ភ្នំពេញ៖នៅក្នុងរយៈពេល ៩ ខែ ឆ្នាំ ២០២២ នេះ កម្ពុជា បាននាំចេញទំនិញក្រោមប្រព័ន្ធអនុគ្រោះពាណិជ្ជកម្មទៅកាន់ទីផ្សារបរទេស មានទំហំទឹកប្រាក់ជាង ១៧ ពាន់លានដុល្លារអាមេរិក កើនជាង ២៤ ភាគរយ បើធៀបទៅនឹង ៩ ខែដូចគ្នា កាលពីឆ្នាំ ២០២១ កន្លងទៅ។
![](https://cambodiaflashnews.com/wp-content/uploads/2021/06/top-banner.gif)
ថ្លែងក្នុងពិធីចុះហត្ថលេខាលើអនុស្សរណៈ នៃការយោគយល់គ្នាស្ដីពីកម្មវិធីគម្រោងរោងចក្រកាន់តែប្រសើរនៅកម្ពុជាសម្រាប់ឆ្នាំ ២០២៣-២០២៧ កាលពីរសៀលថ្ងៃទី ១០ តុលា នាសណ្ឋាគារភ្នំពេញ លោក ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម បានមានប្រសាសន៍ថា ការនាំចេញរបស់កម្ពុជាក្រោមប្រព័ន្ធអនុគ្រោះពាណិជ្ជកម្មទៅបរទេសនៅឆ្នាំ ២០០១ មានត្រឹមតែ ១១៨៨ លានដុល្លារអាមេរិក ចំនួននេះមានការកើនឡើងដល់ ១៩០៧៤ លានដុល្លារអាមេរិក នៅឆ្នាំ ២០២១ក្នុងនោះការនាំចេញសំលៀកបំពាក់វាយនភណ្ឌមានទឹកប្រាក់ចំនួន ៦៧៧៣ លានដុល្លារអាមេរិក និងការនាំចេញផលិតផលធ្វើដំណើរ និងកាបូបមានទឹកប្រាក់ចំនួន ១១៨៨ លានដុល្លារអាមេរិក។
លោករដ្ឋមន្ត្រី បានបន្តថា ដោយឡែកក្នុងរយៈពេល ៩ ខែ ឆ្នាំ ២០២២ នេះ ការនាំចេញរបស់កម្ពុជាក្រោមប្រព័ន្ធអនុគ្រោះពាណិជ្ជកម្មទៅបរទេសមានទំហំទឹកប្រាក់ ១៧៥៧៨ លានដុល្លារអាមេរិកកើនឡើង ២៤.២៣ ភាគរយ បើធៀបទៅនឹងរយៈពេល ៩ ខែដូចគ្នា ឆ្នាំ ២០២១ ក្នុងនោះការនាំចេញសំលៀកបំពាក់វាយនភណ្ឌកើនឡើង ២៣.១៦ ភាគរយនិងការនាំចេញផលិតផលធ្វើដំណើរ និងកាបូបមានការកើនឡើង ៣៦.៣១ ភាគរយ។
លោក ប៉ាន សូរស័ក្តិ បានគូសបញ្ជាក់ថាតាមរយៈការអនុវត្តគោលនយោបាយផ្សារភ្ជាប់ពាណិជ្ជកម្មជាមួយនឹងបទដ្ឋានការងារកម្ពុជាបានបង្កើនទំនុកចិត្តដល់អ្នកបញ្ជាទិញម៉ាកយីហោល្បីៗក្នុងការដាក់បន្ថែមការបញ្ជាទិញផលិតផលសំខាន់ៗ រួមមាន សម្លៀកបំពាក់ វាយនភ័ណ្ឌ ស្បែកជើង និងកាបូបនៅកម្ពុជាពីមួយឆ្នាំ ទៅមួយឆ្នាំកាន់តែច្រើនឡើងៗ៕ដោយៈសិរីមតី