លោក Erik ten Hag រំពឹងថា គ្រាប់បាល់ទី ៧០០ ក្នុងក្លិបអាជីពរបស់កីឡាករ Cristiano Ronaldo អាចជំរុញឱ្យមានទម្រង់លេងល្អប្រសើរឡើងវិញ បន្ទាប់ពីខ្សែប្រយុទ្ធសញ្ជាតិព័រទុយហ្គាល់រូបនេះ បានស៊ុតបញ្ចូលទីគ្រាប់បាល់ជ័យជម្នះ ដែលជួយឱ្យក្រុមបិសាចក្រហម Manchester United ឈ្នះក្រុមម្ចាស់ផ្ទះ Everton ២-១ កាលពីថ្ងៃអាទិត្យ។
![](https://cambodiaflashnews.com/wp-content/uploads/2021/06/top-banner.gif)
កីឡាករជយលាភីពាន Ballon d’Or ៥សម័យកាល ត្រូវតែស៊ាំនឹងជីវិតនៅក្រៅទីលានទៅហើយ ក្រោមការដឹកនាំរបស់លោក Ten Hag ដោយចាប់ផ្តើមបង្ហាញខ្លួនក្នុងជម្រើសដំបូងបានតែម្ដងប៉ុណ្ណោះនៅក្របខ័ណ្ឌ Premier League នារដូវកាលនេះ។ ហើយកាលពីយប់មិញនេះក៏ដូចគ្នាដែរ កីឡាករ Ronaldo ត្រូវបានដាក់ឱ្យអង្គុយលើកៅអីបម្រុងម្ដងទៀត តែត្រូវបានប្ដូរចូលជំនួសខ្សែប្រយុទ្ធ Anthony Martial ដែលរងរបួស។
កីឡាករវ័យ ៣៧ឆ្នាំរូបនេះ បានឆក់យកឱកាសដ៏ល្អនេះ ដោយការផ្តល់ឱ្យក្រុម Man United នូវការនាំមុខ មុនចប់វគ្គទី ១ ក្នុងការប្រកួតមួយដែលក្រុមទាំង២ សុទ្ធតែមានកំហុសដូចគ្នា ហើយលោក Ten Hag បាននិយាយបន្ទាប់ពីកីឡាករ Ronaldo រកបានគ្រាប់បាល់ដំបូង នៅ Premier League រដូវកាលនេះថា៖ «កីឡាករគ្រប់រូបត្រូវការវា (ទំនុកចិត្ត) សូម្បីតែនៅពេលដែលអ្នកកំពុងមានទម្រង់ល្អបំផុតជាងគេនៅលើពិភពលោក»។
«ខ្ញុំបានរួមការងារជាមួយអ្នកស៊ុតបញ្ចូលទីជាច្រើន ហើយពួកគេត្រូវការគ្រាប់បាល់ នៅគ្រប់រដូវកាល ដើម្បីឱ្យមានអារម្មណ៍នោះ ដែលជាការបញ្ជាក់ពីសញ្ជាតិញាណ។ នៅពេលដែលពួកគេមានគ្រាប់បាល់ខ្លះ ពួកគេនឹងកាន់តែមានភាពធូរស្រាល ហើយហ្គេមកាន់តែងាយស្រួល។ រឿងនោះនឹងកើតមានឡើងជាមួយរូបគេ (Ronaldo) ដូចគ្នាដែរ»។
គ្រាប់បាល់នោះ បានធ្វើឱ្យចំនួនសរុបរបស់កីឡាករ Ronaldo សម្រាប់ការប្រកបអាជីពជាមួយក្រុម Man United ចំនួន ២លើក ឡើងដល់ ១៤៤គ្រាប់។ ជាមួយគ្នានេះ គ្រាប់បាល់កំណត់ត្រារបស់រូបគេ នៅឯក្រុមយក្សអេស្ប៉ាញ Real Madrid គឺ ៤៥០គ្រាប់ ខណៈដែលទម្លុះសំណាញ់ទីបាន ១០១ដង សម្រាប់ក្រុម Juventus និង ៥ដង សម្រាប់ក្រុម Sporting Lisbon៕