ទាប់ពីជួបនូវការលំបាក នៅទឹកដី Camp Nou ក្រោយផ្លាស់ទៅក្នុងតម្លៃ ១២០លានអឺរ៉ូ (១១៦,៥លានដុល្លារ) កាលពីឆ្នាំ២០១៩។
ក្លិប Atletico បានឱ្យដឹងក្នុងសេចក្តីថ្លែងការណ៍មួយ កាលពីថ្ងៃចន្ទថា៖ «កីឡាករ Griezmann បានចុះហត្ថលេខាលើកិច្ចព្រមព្រៀង ដែលភ្ជាប់រូបគេជាមួយក្លិបរបស់យើង រហូតដល់ថ្ងៃទី៣០ ខែមិថុនា ឆ្នាំ២០២៦»។
កីឡាករជយលាភី World Cup 2018 គឺជាតួអង្គដ៏សំខាន់ ក្នុងផែនការរបស់គ្រូបង្វឹក លោក Diego Simeone កាលពីរដូវកាលមុន ប៉ុន្តែត្រូវបានកាត់បន្ថយយ៉ាងច្រើន ក្នុងការបង្ហាញខ្លួនក្នុងនាមជាកីឡាករបម្រុង ក្នុងយុទ្ធនាការនាពេលបច្ចុប្បន្ននេះ ខណៈដែលក្លិប Atletico បានព្យាយាមគេចចេញពីការបង់ថ្លៃទិញជាកាតព្វកិច្ចចំនួន ៤០លានអឺរ៉ូ ប្រសិនបើកីឡាករ Griezmann បានចូលលេងលើសពីចំនួនហ្គេមជាក់លាក់មួយ។
ដោយព្រឹត្តិការណ៍ World Cup ឆ្នាំនេះ កាន់តែខិតជិតមកដល់ ហើយកីឡាករវ័យ ៣១ឆ្នាំ មានបំណងចង់បង្ហាញខ្លួនបន្ថែមនោះ ក្លិប Atletico និង Barcelona បានចរចាលើកិច្ចព្រមព្រៀងថ្មីមួយ ដោយប្រធានក្លិប Barcelona លោក Joan Laporta អំឡុងកិច្ចប្រជុំសមាជិកក្លិប កាលពីថ្ងៃអាទិត្យ បានបញ្ជាក់ពីតម្លៃ ដែលតាមដឹង ២០លានអឺរ៉ូ និងមានតម្លៃបន្ថែម តាមលក្ខខណ្ឌផ្សេងៗទៀត។
តែក្លិប Atletico មិនបានបង្ហាញពីតម្លៃនៃកិច្ចព្រមព្រៀងថ្មីនេះនោះទេ សម្រាប់ការផ្ទេរ ចំពោះ Griezmann ដែលលេងបាន ៣០៣ដង សម្រាប់ក្លិប ដោយក្នុងនោះស៊ុតបញ្ចូលទីបាន ១៤៤គ្រាប់ ពីការចូលរួម ២លើកជាមួយក្លិបយក្សនៅក្រុងម៉ាឌ្រីដនេះ៕
