កីឡាករ Trent Alexander-Arnold បានរងរបួសកជើង ដែលនាំឱ្យរូបគេឈឺចាប់ខ្លាំងពេក មិនអាចបន្តលេងក្នុងការប្រកួត ដែលក្រុមហង្សក្រហម Liverpool របស់ខ្លួន ចាញ់ក្រុមកាំភ្លើងធំ Arsenal ៣-២ កាលពីថ្ងៃអាទិត្យ ខណៈដែលបញ្ហានេះ ធ្វើឱ្យលោក Jurgen Klopp មានការបារម្ភយ៉ាងខ្លាំង។
អ្នកចាត់ការក្រុមលោក Klopp បាននិយាយថា របួសរបស់កីឡាករ Alexander-Arnold បង្ហាញឱ្យឃើញការហើមប៉ោង ដោយក្រុម Liverpool គ្រោងនឹងពិនិត្យលម្អិត ចំពោះបញ្ហារបស់ខ្សែការពារស្តាំរូបនេះនៅថ្ងៃចន្ទនេះ។
ការប្តូរចេញ សម្រាប់ខ្សែការពារសញ្ជាតិអង់គ្លេសរូបនេះ នៅវគ្គទី១ បានកើតឡើងបន្ទាប់ពីមានទម្រង់លេងដ៏គួរឱ្យខកចិត្ត ដោយរូបគេមើលទៅរួមចំណែកមានកំហុសខ្លះៗដែរ សម្រាប់គ្រាប់បាល់ទាំង ២គ្រាប់របស់ក្រុម Arsenal មុនឈប់សម្រាកវគ្គទី ១។
តែទោះជាយ៉ាងណាក្ដី លោក Klopp បានសង្កត់ធ្ងន់ថា ការដកកីឡាករ Alexander-Arnold ត្រូវធ្វើដោយបង្ខំ ដូចគ្នានឹងខ្សែប្រយុទ្ធ Luis Diaz ដែលត្រូវប្ដូរចេញមុនហ្នឹងទៀត ដោយសារមានរបួសជង្គង់។
លោក Klopp បាននិយាយថា៖ «កីឡាករ Lucho (Diaz) យើងត្រូវតែផ្លាស់ប្តូរ មុនចប់វគ្គទី ១ ដោយសារមានអ្វីមិនស្រួលត្រង់ជង្គង់។ រូបគេនឹងមានការស្កែន ហើយបន្ទាប់មកយើងនឹងដឹងបន្ថែមទៀត។ ខ្ញុំមិនដឹងពីកម្រិតនោះទេ ហើយបន្ទាប់មកកីឡាករ Trent (Alexander-Arnold) គឺអាក្រក់ដែរ ដោយមានបញ្ហាកជើង»។
«រូបគេរមួលកជើង ពោលគេមិនល្អទេ។ កីឡាករ Trent មិនធ្លាប់បែបនេះឡើយ ក្នុងរយៈពេល៧ឆ្នាំ ប្រសិនបើនៅអាចលេងបាន។ រូបគេឈឺខ្លាំងពេក ដោយវាចាប់ផ្តើមហើមប៉ោងភ្លាមៗ ដូច្នេះយើងនឹងត្រូវតែពិនិត្យមើលឱ្យលម្អិត»។ លោក Klopp បានបន្ថែម៕
