ភ្នំពេញ៖កម្ពុជានឹងរៀបចំពិព័រណ៍បច្ចេកវិទ្យាកម្ពុជា២០២២ (Cambodia Tech Expo 2022:CTX 2022) ដែលចាប់ផ្តើមពីថ្ងៃទី១១ រហូតដល់ថ្ងៃទី១៣ ខែវិច្ឆិកា ឆ្នាំ២០២២ នៅមជ្ឈមណ្ឌលសន្និបាត និងពិព័រណ៍កោះពេជ្រនិងនៅ Factory Phnom Penh ។នេះបើតាមសេចក្តីជូនដំណឹងរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នារសៀលថ្ងៃទី៣ខែតុលា។
![](https://cambodiaflashnews.com/wp-content/uploads/2021/06/top-banner.gif)
ប្រភពដដែលនេះ បានឱ្យដឹងថា៖ពិព័រណ៍បច្ចេកវិទ្យាកម្ពុជា២០២២ ជាកម្មវិធីដ៏ធំមួយដែលរៀបចំឡើងអមជាមួយកិច្ចប្រជុំកំពូលអាស៊ាន ដែលកម្ពុជាធ្វើជាម្ចាស់ផ្ទះនិងជាកម្មវិធីឈានមុខគេប្រចាំឆ្នាំលើកទី១ របស់ព្រះរាជាណាចក្រកម្ពុជា ដែលមានគោលបំណងបង្កើតថ្នាលបច្ចេកវិទ្យាថ្នាក់ជាតិ ដើម្បី៖
១.កៀរគររដ្ឋសមាជិកអាស៊ាន រដ្ឋាភិបាល វិស័យឯកជន ស្ថាប័នស្រាវជ្រាវ ដៃគូអភិវឌ្ឍន៍ និងសង្គមស៊ីវិល ដើម្បីសហការ ចែករំលែកបទពិសោធន៍ និន្នាការថ្មីៗ បញ្ហាប្រឈម និងឧត្តមានុវត្តន៍ពាក់ព័ន្ធនឹងបច្ចេកវិទ្យា សេដ្ឋកិច្ចនិងសង្គមឌីជីថល និងបដិវត្តន៍ឧស្សាហកម្មជំនាន់ទី៤។
២.បង្ហាញអំពីវឌ្ឍនភាពគោលនយោបាយ និងក្របខណ្ឌគតិយុត្ត ជាពិសេសផលិតផលនិងសេវាបច្ចេកវិទ្យានានា។
៣. ឆ្លុះបញ្ចាំងអំពីប្រព័ន្ធអេកូឡូស៊ីប្រកបដោយអំណោយផលនិងទាក់ទាញ ព្រមទាំងចាប់យកឱកាសវិនិយោគក្នុងវិស័យវិទ្យាសាស្ត្រ បច្ចេកវិទ្យា និងនវានុវត្តន៍ នៅកម្ពុជា។
៤. អភិវឌ្ឍបណ្តាញអាជីវកម្មរវាងធុរកិច្ចបច្ចេកវិទ្យាថ្មី សហគ្រាសធុនតូចនិងមធ្យម ឧស្សាហកម្ម និងវិនិយោគ។
៥. ចាប់យកសក្តានុពលនៃវិស័យវិទ្យាសាស្ត្រ បច្ចេកវិទ្យា និងនវានុវត្តន៍។
៦. លើកកម្ពស់ការយល់ដឹង និងបង្កើតសំណើរួម ក្របខណ្ឌ និងការស្រាវជ្រាវនិងអភិវឌ្ឍន៍រួម ជាដើម។
ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានឱ្យដឹងថា៖កម្មវិធីចម្បងៗក្នុង ពិព័រណ៍បច្ចេកវិទ្យាកម្ពុជា ២០២២រួមមាន៖វេទិកាកិច្ចសន្ទនា រវាងរដ្ឋមន្ត្រីសេដ្ឋកិច្ចអាស៊ាន-តំណាងវិស័យឯកជន-អ្នកស្រាវជ្រាវ-សង្គមស៊ីវិល,សន្និសីទនិងសិក្ខាសាលាសម្រាប់ថ្នាក់ដឹកនាំនិងអ្នកជំនាញដើម្បីចែករំលែក អំពីបច្ចុប្បន្នភាព និងអនាគតនៃបច្ចេកវិទ្យា,កម្មវិធីបង្កើតទំនាក់ទំនងសម្រាប់ធុរកិច្ចថ្មីបច្ចេក វិទ្យានិងវិនិយោគិន, កម្មវិធី Seedstars summit, កម្មវិធី ASEAN YOUNG ENTREPRENEURS CARNIVAL, កម្មវិធី Startup Investment Readiness Program for Tech Startup, វេទិកាធុរកិច្ចថ្មីកម្ពុជា វេទិកាបច្ចេកវិទ្យាហិរញ្ញវត្ថុ និងសកម្មភាពសំខាន់ៗមួយចំនួនទៀត។
កម្មវិធីនេះត្រូវបានដឹកនាំរៀបចំនិងសម្របសម្រួលដោយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍និងទទួលបានការ គាំទ្រពីក្រសួងស្ថាប័ន ពាក់ព័ន្ធរួមមាន៖ ក្រសួងសេដ្ឋកិច្ច និងហិរញ្ញវត្ថុ ក្រសួងការបរទេស និងសហ-ប្រតិបត្តិការអន្តរជាតិ ក្រសួងប្រៃសណីយ៍និងទូរគមនាគមន៍ ក្រសួងពាណិជ្ជកម្ម ក្រសួងការងារ និងបណ្តុះបណ្តាលវិជ្ជាជីវៈ ក្រសួងអប់រំ យុវជន និងកីឡា ក្រសួង កសិកម្ម រុក្ខាប្រមាញ់ និងនេសាទ ក្រសួងសុខាភិបាល និងស្ថាប័នពាក់ព័ន្ធផ្សេងទៀត។
គួរបញ្ជាក់ផងដែរថា ឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុនឹងអញ្ជើញធ្វើជាអធិបតីបើកសម្ពោធ ជាផ្លូវការនូវ ពិព័រណ៍បច្ចេកវិទ្យាកម្ពុជា ២០២២។
កម្មវិធីនេះ ក៏នឹងមានការចូលរួមពីរដ្ឋមន្ត្រីសេដ្ឋកិច្ចអាស៊ាន តំណាងមកពីលេខាធិការដ្ឋានអាស៊ាន ឯកអគ្គរាជទូតប្រចាំនៅកម្ពុជានៃប្រទេសតំបន់អាស៊ាននិងអាស៊ានបូក ដៃគូអភិវឌ្ឍន៍និងដៃគូសន្ទនាជាតិនិងអន្តរជាតិ វាគ្មិនជំនាញជាតិនិងអន្តរជាតិវិស័យឯកជនជាតិ និងអន្តរជាតិ។ជាការរំពឹងទុកកម្មវិធីនេះនឹងមានការដាក់ស្តង់ពិព័រណ៍សរុបប្រមាណ៤០០ស្តង់និងសង្ឃឹមថានឹងមានអ្នកចូលរួមប្រមាណ ៦០, ០០០ នាក់ មកពីស្ថាប័នរាជរដ្ឋាភិបាល អង្គការក្រៅរដ្ឋាភិបាល គ្រឹះស្ថានអប់រំ និងដៃគូអភិវឌ្ឍន៍វិស័យ ឯកជន ក្រុមហ៊ុនអភិវឌ្ឍន៍បច្ចេកវិទ្យាក្រុមហ៊ុនអេឡិចត្រូនិកនិងយានយន្តប្រតិបត្តិករទូរគមនាគមន៍ក្រុមហ៊ុនផ្តល់សេវាអ៊ីនធឺណិតគ្រឹះស្ថានធនាគារនិងមីក្រូ ហិរញ្ញវត្ថុ សហគ្រាសធុនតូច និងមធ្យម និងធុរកិច្ចថ្មីបច្ចេកវិទ្យា ជាដើម។
លោក កិត្តិសេដ្ឋាបណ្ឌិត ចម ប្រសិទ្ធ ទេសរដ្ឋមន្ត្រី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានផ្តល់ចំណាប់ អារម្មណ៍ចំពោះ ពិព័រណ៍បច្ចេកវិទ្យាកម្ពុជា ២០២២ ថា ពិព័រណ៍បច្ចេកវិទ្យាកម្ពុជា ២០២២គឺជាកម្មវិធីដែលរៀបចំឡើងក្នុងគោលបំណងបង្ហាញពីសក្តានុពលនិងភាពរីកដុះដាលនៃអាជីវកម្មបច្ចេកវិទ្យាក្នុងស្រុកក៏ដូចជាដើម្បីបង្កើតបណ្តាញទំនាក់ទំនងនិងទាញយកចំណា ប់អារម្មណ៍អ្នកវិនិយោគខាងក្រៅប្រទេស ឱ្យងាកសម្លឹងមកកម្ពុជា ក៏ដូចជាប្រទេសក្នុងតំបន់អាស៊ានផងដែរ។ នេះជាការបោះជំហានសម្រាប់ការរៀបចំខ្លួនសម្រាប់សេដ្ឋកិច្ចឌីជីថលដែលមានកំណត់ក្នុងយុទ្ធសាស្ត្រចតុកោណដំណាក់កាលទី៤ សម្រាប់រាជរដ្ឋាភិបាលអាណត្តិទី៦។ រាជរដ្ឋាភិបាលនៃព្រះរាជាណាចក្រកម្ពុជា បាននិងកំពុងរៀបចំនិងជំរុញប្រព័ន្ធអេកូឡូស៊ីសម្រាប់ការអភិវឌ្ឍវិស័យវិទ្យា សាស្ត្រ បច្ចេកវិទ្យា និងនវានុវត្តន៍ ដោយបានដាក់ចេញនូវគោលនយោបាយនិងផែនទីបង្ហាញផ្លូវជាបន្តបន្ទាប់ មានជាអាទិ៍៖ គោល នយោបាយជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២០-២០៣០ ផែនទីបង្ហាញផ្លូវ វិទ្យាសាស្ត្រ បច្ចេកវិទ្យា និងនវានុវត្តន៍ កម្ពុជា ២០៣០ ផែនទីបង្ហាញផ្លូវបច្ចេកវិទ្យាកសិកម្មផែនទីបង្ហាញផ្លូវបច្ចេកវិទ្យាអប់រំ និងផែនទីបង្ហាញផ្លូវបច្ចេកវិទ្យាសុខាភិបាល ព្រម ទាំងគ្រោងនឹងរៀបចំផែនទីបង្ហាញផ្លូវសម្រាប់បច្ចេកវិទ្យាអាទិភាពមួយចំនួនទៀត ដែលបម្រើដល់សេដ្ឋកិច្ចនិងសង្គមកម្ពុជា លើវិស័យវិទ្យាសាស្ត្រ បច្ចេកវិទ្យា និងនវានុវត្តន៍ ផងដែរ។ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ សង្ឃឹមថាប្រជាជនកម្ពុជា សហគ្រិន និងវិនិយោគិន ជាច្រើននឹងទទួលបានប្រយោជន៍ពីគំនិតនៃការផ្តួចផ្តើមទាំងនេះ។
ឯកឧត្តម កាន ច័ន្ទមេត្តា រដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានមានប្រសាសន៍ថា ដើម្បីឆ្លើយ តបនិងចូលរួមធ្វើឱ្យបានសម្រេចនូវយុទ្ធសាស្ត្រចតុកោណដំណាក់កាលទី៤ របស់រាជរដ្ឋាភិបាល អាណត្តិទី៦ គោលនយោបាយជាតិស្តីពីវិទ្យាសាស្ត្រ បច្ចេកវិទ្យា និងនវានុវត្តន៍ ឆ្នាំ២០២០-២០៣០ និងក្របខណ្ឌផែនការយុទ្ធសាស្ត្រ រួមទាំងក្របខណ្ឌគតិយុត្តមួយចំនួន ទៀត ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍បាននិងកំពុងប្រឹងប្រែងរៀបចំនិងជំរុញវិស័យវិទ្យាសាស្ត្រ បច្ចេកវិទ្យា និងនវានុវត្តន៍ និងប្រព័ន្ធនវានុវត្តន៍ជាតិដើម្បីធានាបានថាកម្ពុជានឹងក្លាយខ្លួនជាប្រទេសមានចំណូមធ្យមកម្រិតខ្ពស់ក្នុងឆ្នាំ២០៣០ និងជាប្រទេសដែលមានចំណូលខ្ពស់ក្នុងឆ្នាំ២០៥០។
សេចក្តីជូនដំណឹងនេះ ក៏បានស្រង់សម្តីឯកឧត្តម ហ៊ុល សៀងហេង អគ្គនាយកនៃអគ្គនាយកដ្ឋានវិទ្យាសាស្ត្រ បច្ចេកវិទ្យា និងនវានុវត្តន៍ និងក្នុងនាមអគ្គនាយកដ្ឋានទទួលបន្ទុកសម្របសម្រួលរៀបចំកម្មវិធី ដែលបានមានប្រសាសន៍ថា យន្តការសហការយ៉ាងស្អិតរមួតរវាងស្ថាប័នរដ្ឋ វិស័យឯកជន និងដៃគូអភិវឌ្ឍន៍ជាគន្លឹះដើម្បីជំរុញការអភិវឌ្ឍវិស័យវិទ្យាសាស្ត្រ បច្ចេកវិទ្យា និងនវានុវត្តន៍ឱ្យមានការរីកចម្រើនឆាប់រហ័ស។ ហេតុនេះសូមអញ្ជើញសាធារណជន វិស័យឯកជនដៃគូអភិវឌ្ឍន៍និងស្ថាប័នពាក់ព័ន្ធចូលរួមឱ្យបានច្រើនកុះករក្នុងពិព័រណ៍ បច្ចេកវិទ្យាកម្ពុជានាពេលខាងមុខនេះដើម្បីទទួលបានពុទ្ធិ ចំណេះដឹង ជាពិសេសស្រូបទាញយកនូវឱកាសនៃពង្រីកបច្ចេកវិទ្យារបស់ខ្លួន ក៏ដូចជាឱកាសនៃការវិនិយោគតាមវិស័យទាំងអស់គ្នា៕ដោយៈសិរីមតី