ភ្នំពេញ៖ ក្នុងឱកាសអញ្ជើញប្រគល់សញ្ញាបត្រដល់និស្សិតវិទ្យាស្ថានវ៉ាន់ដាកាលពីថ្ងៃទី០៣ ខែតុលា ឆ្នាំ២០២២សម្តេចតេជោហ៊ុន សែន បានចាត់ទុកវិស័យឯកជន ជាក្បាលម៉ាស៊ីន នៃកំណើនសេដ្ឋកិច្ច ដោយសារការរីកចម្រើននៃវិស័យឯកជន បានជួយដោះស្រាយបញ្ហាសម្រាប់សេដ្ឋកិច្ចរបស់ប្រទេសហើយនៅពេលវិស័យឯកជនកាន់តែខ្លាំង ការបង់ពន្ធជូនរដ្ឋក៏កាន់តែច្រើនដែរ។កម្ពុជាតែងតែទទួលបានចំណូលពីពន្ធដារប្រមាណ២៥០លានដុល្លារ យ៉ាងតិចជារៀងរាល់ខែ ។
សម្តេចតេជោបានមានប្រសាសន៍ថា វិស័យឯកជន បាននិងកំពុងពង្រឹងខ្លួនឡើង ដែលទាមទារនូវធនធានមនុស្ស សម្រាប់អភិវឌ្ឍន៍ ហើយរាជរដ្ឋាភិបាលកម្ពុជា បានចាត់ទុកវិស័យឯកជន ជាក្បាលម៉ាស៊ីនរថភ្លើង នៃកំណើនសេដ្ឋកិច្ច។ធនធានមនុស្ស ដែលបានបណ្ដុះបណ្ដាលនៅតាមបណ្ដាគ្រឹះស្ថានឧត្ដមសិក្សានានា គឺមួយផ្នែកធំបានវិស័យឯកជនទទួលយកទៅធ្វើការ ដោយម្ខាងដោះស្រាយធ្វើការងារឲ្យនិស្សិត និងម្ខាងទៀត គឺដើម្បីការរីកចម្រើននៃវិស័យឯកជនខ្លួនឯង។
សម្ដេចតេជោ បានថ្លែងបន្ថែមទៀតថា“វិស័យឯកជន រីកធំធាត់កាលណា គឺវាជួយដោះស្រាយបញ្ហាសម្រាប់សេដ្ឋកិច្ចរបស់ប្រទេស តាមរយៈការដោះស្រាយការងារធ្វើ និងតាមរយៈនៃការបង់ពន្ធវិស័យឯកជនកាន់តែខ្លាំង ការបង់ពន្ធកាន់តែច្រើន ហើយដែលការបានប្រាប់ពីការបង់ពន្ធនោះយើងមានលទ្ធភាពយកទៅវិនិយោគ ធ្វើផ្លូវថ្នល់ ប្រឡាយទឹក សាលារៀន មន្ទីរពេទ្យ ដំឡើងបៀវត្សមន្ត្រីរាជការរបស់យើង”៕ដោយៈសិរីមតី
