សៀមរាប៖គម្រោងកិច្ចសហប្រតិបត្តិការអាល្លឺម៉ង់(GIZ) បានជ្រើសរើសខេត្តចំនួន៣ ក្នុងប្រទេសអាស៊ាន រួមមាន ខេត្តសៀមរាប នៃព្រះរាជាណាចក្រកម្ពុជា , ខេត្ត វ៉ាងវៀង ប្រទេសឡាវ និងខេត្ត ដាឡាត ប្រទេសវៀតណាម ជាទីក្រុងសាកល្បងលើការគ្រប់គ្រងប្រកបដោយនិរន្តរភាព ។
លោក យុន លីនណេ អភិបាលរងខេត្តសៀមរាប បានថ្លែង អំណរគុណនិងសាទរចំពោះគម្រោងកិច្ចសហប្រតិបត្តិការអាល្លឺម៉ង់ដែលបាន ជ្រើសរើសយកខេត្តសៀមរាប ជាក្រុងអនុវត្តសាកល្បង លើការគ្រប់គ្រងកាកសំណល់រឹង ព្រមទាំងគាំទ្រការអនុវត្តការគ្រប់គ្រងសំណល់ប្រកបដោយនិរន្តរភាព។
លោក Frank Jattke នាយកគម្រោងកិច្ចសហប្រតិបត្តិការអាល្លឺម៉ង់( giz ) បានបញ្ជាក់ថា គម្រោងនេះ មានគោលបំណងចូលរួមចំណែក ក្នុងការធ្វើឲ្យប្រសើរឡើង នូវគុណភាពបរិស្ថានក្នុងក្រុងទេសចរណ៍ខ្នាត មធ្យមនៅក្នុងតំបន់អាស៊ាន។ តាមរយៈការពង្រឹងសមត្ថភាពនែការទុកដាក់សំណល់ ចុងក្រោយ និង ការកែច្នៃឡើងវិញ ប្រកបដោយប្រសិទ្ធភាព ។ ម្យ៉ាងទៀតគម្រោងនេះ ត្រូវបានផ្តល់មូលនិធិដោយក្រសួងសហព័ន្ធសម្រាប់កិច្ចសហប្រតិបត្តិ ការសេដ្ឋកិច្ច និង អភិវឌ្ឍន៍ ដែលអនុវត្តដោយភ្នាក់ងារកិច្ចសហប្រតិបត្តិការ អាល្លឺម៉ង់( giz ) ក្នុងកិច្ចសហប្រតិបត្តិការជិតស្និទជាមួយលេខាធិការដ្ឋានអាស៊ាន ។
លោកបន្តទៀតថា គម្រោងនេះ ក៏បានរួមចំណែកដល់ការសម្រេចបាននូវគោលដៅរបស់អាស៊ាន ដូចបានចែងក្នុងផែនការមេ របស់សហគមន៍សង្គមវប្បធម៌អាស៊ាន ឆ្នាំ២០២៥ ។ កាបង្កើនប្រសិទ្ធភាពនៃការគ្រប់គ្រងសំណល់រឹង និង ការកែច្នៃឡើងវិញប្រកបនិរន្តរភាព និង គិតគូរពីតួនាទីរបស់យេនឌ័រ នៅក្នុងទីក្រុង ទេសចរណ៍គោលដៅ ៕ដោយៈផាវី
